“Tibbi maska və dezinfeksiya vasitələrinin istehsalı bir daha onu göstərir ki, Azərbaycanda yaradılmış infrastruktur imkan verir, biz qısa müddət ərzində lazım olan istehsalat sahələrinin təşkilində uğur qazana bilək”. Bunu Prezident İlham Əliyev Sumqayıt Kimya Sənaye Parkında tibbi maska istehsalı müəssisəsi ilə tanışlıqdan sonra Azərbaycan xalqına müraciətində deyib.
Ölkə başçısının sözlərinə görə, sözügedən Sənaye Parkı onun təşəbbüsü ilə yaradılıb: “Artıq burada bir çox müəssisələr fəaliyyət göstərir. Bu müəssisələr bizim qeyri-neft iqtisadiyyatımıza da böyük töhfə verir. Eyni zamanda, mövcud kadr potensialı, sahibkarlar sinfinin inkişafı, dövlət və özəl sektorun tərəfdaşlığı, daim dövlət tərəfindən özəl sektora göstərilən dəstək – həm siyasi, həm maddi dəstək, güzəştli kreditlərin verilməsi, bütün bu amillər yeni vəziyyətə gətirib çıxardı ki, biz vətəndaşlara lazım olan vasitələri qısa müddət ərzində operativ şəkildə istehsal edək və bazara təqdim edək. Mən onu bir daha qeyd etmək istəyirəm ki, hətta inkişaf etmiş ölkələrdə bu gün maska qıtlığı var. Bizdə alınmış yeni avadanlıq, - bu avadanlığın ikinci xəttinin də gətirilməsi nəzərdə tutulur, - imkan verir ki, avtomatlaşdırılmış rejimdə böyük həcmdə, böyük sayda maskalar istehsal olunsun”.
Bəzən elə şərait yaranır ki, hansısa məhsul istehsalı zamanı istehsalın təyinatını dəyişmək zərurəti yaranır. Məsələn, traktor istehsal edən zavod müharibə zamanı profilini dəyişərək tank istehsal edir. Bu zaman istehsal sahəsində transformasiya prosesi gedir. Bütün bu deyilənlərlə yanaşı, ümumən koronavirus dövründə Azərbaycan iqtisadiyyatı özünün transformasiya qabiliyyətini necə göstərdi?
“İnfrastruktur və texniki təhlükəsizlik nöqteyi-nəzərdən bu müəssisələr istehsal profilini dəyişməklə...”
Məsələyə münasibət bildirən iqtisadçı-ekspert Fuad İbrahimovun fkrincə, ölkə iqtisadiyyatında transformasiya prosesi özünü çox uğurla göstərir: “Son dövrlər Azərbaycanda qeyri-neft sektoru ilə bağlı kifayət qədər müasir müəssisələr açılıb. Həmin müəssisələrin əksəriyyəti müasir dövrün tələblərinə cavab verdiyi üçün, bizdə istehsalın transformasiyası alınır. Yəni bir məhsul istehsalından digərinə keçmək mümkün olur. İnfrastruktur və texniki təhlükəsizlik nöqteyi-nəzərdən bu müəssisələr istehsal profilini dəyişməklə, transformasiya nəticəsində digər məhsullar istehsal edə bilirlər. Bu da tələb olunan əmtəələrin istehsalına şərait yaradır. Belə hallar iqtisadiyyatın elastikliyinə, digər tərəfdən də lazım olduğu anda istehsal profilini dəyişməyə şərait yaradır. Ona görə də hesab edirəm ki, bu, ölkə iqtisadiyyatının uğurudur. Tibbi maska və dezinfeksiya vasitələrinin istehsalı bunun əyani sübutudur”.
Vidadi ORDAHALLI
