Agentliyin rəhbəri Əkbər Hüseynzadə ilk öncə rəhbərlik etdiyi agentlik barədə bunları bildirdi:
- "Təhsil millətin gələcəyidir"- bu söz heç də təsadüfi, gəlişi gözəl söz kimi deyilməyib. Bu sözün hikməti ondadır ki, təhsilsiz millətin sonu uçurumdur. Əgər təhsilimiz düzgün qurulmasa, yaxşı dövlət qura bilmərik, çünki dövlət quruculuğunda təhsilli, bilikli, bacarıqlı kadrlara həmişə ehtiyac duyulub. Əgər yaxşı təhsilimiz olmasa yaxşı səhiyyəmiz də olmaz, çünki həkim kadrları məhz təhsildə hazırlanır. Təhsilimiz yaxşı olmasa nizamlı, güclü ordumuz da olmaz. Təhsilimiz yaxşı olmasa yaxşı diplomatiyamız da olmaz və sair, ilaxır, bu siyahını uzatmaq da olar. Ancaq sözümün "mustafası" odur ki, hər şey təhsillə başlayır. Təsadüfi deyil ki, ölkə rəhbəri təhsilimizi bir prioritet sahə kimi həmişə diqqət mərkəzində saxlayır. Heydər Əliyev Fondu, onun rəhbəri hörmətli Mehriban xanım Əliyeva təhsilimizlə bağlı nə qədər mütrəqqi işlər görür. Son illər təhsilimizdə baş verən yeniliklər, həyata keçirilən layihələr buna parlaq misaldır. Ona görə də hər birimiz bir vətəndaş olaraq bütün bunları dərk edərək, təhsilimiz üçün, mənəviyyatımız üçün, gələcəyimiz üçün çalışmalı, işləməliyik. "Təhsil-press.az" informasiya agentliyi də bu baxımdan həmin missiyanı öz üzərinə götürüb və bu yolla gedirik.
- Jurnalda işləyirdiniz, niyə media fəaliyyətinin bu formasına keçdiniz?
- Qloballaşan dünyanın öz tələbləri var. Dünyanın tələbi operativ, obyektiv xəbərdi. Bir müddət jurnalda işləmişəm. Söhbət ondan getmir ki, biz jurnal və qəzetlərimizin üstündən xətt çəkməliyik; xeyr, hər birinin öz yeri var. Bir misal çəkim. Əgər bü gün hansısa bir təhsil müəssisəsində hər hansı bir tədbir keçirilirsə və yaxud hər hansı bir yenilik baş verirsə, önəmli bir layihəyə start verilirsə, jurnal səhifəsində o, öz effektliyini itirdikdən sonra çıxır, zamanında yox və əlbəttə ki, bu da zaman baxımından heç kəsə lazım gəlmir. Ancaq informasiya agentliyi elə həmin gün dərhal o informasiyanı, xəbəri işıqlandırır və yayımlayır. Demək, bu gün ali və orta təhsil müəssisələrimizdə, bütün təhsil ocaqlarımızda, eləcə də başqa sahələrdə hansısa bir operativ informasiya yayımlanması lazımdır. Bunun üçün iki-üç aydan bir çıxan jurnal yox, məhz informasiya agentliyi lazımdır. Və o halda onlar da birmənalı olaraq bizimlə əməkdaşlıq edir. Jurnal isə, belə desək, elmi-publisistik yazılar üçün məqsədəuyğundur. Elm adamları istəyərlərsə, ödənişli şəkildə öz yazılarını istədikləri jurnal və digər dərgilərdə çap etdirə bilərlər. Ancaq yenə deyirəm, qəzetlərdə, informasiya portallarında gedən yazıları, xəbərləri toplayıb iki ayda bir öz səhifəsində toplum şəkildə çap edən jurnal qarşı tərəf üçün partnyor ola bilməz.
- Demək istəyirsiniz sizin informasiya portalı zəruri bir tələbdən yaranıb?
- Təbii, mən qeyd etdim ki, bu gün Azərbaycan təhsili çox mühüm yeniliklərə imza atır. Yeni-yeni layihələr həyata keçirilir. Mənim düşüncəmə görə, bunu cəmiyyətə təqdim etmək zamanıdır və buna görə də bu sahəni əhatə edən operativ informasiya portalına ehtiyac var. Və biz heç kəsin sifarişilə yaranıb, kiminsə sifarişini yerinə yetirməklə məşğul olmuruq.
