Azərbaycanda dövlətə məxsus əmlakların icarəsində biznesə güzəşt ediləcək. Bu, Nazirlər Kabinetinin sərəncamı ilə təsdiqlənən koronavirus və onun bütün dünyada olduğu kimi, Azərbaycan iqtisadiyyatı və biznesinə mənfi təsirini aradan qaldırmaq üçün iqtisadiyyata və biznesə dəstək üçün Tədbirlər Planında nəzərdə tutulub.
Plana əsasən, dövlət əmlakını icarəyə götürmüş və pandemiya nəticəsində zərər çəkmiş sahibkarlıq subyektlərindən (o cümlədən, kiçik və orta sahibkarlardan) icarə haqqı 2020-ci ilin sonunadək tutulmayacaq. Bundan başqa, dövlət torpaq fonduna aid torpaq sahələrini icarəyə götürmüş və pandemiya nəticəsində zərər çəkmiş sahibkarlar (o cümlədən, kiçik və orta sahibkarlar) tərəfindən ödənilən icarə haqları da 2020-ci ilin sonunadək tutulmayacaq.
Bununla belə, dövlət sənaye məhəllələrində fəaliyyət göstərən sahibkarlara da güzəşt etmək niyyətindədir. Plana görə, sənaye məhəllələrində pandemiyanın mənfi təsir etdiyi sahələr üzrə fəaliyyət göstərən rezidentlərin icarə haqlarının 2020-ci ilin sonunadək hesablanmaması nəzərdə tutulur.
Bütün bunların fonunda, sözügedən kateqoriyaya aid olan sahibkarlıq subyektlərinin ilin sonuna qədər icarə haqlarından azad edilməsi nə verəcək? Bu, sahibkarların maddi durumuna ümumən nə kimi müsbət təsir göstərəcək?
“Bu imkan verəcək ki, onların üzləşdiyi itkilər azalsın”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, sahibkarlara icarə haqları ilə bağlı güzəştlərin edilməsi mühüm əhəmiyyət kəsb edir: “Məsələ ondadır ki, pandemiya bir sıra iqtisadi sahələrə böyük mənfi təsir göstərir. Belə vəziyyətdə bir sıra şirkətlərdə, xüsusən də böyük şirkətlərdə icarə haqlarının ödənilməsində problemlər yaşanır. Ona görə də icarə haqlarının ödənilməsində yaranan problemlərin aradan qaldırılması ilə bağlı dövlət güzəştlər edəcək. Burada söhbət dövlət əmlakını, torpaqlarını icarəyə götürən sahibkarlara ediləcək icarə güzəştlərindən gedir. Həmçinin, sənaye məhəllələrində pandemiyanın mənfi təsir etdiyi sahələr üzrə fəaliyyət göstərən rezidentlər icarə haqlarından azad ediləcək. Bunun sayəsində həmin sahibkarlıq subyektləri həm xərclərinə qənaət etmiş olacaqlar, həm də digər problemlərini qismən həll edəcəklər. Nəzərə almaq lazımdır ki, icarə xərcləri sabit xərclərə aiddir. Müəssisə işləyəndə orada sabit xərclər, bir də dəyişən xərclər olur. Ona görə də müəssisənin fəaliyyəti dayananda sabit xərclər böyükdürsə, belə hallar müəssisəyə ziyan gətirir. Bu baxımdan sabit xərclərə güzəşt edilir ki, sahibkarlıq subyektləri böyük itkilərlə üzləşməsinlər. Hesab edirəm ki, dövlət tərəfindən edilən bu güzəşt sahibkarların xeyrinədir. Bu imkan verəcək ki, onların üzləşdiyi itkilər azalsın”.
Vidadi ORDAHALLI
