Kənan Qubadzadə: "Dövlətin yaratdığı geniş imkanlar sayəsində, gənclər cəmiyyətin hərəkətverici qüvvəsinə çevrilib"
Tarixən hər bir xalq özünün xoşbəxt gələcəyə olan ümidlərini, ilk növbədə, gənc nəsillə bağlayır. Gənc nəslin yetişdirilməsi hər bir ölkə üçün ən başlıca məsələdir. Çünki ölkənin gələcəyi, müqəddəratı indiki gənclərdən asılıdır.
Gənc nəslin vətənpərvərlik ruhunda tərbiyə olunması onun mənsub olduğu xalqın rifahının, ölkənin çiçəklənməsinin rəhnidir. Bu gün böyük iftixarla demək olar ki, müasir Azərbaycan gəncliyi milli-mənəvi dəyərlərimizi, doğma ana dilimizi, ata-babalardan qalan gözəl adət-ənənələrimizi göz bəbəyi kimi qoruyub yaşadır. O öz həyatını qurarkən, öncə, müstəqil Azərbaycanın bugünü və gələcəyi haqqında düşünür, öz fəaliyyətində yüksək vətəndaşlıq hisslərinə malik olduğunu nümayiş etdirir.
Məlumdur ki, 2 fevral 1997-ci ildən bu günə qədər hər ilin bu günü Azərbaycanda Gənclər günü kimi qeyd olunur. Azərbaycan Respublikası gənclərinin I forumu ilk dəfə 1996-ci ilin bu günündə keçirilib. 1997-ci ildən fevralın 2-si mərhum prezident Heydər Əliyevin sərəncamı ilə Azərbaycan Gəncləri günü elan olunub. O gündən bu günə kimi hər il Gənclər günü təntənəli şəkildə qeyd olunur.
Gənclər Mərkəzi İctimai Birliyinin sədri Kənan Qubadzadə "Bakı-Xəbər"ə açıqlamasında qeyd etdi ki, müasir dünyada gənclərin rolu, dünyanın inkişafına təsirdə kəsin şəkildə dəyişib: "Gənclər bir çox sahələrdə dəyişiklik edən fəal qüvvə kimi özünü göstərir. Həmişə olduğu kimi, bu gün də gənc nəslin qarşısında aşağıdakı məsələlər durur: Müəyyən peşə, həyat təminatı. Amma bununla yanaşı, bugünkü gənclik müasir dünyaya çağırışlar edir, öz həyatını formalaşdırarkən, vətəndaş mövqeyi ortaya qoyur, siyasi proseslərdə fəal iştirak edirlər. Bu şəraitdə gənclərin dəstəklənməsi, onların təşəkkülü və formalaşması çox vacibdir. Bu gün Azərbaycanda həyata keçirilən gənclər siyasəti, müxtəlif sahələri əhatə edir: Gənclərin təhsili, tərbiyəsi, sağlamlığı, intellektual və mənəvi inkişafı, asudə vaxtının təşkili, problemlərinin həlli, hüquqlarının qorunması, respublikanın ictimai-siyasi və mədəni həyatında onların iştirakı təqdirəlayiqdir. Bu gün Azərbaycanda gənclər siyasəti ölkənin dövlət siyasətinin mühüm tərkib hissəsidir. Azərbaycan gəncliyi ictimai həyatın bütün sahələrində aktiv fəaliyyəti ilə seçilir, sosial, humanitar, iqtisadi və siyasi tədbirlərin həyata keçirilməsində mühüm rol oynayır. Dövlətin yaratdığı geniş imkanlar sayəsində, gənclər cəmiyyətin hərəkətverici qüvvəsinə çevrilib".
Həmsöhbətimizin sözlərinə görə, dövlətin müstəqilliyi uğrundan gənclər hər zaman ön sırada dayanır: "Onlar işğal altından olan torpaqlarımızın azad olunması üçün Ali Baş Komandan İlham Əliyevin əmrini gözləyirlər. Ötən ilin aprel ayında yaşanan hadisələr gənclərin döyüş ruhunun yüksək olduğunu bir daha sübüt etdi".
K.Qubadzadə onu da dilə gətirdi ki, Azərbaycanda gənclər siyasətinin əsası Heydər Əliyev tərəfindən qoyulub: "Onun qətiyyəti və gənclərə olan inam və etibarı nəticəsində gənclərlə dialoq yaranıb, gənclərdə özünə inam artıb, onlar dövlətin ictimai-siyasi həyatında iştiraka cəlb olunmağa başladılar. Sağlam düşüncəyə, təfəkkürə, yüksək əqidəyə malik gənclərin formalaşması Heydər Əliyevin qarşıya qoyduğu prioritet vəzifələrdən biri olub. Bu gün Azərbaycanda gənclər siyasətinin uğurla həyata keçirilməsi mərhum prezidentin uzaqgörən siyasi strategiyasının nəticəsidir".
Günel CƏLİLOVA
