"Təcrübə mübadiləsindən hər iki tərəf qazanacaq"
Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Səudiyyə Xəbər Agentliyinin (SPA) baş ofisində agentliyin prezidenti Abdullah bin Fəhd əl-Hüseynlə görüşüb. Görüşdə Əli Həsənov Azərbaycan Respublikası ilə Səudiyyə Ərəbistanı Krallığı arasında müxtəlif sahələrdə əlaqələrin əhəmiyyətindən danışıb və İki Müqəddəs Ocağın xadimi, Səudiyyə Ərəbistanının kralı Salman bin Əbdüləziz Al Səudun İslam dünyasının problemlərinin həlli istiqamətində böyük səylərini yüksək qiymətləndirib.
Səudiyyə Ərəbistanının mədəniyyət və informasiya naziri Adil bin Zeyd ət-Tureyfinin dəvəti ilə həyata keçirilən səfər Əli Həsənovun bu ölkəyə on il ərzində ikinci səfəridir. Azərbaycan Prezidentinin köməkçisi səfər zamanı Səudiyyə Ərəbistanında bütün sahələrdə böyük inkişafın şahidi olduğunu söyləyib. Ə.Həsənov qeyd edib ki, bu səfər qardaş Azərbaycan və Səudiyyə Ərəbistanı arasında münasibətlərin, xüsusilə mətbuat sahəsində əməkdaşlığın inkişaf etdirilməsi, media qurumları, o cümlədən "AzərTAc" ilə SPA arasında əlaqələrin genişləndirilməsi məqsədilə həyata keçirilir.
Görüşdən sonra Azərbaycan Prezidentinin köməkçisi SPA-nın iş prosesi ilə tanış olub.
Məlum olduğu kimi, Azərbaycan dövləti multikultural dəyərlərə böyük önəm verir. Bu siyasətdən irəli gələn tələblər dövlətin bütün sahələrinə sirayət edib. Azərbaycan mətbuatında da dini tolerantlıq, sivilizasiyaların yaxınlaşması kimi ənənələrin təbliğinə böyük önəm verilir. İki ölkə arasında media sahəsində əməkdaşlığın davamı sivilizasiyaların yaxınlaşdırılması və bu sahədə gələcək münasibətlərin inkişafı baxımından nə kimi əhəmiyyətə malik olacaq?
Media eksperti Yadigar Məmmədli qəzetimizə açıqlamasında bildirdi ki, Ə.Həsənovun Səudiyyə Ərəbistanına səfərini gözlənilməz saymaq olmaz: "Bilirsiniz ki, Azərbaycan istər Qərb, istərsə də müsəlman ölkələrilə sıx əməkdaşlıq qurub. İslam ölkələrinə aid müxtəlif ranqlı tədbirlərə Bakının ev sahibliyi etməsi buna əyani sübutdur. Eyni zamanda bu ilin İslam Həmrəyliyi İli kimi qeyd olunması və bundan əvvəlki ilin Multikulturalizm İli kimi keçirilməsi bir daha sübut edir ki, biz ölkə olaraq sivilizasiyaların yaxınlaşması, dini tolerantlığa böyük önəm veririk. Əli müəllimin səfərini də məhz həmin siyasətin davamı kimi qəbul edə bilərik. Təbiidir ki, bu məsələnin təbliğində KİV-lərin üzərinə böyük rol düşür. Hesab edirəm ki, mətbuat sahəsində gələcək əməkdaşlığın inkişafının böyük faydası olacaq. Təcrübə mübadiləsindən hər iki tərəf qazanacaq. Yəqin ki, növbəti mərhələdə biz Səudiyyə Ərəbistanını təmsil edən KİV nümayəndələrinin ölkəmizə səfərinin şahidi olacağıq. Bu il həm də ölkəmizdə İslam Oyunlarının keçirilməsi ilə bağlı ərəb ölkələrini təmsil edən media qurumlarının dövlətimizə marağı böyük olacaq".
Məhəmmədəli QƏRİBLİ
