Azərbaycan tarixən ermənilərə verilmiş torpaqlar üzərində varislik hüququnu bərpa etməlidir. Trend-in məlumatına görə, bu təkliflə Milli Məclisin deputatı, Tarix İnstitutunun direktoru Yaqub Mahmudov parlamentin dünən keçirilən iclasında çıxış edib.
Deputat bildirib ki, İrəvan da daxil olmaqla, Azərbaycan Xalq Cümhuriyyəti dövründə ermənilərə verilmiş 9 min kv.km torpağın Azərbaycan xalqına qaytarılması barədə məsələ qaldırmalıyıq.
Y.Mahmudov qeyd edib ki, 9 min kv.km torpaq ermənilərə müəyyən şərtlərlə verilmişdi: “Bu sənədləri xaricdən Tarix İnstitutuna gətirmişik. Şərtlərə əsasən, həmin torpaqlarda azərbaycanlıların yaşamağa davam etməsi təmin edilməli, Şaumyanın başçılığı altında soyqırımlara son qoyulmalı, Zəngəzur və Qarabağa qarşı iddialardan əl çəkilməli idi. Ancaq bu şərtlərin hamısı pozuldu. Ona görə də biz bu torpaqlara varislik məsələsini qaldırmalı və Milli Məclisdə bununla bağıl müvafiq addım atmalıyıq”.
Deputat Fəzail Ağamalı da həmkarının fikirlərini dəstəkləyib. O qeyd edib ki, bu, çox ciddi bir məsələdir və Milli Məclis bu məsələni müzakirəyə çıxarıb müvafiq qərar qəbul etməlidir.
Milli Məclis Ermənistandan şəhid əsgərimizin nəşini qaytarmağı tələb etdi
Milli Məclisin iclasında Ermənistandan ötən ilin sonlarında şəhid olan əsgərimiz Çingiz Qurbanovun nəşinin qaytarılması da tələb edilib. Deputat Aydın Mirzəzadə bildirib ki, Ermənistan beynəlxalq konvensiyaların tələblərinə əməl etməli və əsgərimizin nəşini Azərbaycana verməlidir: “Biz Ermənistandan Azərbaycan əsgərinin nəşini qaytarmağı tələb edirik”.
A.Mirzəzadə bildirib ki, Ermənistan nə qədər tez konstruktiv mövqeyə gəlsə, onun üçün bir o qədər yaxşı olar: “1991-ci ildə Azərbaycanın 7 milyon, Ermənistanın isə 4 milyon əhalisi var idisə, indi Ermənistanda əhalinin sayı 2 milyondur, ancaq Azərbaycanda əhalinin sayı artıq 10 milyona çatıb. Bu gün Azərbaycan regionun lider dövlətinə çevrilib, beynəlxalq və regional layihələrin təşəbbüskarı kimi çıxış edir. Ancaq Ermənistan kiçik kreditlər üçün Avropa ölkələrinin qapılarında qalıb. Biz Ermənistana öz taleyini düşünməyi məsləhət görürük. Ümid etmək istəyirəm ki, Ermənistan nəhayət, normal bir təfəkkürə qayıdacaq”.
Deputat Qənirə Paşayeva da şəhid əsgərimiz Çingiz Qurbanovun nəşinin Ermənistan tərəfindən hələ də geri qaytarılmamasına diqqət çəkib və Ermənistanın şəhid əsgərimizin nəşinin qaytarmalı olduğunu bildirib.
Əflatun Amaşov internet medianın hüquqi statusunun müəyyənləşdirilməsini yenidən qaldırdı
"Bu gün Azərbaycanda kənarda maaş, pensiya kartı ilə hər hansı məhsul alınan zaman Azərbaycan bankları tərəfindən elektron ticarət sayılaraq 18 faiz əlavə dəyər vergisi tətbiq edilir. Bu, gələcəkdə problemlərə yol açacaq”. APA-nın məlumatına görə, bunu isə Milli Məclisin iclasında millət vəkili Musa Quliyev deyib. Millət vəkili problemin aradan qaldırılması üçün qanunvericiliyə dəyişiklik təklif edib: “Yaxud Maliyyə Bazarlarına Nəzarət Palatası müvafiq normativ aktlara lazımi dəyişikliklər etməlidir ki, insanlar bu problemlə rastlaşmasınlar”.
M. Quliyev deyib ki, artıq ikinci və üçüncü qrup əlillər əmək qabiliyyətli sayılır: “Ancaq bu insanlarla tam sağlam insanların işə götürülməsi məsələsinə yanaşma eyni olmayacaq. Ona görə də əlillər üçün iş kvotası məsələsinə yenidən baxmalıyıq”.
Millət vəkili, Mətbuat Şurasının sədri Əflatun Amaşov isə internet medianın problemlərindən danışıb: "Kimsə domen və hostinq alaraq, internetdə nə istəyir, yazır. Bunlarla əlaqədar məhkəmə müstəvisində addım atmaq çətindir. Gərək, söz azadlığı çərçivəsini aşmasınlar. Ona görə də internet medianın hüquqi statusunu müəyyənləşdirmək lazımdır. Digər tərəfdən, onlayn mediaya dövlət tərəfindən maliyyə yardımının ayrılması yaxşı olar”.
