26/05/2020 02:04
728 x 90

Koronavirusla mübarizə Azərbaycanda investisiya qoyuluşunda yeni mərhələ açır - qaranlıqdakı əmlak və kapital amnistiya hüququ ala bilər

Əkrəm Həsənov: “Dövlətin kapital və əmlakın amnistiyası təşəbbüsünü dəstəkləyirəm”

img

Azərbaycanda iqtisadi artımın və investisiyaların maliyyə mənbələrinin genişləndirilməsi məqsədilə 2020-ci ilin aprel-dekabr ayları ərzində ölkədə kapitalın və əmlakın amnistiyası nəzərdən keçiriləcək.

Bu, Nazirlər Kabinetinin aprelin 4-də təsdiqlədiyi “Koronavirus (COVID-19) pandemiyasının və bundan irəli gələrək dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı bir sıra tədbirlər haqqında” Azərbaycan Respublikası Prezidentinin 2020-ci il 19 mart tarixli, 1950 nömrəli Sərəncamının 10.2-ci bəndinin icrası ilə bağlı Tədbirlər Planında əksini tapıb.

Sənədə əsasən, bu sahədə icraçı qurumlar İqtisadiyyat Nazirliyi, Maliyyə Nazirliyi və Mərkəzi Bank müəyyənləşdirilib.

Hazırkı həssas dövrdə sahibkarların sərmayə qoyması,  məşğulluğun təmin olunması baxımından bu qərar nə kimi stimullaşdırıcı rola malikdir?

  • “Bu, müxtəlif yollarla ölkədən çıxarılan kapitalın qaytarılmasına gətirib çıxara bilər”

Məsələyə münasibət bildirən maliyyə eksperti Əkrəm Həsənov buna müsbət prizmadan yanaşır. Onun fikrincə, indiki dövrdə buna ehtiyac var: “Hər şey hökumətin amnistiyanın hansı modelini seçəcəyindən asılıdır. Amnistiya edilən əmlakın və gəlirin siyahısından, harada yerləşməsindən, amnistiyanın tətbiqi müddətindən asılı olaraq, dünyada onun müxtəlif formaları tətbiq edilib. Azərbaycanda gəlirlərin və əmlakın leqallaşdırılması müddəti iki ildən artıq təşkil etməməlidir. Azərbaycan şəraitində kapitalın və əmlakın amnistiyası Konstitusiya qanununun qəbulu yolu ilə tətbiq edilməlidir. Bu onun üçün vacibdir ki, sahibkarlarda bu addımın geriyə yolunun olmamasına Konstitusiya zəmanəti olsun. Bundan əlavə, vətəndaşlara bu amnistiyanın mübahisələri ilə bağlı yerli məhkəmə qərarlarından beynəlxalq məhkəməyə şikayət etmək hüquqi verilməlidir. Bununla belə, hesab edirəm ki, kapitalın və əmlakın amnistiyasında dövlət onlara heç olmasa simvolik birdəfəlik vergi qoyacaq. Məsələn, bu vergi leqallaşdırılan vəsaitlərin 10 faizi qədər ola bilər. Bu, dövlətin maliyyə çətinlikləri ilə üzləşə biləcəyi indiki şəraitdə məntiqlidir. Kapitalın və əmlakın amnistiyası müxtəlif yollarla ölkədən çıxarılan kapitalın qaytarılmasına gətirib çıxara bilər. Sözügedən gəlirlərin leqallaşdırılması zamanı dövlət iki üsul tətbiq edə bilər: bəyan edilən gəlirin 30 faizə qədər birdəfəlik vergi ödəmək şərtilə mənşəyinin leqal olması ilə bağlı zəmanət məktubu və 5 faizdən çox olmayaraq, birdəfəlik vergi ödəmək şərtilə gəlirlərin tam geri qaytarılması”.

Vidadi ORDAHALLI

Son xəbərlər