Məhərrəm Zülfüqarlı: "Bu, Azərbaycan dövlət müstəqilliyini bərpa etdikdən sonra, xalqın əldə etdiyi ən böyük naliyyətdir"
Azərbaycan Ordusu ötən ilin aprel döyüşlərində erməni təxribatına layiqli cavab verərək, müəyyən əraziləri işğaldan azad etdi. Lələtəpə yüksəkliyi azad edildikdən sonra Cəbrayıl rayonunun Cocuq Mərcanlı kəndi təhlükədən sovuşdu. İndi bu kənddə bərpa prosesi gedir.
Qeyd edək ki, yanvarın 24-də Azərbaycan Prezidenti işğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında sərəncam imzalayıb.
Sərəncama əsasən, birinci mərhələdə 50 fərdi yaşayış evi, məktəb binası və müvafiq infrastruktur tikiləcək. Onu da qeyd edək ki, Cocuq Mərcanlı kəndi Cəbrayıl rayon mərkəzindən 35 km cənub-şərqdə, Araz çayının sahilində yerləşir. Kənd erməni silahlı qüvvələri tərəfindən 1993-cü ilin oktyabr ayında işğal edilib. Lakin 1994-cü ilin yanvarında Azərbaycan Ordusunun uğurlu Horadiz hərbi əməliyyatları nəticəsində azad olunub. Burada o dövrdə 283 ev təsərrüfatı olmaqla 1075 nəfər yaşayıb. Ümumi sahəsi 1605 hektar, o cümlədən 726 hektar kəndin ərazisi, 630 hektar qışlaq, 249 hektar yaylaq sahəsi olub. Kənddə orta məktəb, klub, feldşer-mama məntəqəsi, poçt, icra nümayəndəliyi fəaliyyət göstərib. Cocuq Mərcanlının hazırda 400 ailədən ibarət əhalisi respublikanın 17 müxtəlif şəhər və rayonunda müvəqqəti məskunlaşıb. Cocuq Mərcanlı kəndində yaşamaq istəyən ailələrin sayı da artmaqdadır. Məlumata görə, əslən Cocuq Mərcanlı kəndindən olmayan məcburi köçkünlər belə, ora qayıtmaq istəyirlər. Yəni maraq o dərəcədə böyükdür. Bütövlükdə bu nəyin göstəricisidir? Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu, həmin insanlarda vətənpərvərlik hisslərinin yüksək olmasından irəli gəlir: "Bu onu göstərir ki, bütün çətinliklərə rəğmən, digər işğal altında olan rayonlardan olan məcburi köçkünlər ora qayıtmaq istəyir. Bu, Azərbaycan dövlət müstəqilliyini bərpa etdikdən sonra, xalqın əldə etdiyi ən böyük nailiyyətdir. Ona görə ki, insanlar torpaq, vətən hissini itirməyiblər. Əksinə, indi də öz vətənlərinə qayıtmaq arzusundadılar. Bu, bütün Azərbaycan xalqının əldə etdiyi ən böyük nailiyyətlərdən biridir. Yaranan vəziyyət onu sübut edir ki, 20 ildən çox vaxt keçməsinə rəğmən, insanlar öz dədə-baba yurdlarına qayıtmaqda qərarlıdılar. Hansıki, bəzən beynəlxalq dairələrdə belə fikirlər səslənirdi ki, torpaqlar işğaldan azad edilsə də, paytaxtda və digər şəhərlərdə yaşayan məcburi köçkünlər həmin ərazilərə qayıtmaqda maraqlı olmayacaqlar. Ancaq məcburi köçkünlərin sərgilədiyi praktiki maraq, bütün bunları alt-üst etdi".
Vidadi ORDAHALLI