“Azərbaycan Dağlıq Qarabağa getmək istəyən xarici ölkə vətəndaşlarının səfərini təşkil etməlidir”
“Azərbaycan Lapşin adlı bloqgerin ölkəyə ekstradisiyası haqqında məsələ qaldırıb. Belarus məhkəməsi də bununla bağlı müvafiq qərar verib. Bu qərar Azərbaycan sərhədlərini pozaraq Dağlıq Qarabağ getməyin hüquqi nəticələr doğurduğu barədə xarici dövlətlərin vətəndaşlarına bir xəbərdarlıqdır”. Bu sözləri isə millət vəkili Zahid Oruc deyib. O bildirib ki, Azərbaycan Dağlıq Qarabağa getmək istəyən xarici ölkə vətəndaşlarının səfərini təşkil etməlidir: “Ermənilər onları təmas xəttindən Qarabağa buraxmayanda o insanlar məhz Ermənistandan narazı qalacaq”.
Z. Oruc Qafqaz Universiteti və digər universitetlərin bağlanmasına da toxunub: “Kimsə deyə bilər ki, tələbələrin köçürüldüyü ali məktəblər daha prestijlidir. Ancaq vətəndaşların bu sahədə problemləri məhkəmə müstəvisinə çıxarmaq imkanı olmalıdır. Bunun üçün “Ali təhsil haqqında” qanun qəbul edilməlidir”.
Z. Oruc Azərbaycanın beynəlxalq səviyyədə maraqlarını qorumaq üçün dövlət büdcəsində xüsusi büdcə ayırmasını da təklif edib: “ABŞ Azərbaycanda UNİCEF-in xətti ilə 12 milyon dollar xərcləyib. Biz beynəlxalq maraqlarımızı qorumaq üçün müstəqil dövlət kimi bu barədə qərar verməliyik”.
Özəlləşdirmə çeklərinin yenidən tədavülə cəlb edilməsi təklifi...
Milli Məclisdə özəlləşdirmə çeklərinin yenidən tədavülə cəlb edilməsi də təklif olunub. Bu təkliflə Zahid Oruc çıxış edib. Z. Oruc deyib ki, Azərbaycanda hazırda çoxu sayda müəssisələr özəlləşdirməyə çıxarılır: “Keçmişdə əhaliyə verilən özəlləşdirmə çekləri ilə bağlı məsələyə qayıtmalıyıq. Özəlləşdirmə çekləri yenidən tədavülə buraxılmalıdır”.
Millət vəkili Vahid Əhmədov strateji yol xəritələrinin qəbul edilməsinin əhəmiyyətindən danışıb: “Hesablama Palatası haqqında qanunun qəbulu zəruridir. Azərbaycanda rüşvət və korrupsiyanın aradan qaldırılmasını istəyiriksə, “Maliyyə nəzarəti haqqında” qanunu qəbul etməliyik. Artıq bir neçə ildir ki, bu qanunu qəbul edə bilmirik. Xahiş edirəm ki, bu qanun gündəliyə salınsın. Digər məsələ Rəqabət Məcəlləsi ilə bağlıdır. Bu qanun layihəsi iki oxunuşda parlamentdə qəbul edilib. Amma sonra bu qanun layihəsi hara getdi, üçüncü oxunuşa çıxarılmadı, səbəbi bilinmir. Niyə Rəqabət Məcəlləsini qəbul etmək istəmirik?”
Spiker Oqtay Əsədov “Hesablama Palatası haqqında” qanun layihəsinin hazır olduğunu və gündəmə salınacağını bildirib: “Rəqabət Məcəlləsi iki dəfə müzakirə olunub və qəbul edilib. Üçüncü oxunuşa gəlincə, qanuni layihəsinin təşəbbüskarı var. 2008-ci ilə yaranan böhrandan sonra yeni tələblərə uyğun olaraq qanun layihəsi üzərində yenidən işləməyə ehtiyac yaranıb. “Maliyyə nəzarəti haqqında” qanun üzərində də isə iş gedir”.
“Kimin əmlakı sökülübsə, əvəzi verilib”
“XXI əsrdə kiminsə obyektini söküb, mülkiyyət hüququnu pozmaq nə deməkdir? Biz mülkiyyət hüquqlarının qorunması ilə bağlı qanunlar qəbul etmişik. Belə hallar barədə mətbuatda yer alan məlumatlara müvafiq nazirliklər reaksiya verməlidir”. Bunu isə millət vəkili Qüdrət Həsənquliyev söyləyib. Millət vəkili qeyd edib ki, mülkiyyət hüquqlarının pozulması barədə məsələlərə həssas yanaşılmalıdır.
Spiker Oqtay Əsədov isə əmlakları sökülən insanların məhkəməyə müraciət etməsi faktının qeydə alınmadığını bildirib: “Kimin əmlakı sökülübsə, əvəzi verilib. Jurnalistlərin bu barədə yazdıqlarına fikir verməyin”.
Baki-xeber.com
