İstanbul Prokurorluğu Türkiyədə, eləcə də ölkədən kənarda Fəthullah Gülən hərəkatı ideyalarının təbliği ilə məşğul olan ali təhsil ocaqlarının siyahısını açıqlayıb.
Trend-in Türkiyənin "Hurriyyət" qəzetinə istinadən verdiyi məlumata görə, həmin siyahıya Azərbaycanda bir müddət öncə ləğv olunmuş Qafqaz Universitetinin də adı salınıb.
Bundan başqa, həmin siyahıda İraq, Bosniya və Herseqovina, Rumıniya, Qırğızıstan, Qazaxıstan, Türkmənistan və başqa ölkələrdə fəaliyyət göstərən ali təhsil müəssisələrinin də adları yer alıb.
Bu arada Təhsil Nazirliyində növbədənkənar kollegiya iclasında Qafqaz Universitetinin ləğvetmə komissiyasının təqdim etdiyi təkliflər əsasında tələbə kontingentinin digər universitetlərdə yerləşdirilməsi məsələsi müzakirə olunub.
Təhsil Nazirliyindən verilən məlumata görə, müzakirələr nəticəsində irəli sürülmüş bir neçə təklif arasında qış imtahan sessiyasından sonra bütün tələbələrin bir universitetdə - Azərbaycan Respublikası Prezidentinin 2016-cı il 8 noyabr tarixli sərəncamı ilə dövlət universiteti statusunda yaradılmış Bakı Mühəndislik Universitetində öz ixtisasları üzrə yerləşdirilməsi variantı qəbul edilib.
Qərarda, həmçinin tələbələrin təhsil aldıqları tədris dilinin saxlanılması da vurğulanır.
Sözügedən təklifin qəbul olunması zamanı Qafqaz Universitetinin təsisçisi - Azərbaycan Beynəlxalq Təhsil Kompleksinin Azərbaycan Hökumətinə və Təhsil Nazirliyinə universitetin ləğvindən sonra qalan tədris kompleksinin bütün əmlakının dövlət nəfinə qəbul edilməsi və onun təhsil məqsədləri üçün istifadə olunması barədə müraciəti nəzərə alınıb.
Təhsil Nazirliyinin Kollegiyasının qəbul etdiyi qərarda digər ali təhsil müəssisələrində təhsillərini davam etdirmək istəyən tələbələrin müraciətlərinə yay tətili zamanı baxılacağı da qeyd olunur.
