Koronavirus (COVID-19) pandemiyası ilə bağlı əhalinin ərzaq və tibbi ehtiyacları üçün zəruri olan və ölkəyə idxal olunan müvafiq məhsullarla tam və fasiləsiz təmin edilməsi məqsədilə həyata keçiriləcək tədbirlər açıqlanıb.
Bu, Nazirlər Kabinetinin təsdiqlədiyi “Koronavirus (COVID-19) pandemiyasının və bundan irəli gələrək dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı bir sıra tədbirlər haqqında” Azərbaycan Respublikası Prezidentinin 2020-ci il 19 mart tarixli, 1950 nömrəli Sərəncamının 10.2-ci bəndinin icrası ilə bağlı Tədbirlər Planı”nda əksini tapıb.
Sənədə əsasən, 2020-ci il ərzində İqtisadiyyat Nazirliyi və Dövlət Gömrük Komitəsi zəruri hesab edilən məhsullar üzrə idxal rüsumlarının müddətli olaraq “0” dərəcəyə endirilməsi (və ya azaldılması) və zəruri hesab edilən məhsulların idxalı zamanı həyata keçirilən gömrük rəsmiləşdirilməsi, nəzarət və icazələrin (sertifikatların) verilməsi tədbirlərinin növbədənkənar (sürətləndirilmiş) tətbiqini təmin etməlidir.
Maraqlıdır, sözügedən məhsullar üzrə idxal rüsumunun dayandırılması bazarlardakı vəziyyətə necə təsir göstərəcək?
“Bu güzəşt həm sahibkarların, həm də istehlakçıların mənafeyinə uyğundur”
Məsələyə münasibət bildirən millət vəkili Aydın Hüseynovun sözlərinə görə, zəruri hesab edilən məhsullarla bağlı belə bir qərarın verilməsi önəmli əhəmiyyət kəsb edir: “Çünki zəruri hesab edilən məhsulların qiymətinin sabit qalması çox vacibdir. Məlum olduğu kimi, koronavirusla əlaqədar tətbiq olunan məhdudiyyətlər müəyyən çətinliklər yaradır. Bu çətinlikləri önləmək üçün hökumət bir sıra vacib qərarlar qəbul edir. Onlardan biri də zəruri hesab edilən məhsullar üzrə idxal rüsumlarının müddətli olaraq dayandırılmasıdır. Hesab edirəm ki, bu qərar bazarlarda zəruri istehlak mallarının qiymətinin sabit qalmasına müsbət təsir edəcək. Hansısa neqativ halların yaranmasının qarşısını alacaq. Sözügedən güzəşt həm də tibbi avadanlıqların və dərmanların qiymətinin sabit qalmasına öz müsbət təsirini göstərəcək. Deməyim odur ki, bu qərarın bir sıra üstünlükləri var. Ən nəhayət, hesab edirəm ki, bu güzəşt həm sahibkarların, həm də istehlakçıların mənafeyinə uyğundur”.
Vidadi ORDAHALLI
