Qardaş Türkiyə Cumhuriyətində ötən il iyulun 15-də FETÖ mənsubları tərəfindən dövlət çevrilişinə uğursuz cəhd nəticəsində çoxlu ölənlərin olduğu və dağıntılara yol verildiyi məlumdur. Həmin hadisələr vaxtı çevrilişçilər Türkiyə Millət Məclisinin binasına da bomba atmışdılar. Binanın bir hissəsi dağıdılıb və həmin yer bu gün də tarixi fakt kimi saxlanır.
Türkiyə Cumhuriyyəti hökumətinin Baş informasiya yayımı idarəsi parlamentin binasından salınmış daşların kiçik bir parçasının da olduğu maraqlı xatirə kartı hazırlayıb. Az əvvəl qardaş ölkənin Azərbaycandakı Səfirliyinin mətbuat katibi Hamid Qaradəniz və səfirliyin əməkdaşı Habil Əliyev xatirə kartını "Bakı-Xəbər" redaksiyasına gələrək baş redaktor Aydın Quliyevə təqdim ediblər. Hamid bəy qəzetimizə eksklüziv müsahibə də verib. Beləliklə, qardaş ölkədəki 15 iyul dəhşətli hadisələrinin "yadigarlarından" olan kiçik bir daş parçası "Bakı-Xəbər" redaksiyasında da saxlanacaq. Hamid bəy belə dedi: "Türkiyə-Azərbaycan qardaşlığı sadəcə sözlərdə və fikirlərdə ifadə olunduğu kimi deyil. Bu qardaşlığın böyük tarixləri var, biz həmişə acılarımızı və sevinclərimizi qardaş kimi paylaşmışıq, paylaşırıq və gələcəkdə də belə olacaq.
Necə ki, Türkiyə qardaş Azərbaycan xalqına həmişə diqqət köstərib, arxa durub, eynilə həmin o dəhşətli 15 iyulda xalqımız xain və zalim FETÖ terrorçularının qanlı hücumuna məruz qalanda dost Azərbaycan xalqından, şəxsən sayın Prezident İlham Əliyevdən, Azərbaycan mediasından, ziyalılardan, qeyri-hökumət təşkilatlarından böyük dəstək gördük. Bu bizi çox məmnun etdi, acılarımızın xeyli azalmasına səbəb oldu. Acılarımız isə həqiqətən böyük oldu. Təyyarə və helikopterlərlə bombalandıq, güllələndik, 246 vətəndaşımız, hansılar ki, demokratiyanın, dövlətimizin müdafiəsinə qalxmışdılar, xaincəsinə öldürüldülər, həm də başqa bir ölkə tərəfindən yox, bizim özümüzün əsgəri uniformamızı geyinərək içlərində dövlətimizə, millətimizə hədsiz kin bəsləyən, insanlıqdan çıxmış xain terrorçular tərəfindən törədildi. Həmin gecə 80 milyon Türkiyə xalqı xain terrorçulara qarşı durdu, küçələrə çıxdı, xainləri bir-bir tutub dövlətə təslim etdi, ancaq onlara qarşı heç bir halda zorakı hərəkətlərə yol vermədik. Çünki bizlər mərhəmətli bir xalqın nümayəndələriyik, bir hüquq dövlətinin vətəndaşlarıyıq. Ancaq nə edək ki, bizim mərd insanlarımız beyinlərini yadlara "kreditə vermiş" xainlərin hücumlarının qurbanları oldular. Biz həmin gecə şəxsən hörmətli Prezident cənab İlham Əliyevin yaxın dəstəyini gördük, hiss etdik, o da öz xalqı ilə birgə səhərə qədər baş verən hadisələri izləyərək bizim üzüntülərimizə şərik oldu, dəstəklərini ifadə etdi. Bu dəstək bizim xalqımızın qələbəsində çox əhəmiyyətli oldu.
Azərbaycan mediası da həmin günlərdə bizə öz dəstəyini əsirgəmədi. 16 iyul səhərini açdığımız qələbə xəbərlərini iki qardaş xalq olaraq birlikdə yaşadıq və ölkələrimizin mediası qələbə xəbərlərini dünyaya birlikdə yaydılar. Bizim Basın Yayın İnformasion Genel Müdirliyimiz o hadisələrdə qardaşlıq rəmzi olan belə bir kart hazırlayıb və mən o kartı "Bakı-Xəbər" qəzetinin redaksiyasına təqdim etməkdən şərəf duyuram".
Qəzetimizin baş redaktoru Aydın Quliyev təqdim olunan xatirə hədiyyəsini məmnunluqla qəbul etdiyini bildirdi, təşəkkür etdi və əlavə etdi ki, qardaş ölkədəki o qanlı hadisələrin tarixi izlərini özündə yaşadan daş parçasının bir simvol kimi redaksiyamızda olmasından məmnundur.
Baki-xeber.com
