Kənd Təsərrüfatı Nazirliyi yanında Aqrar Kredit və İnkişaf Agentliyinin vəsaiti hesabına sahibkarlıq subyektlərinə verilən güzəştli kreditlərin məbləği artırılıb. Bununla bağlı Prezident İlham Əliyev “Kənd təsərrüfatına dövlət dəstəyinin və aqrar sahədə lizinq fəaliyyətinin təkmilləşdirilməsi haqqında” 2018-ci il 19 dekabr tarixli, 413 nömrəli Fərmanına dəyişiklik edib.
Ölkə başçısının imzaladığı fərmanda, həmçinin, aqrar sahənin maliyyələşməsinin stimullaşdırılması ilə bağlı bir sıra məsələlər də öz əksini tapıb. Fərmanla “Azərbaycan Respublikasının Kənd Təsərrüfatı Nazirliyi yanında Aqrar Kredit və İnkişaf Agentliyinin vəsaitindən istifadə Qaydası” dəyişdirilib. Qaydanın 5.1.1-ci yarımbəndində bildirilirdi ki, Agentliyin vəsaiti hesabına sahibkarlıq subyektlərinə 5000 manatadək mikrokreditlər verilə bilər. Dövlət başçısının yeni fərmanı ilə bu rəqəm 15000 manatadək qaldırılıb.
Kiçikhəcmli kreditlərin də məbləği artırılıb. Sənədin əvvəlki variantında yazılırdı ki, 5001 manatdan 30000 manatadək kiçikhəcmli kreditlər verilə bilər. Yeni fərmanla isə 5001 rəqəmi 15001 rəqəmi ilə əvəzlənib. Bununla yanaşı, sahibkarlar üçün güzəştli kreditlərin müddəti üç ilədək müəyyən olunub. Əvvəlki sənəddə bu müddət iki ilədək nəzərdə tutulurdu.
Ökə başçısının sahibkarlıq subyektləri ilə bağlı son fərmanı mühüm əhəmiyyət kəsb edir. Çünki bunun sayəsində aqrar sektorda fəaliyyət göstərən sahibkarlara verilən kreditlərin həm məbləği artırılır, həm də müddəti. Nəzərə alsaq ki, aqrar sektorda çalışan sahibkarlar kredit resurslarına daha çox ehtiyac duyur, o zaman son fərmanın əhəmiyyətini ekspertlər necə dəyərləndirirlər?
“...bu kredit təyinatı üzrə xərclənir, yoxsa digər sahələrə yönəldilir...”
Məsələyə münasibət bildirən iqtisadçı-alim Əli Əlirzayev aqrar sektorla bağlı belə bir qərarın verilməsinə bir neçə aspektdən müsbət prizmadan yanaşdı: “Koronavirus pandemiyası aqrar sektora da təsir göstərir. Bu virusin nə qədər davam edəcəyini heç kəs bilmir. Belə bir şəraitdə biz daxili imkanlarımızı artırmalıyıq. Aqrar məhsullara olan tələbatı yerli istehsal hesabına təmin etməliyik. Bazarda olan tələbatı ödəmək üçün istehsal həcmini artırmalıyıq. Kartofdan tutmuş, meyvə-tərəvəzə qədər bütün bu məhsullara olan tələbat yerli istehsal hesabına təmin edilməlidir. Heyvandarlıq sahəsində məhsuldarlıq artmalı və emal sektoru inkişaf etdirilməlidir. Bunun üçün də sahibkarlara sərfəli şərtlərlə aqrar kreditlər verilməlidir. Sahibkarlıq subyektlərinə mikrokreditlərin 5 min manatdan 15 min manatadək artırılması o deməkdir ki, istehsal 3 dəfə artmalıdır. Xaricdən heç nə gəlməyəndə biz bazarda tələbatı daxili imkanlar hesabına təmin etməliyik. Bu gün aqrar sektorda çalışan sahibkarların istehsalı artırmaq üçün xüsusi kapitalı yoxdur. Xüsusən də xırda təsərrüfatların. Ona görə də Prezidentin son fərmanı aqrar sektorda çalışan sahibkarların istehsal imkanlarını artıracaq. Başqa bir tərəfdən, Azərbaycanın sahibkarları kredit resursları ilə təmin etmək imkanları var. Ona görə də bu ehtiyatlardan səmərəli istifadə edilməlidir. O üzdən, belə bir qərarın verilməsi doğru addımdır. Ancaq əvvəldən planlaşdırılmalıdır ki, bu kredit təyinatı üzrə xərclənir, yoxsa digər sahələrə yönəldilir. Məsələn, sahibkar bu krediti alandan sonra traktor əvəzinə, vəsaiti başqa istiqamətə yönəldə bilər. Ona görə də kreditlər ünvanlı olmalı və bu sahəyə ciddi nəzarət edilməlidir”.
Vidadi ORDAHALLI
