Mehman Muradlı: "Azərbaycan bununla bir daha sübut edəcək ki, öz ərazilərinə tam nəzarəti həyata keçirir"
"Yəqin ki, onunla da bağlı hansısa humanist addım atılacaq"
Azərbaycan qanunlarını kobud şəkildə pozaraq dəfələrlə işğal altındakı Dağlıq Qarabağa getdiyi və separatçı rejimi açıq şəkildə təbliğ etdiyi üçün barəsində cinayət işi açılan, Minskdə həbs edilən və Azərbaycana ekstradisiya qərarı çıxarılan blogger Aleksandr Lapşinin bu qərarın ləğvi üçün apelyasiya şikayətinin perspektivi görünmür.
Belarus Ali Məhkəməsində baxılan son məhkəmə prosesinin proseduruna görə, qərar 3 gün ərzində verilə bilər. Ancaq Lukaşenkonun ekstradisiyanı tezləşdirməkdə maraqlı olması söyləməyə əsas verir ki, hökm ləngiməyəcək.
A.Lapşinin üçlü vətəndaşlığa malik olması (İsrail, Rusiya, Ukrayna) onunla bağlı məsələnin məntiqi sonluğa çatmasını müəyyən mənada yubadır. Xüsusilə Rusiya bu məsələdə hay-küy salıb. Moskva Lapşinin Azərbaycana verilməməsi üçün Belarusa çağırış və təzyiq edir.
Rusiya xarici işlər naziri Sergey Lavrovun ardınca Rusiyanın ombudsmanı Tatyana Moskalkova bənzər bəyanatla çıxış edərək, Lapşinin ekstradisiyası əleyhinə olduğunu söyləyib. Onun sözlərinə görə, Rusiya Konstitusiyası ölkə vətəndaşının üçüncü dövlətə verilməsini qadağan edir.
Rusiya Xarici İşlər Nazirliyinin sözçüsü Mariya Zaxarova isə məsələ ilə bağlı daha sərt mövqe sərgiləyib, faktiki surətdə Minski hədələyib.
Azərbaycanın Lapşinin həbsini tələb etməsi beynəlxalq konvensiyanın tələblərinə əsaslanır. Bundan əlavə, Lapşinlə bağlı Azərbaycanın hansı qərarı verəcəyi hələ tam məlum olmadığı üçün, bəzi ölkələrin onun ekstradisiyası ətrafında yaratdıqları ajiotajı anlamaq olmur. Bəlkə Azərbaycan Lapşinlə bağlı daha humanist davranacaq. Əslində, bəzi ölkələrin bu məsələ ətrafında yaratdıqları ajiotajın səbəbi bəllidir və bu heç də Lapşinin taleyinə görə narahatlıq hissindən qaynaqlanmır. Ancaq Azərbaycan da bu məsələdə çox israrlı görünür. Ölkəmizin bu mövzuda prinsipial olaraq nümayiş etdirdiyi israr nə ilə bağlıdır?
Hüquqşünas Mehman Muradlı qəzetimizə açıqlamasında bildirdi ki, Azərbaycan üçün Lapşin məsələsi böyük siyasi məna daşıyır: "Uzun illərdir işğal altında olan ərazilərə qanunsuz səfər edənlərlə bağlı Azərbaycan "qara siyahı" tərtib edir, həmin adamların adı ora yazılır. Ancaq indiyə kimi həmin adamlardan kimisə mühakimə etmək mümkün olmayıb. Lapşinin səfərləri digərlərindən ona görə fərqlənib ki, o, məsələnin mahiyyətini bilə-bilə həmin səfəri edib. Üstəlik, qondarma qurumun piarı ilə məşğul olub. Lapşinin Azərbaycan qanunları əsasında mühakimə olunması dünyaya yeni bir mesajın verilməsi anlamına gələcək. Kifayət qədər səsli proses olan bu işdən sonra bilinəcək ki, Lapşinə elan olunan əsas ittiham Azərbaycan sərhədlərini qanunsuz pozma ilə bağlıdır. Çoxları üçün dərs olacaq ki, Dağlıq Qarabağda müvəqqəti məskən salan terrorçuların həmin ərazilərin idarəetməsinə hüquqi cəhətdən heç bir ixtiyarı yoxdur. Azərbaycan bununla bir daha sübut edəcək ki, öz ərazilərinə tam nəzarəti həyata keçirir. Azərbaycan eyni zamanda humanizm siyasətinə ciddi önəm verir. Cənab Prezident mütəmadi olaraq əfv fərmanları verir. İnsanları əfv edir. Lapşinin anasının ölkə başçısına müraciəti var. Yəqin ki, onunla da bağlı hansısa humanist addım atılacaq. Amma bu, mühakimədən sonra baş verə bilər".
Məhəmmədəli QƏRİBLİ