- Agentliyin maliyyə mənbəyi hardandır, necə maliyyələşir?
- Biz əsas gəlir mənbəyi kimi reklam və elanları nəzərdə tuturuq. Çox təəssüf ki, bu gün ölkəmizdə reklam yazıları həddən artıq zəifdir. Ancaq biz təhsil, səhiyyə, mədəniyyət sahələri ilə sıx əməkdaşlıq edirik. Onların sifarişlərini yüksək peşəkarlıqla yerinə yetiririk. Yazılar, reklam və elanlar hazırlanır. Keçirilən bütün elmi-kütləvi tədbirlər işıqlandırılır və operativ olaraq yayımlanır. Bir neçə müəssisə ilə müqavilələrimiz var. Biz onların zəhmətini çəkirik, onlar da bizim "haqqımızı" ödəyir. Ancaq sözsüz ki, internet resursu olaraq əlavə dəstəyə ehtiyacımız var. Yəqin ki, eşitmisiz, Mətbuat Şurasının sədri, millət vəkili Əflatun Amaşov Milli Məclisdə informasiya portallarının da media orqanı olaraq dövlət dəstəyindən yararlanması haqda təkliflə çıxış edib. Bu doğrudan da çox təqdirəlayiq haldı. Sağ olsun. Mən yenə qeyd edirəm, İnformasiya Agentliyi də mediadır. Burada da yaradıcı insanlar çalışır. Onların da ailəsi var, onlar da maaş almalı, yaşamalıdır. Ölkə rəhbəri cənab İlham Əliyev həmişə çıxışlarında yeni iş yerlərinin açılması məsələsinə toxunur, biz də yeni iş yeri açırıq, yeni adamlar işə götürürük, onlar da işləməli, maaş almalı, yaşamalıdır.
- Vaxtilə deyirdilər mətbu orqanlar çoxdur, gündə bir qəzet çıxır, indi isə deyirlər gündə bir sayt açırlar...
- Bilirsiz, statistikaya müraciət etsək görərik ki, dörd mindən çox qəzet və jurnal qeydiyyatdan keçib və minə yaxın sayt var. Məsələ ondadır ki, köşklərdə satışda uzağı 20-yə yaxın adda qəzet, jurnal var. Qeydiyyatdan keçmək şərt deyil, ad var, özü yoxdur. Bu hələ mətbuatın özü demək deyil. Onlar yaz qarı kimidir, bir günlük ömür yaşayırlar. Bu bir növ xəstəlikdir. Eləcə də sayt xəstəliyi. Onların da bu gün cəmi on beşə yaxını aktivdir, fəaiyyətdədir. Həyatdadır. Adı olub, özü olmayanlar isə saysız-hesabsızdır. Biz qısa zaman kəsiyində geniş auditoriya qazanmışıq, oxucularımız var, onların məktublarını alırıq, redaksiyamıza zənglər olur, gənclərlə, tələbələrlə, müəllim və valideynlərlə sıx əməkdaşlıq edirik. Nüfuzlu ziyalılarımızın yazılarını işıqlandırırıq, bir sözlə, oxucu auditoriyasından şikayətimiz yoxdur.
- Tənqidə münasibətiniz necədir?
- Mətbuat həyatın güzgüsüzdürsə, mən deyərdim mətbuatın da güzgüsü tənqiddir, tənqidi yazılardır. Ancaq burada bir məsələ var, baxır necə tənqid və tənqidi kim yazır, necə yazır, bax, əsas məsələ budur. Çox təəssüflər olsun ki, bəzi üzdəniraq qəzetçilər tənqidlə təhqiri qarışıq salır, bilmirlər ki, bunlar tamamilə başqa-başqa şeylərdi. Əgər qələm əlindədirsə, deməli, kimisə təhqir, yaxud tənqid edə bilərsən? Bu, əlbəttə, yanlış mövqedir və yolverilməzdir.
Mən çox tənqidi yazılar yazmışam. Jurnalistlik fəaliyyətimə "Kirpi" satirik jurnalından başlamışam... Bu gün də tənqidi yazılarım az deyil, ancaq yazdıqlarıma görə bu günə kimi heç kimsədən üzr istəməmişəm, nə də yazdığımı təkzib etməmişəm. Düşünürəm, əlavə izaha ehtiyac yoxdur.
Əlbəttə, tənqidi yazıları yazanda da ağıllı-başlı yazmalısan. Nəyi necə yazacağını bilməlisən...
Xəbər xidməti
