Üzeyir Cəfərov: "Bu da sırf iqtisadi amilə bağlı olan məsələdir"
Abşeron rayonunun Pirəkəşkül qəsəbəsində "N" saylı hərbi hissənin yeni hərbi şəhərciyinin açılışı zamanı Prezident İlham Əliyev öz nitqində orduda Zakir Həsənovdan əvvəlki dövrdə hökm sürən vəziyyətdən də danışıb. Prezident həmin vəziyyəti "çox acınacaqlı" adlandırıb.
Azərbaycan Ordusunda Səfər Əbiyevin dövrü haqda danışan Prezident çıxışında deyib: "Bizim hərbi hissələrimizin vəziyyəti bir neçə il bundan əvvəl tam fərqli idi. Mən xüsusi göstəriş vermişdim ki, bu vəziyyət təhlil edilsin, mənə məruzə olunsun və tədbirlər görülsün. Yadımdadır, bir neçə il bundan əvvəl müxtəlif bölgələrimizdə yerləşən hərbi hissələrin fotoşəkilləri mənə təqdim ediləndə, əlbəttə ki, mənzərə çox acınacaqlı idi. Yarıdağılmış binalar, yararsız vəziyyətdə olan kazarmalar. Ordumuzun ərzaq təminatı çox aşağı səviyyədə idi. Ona görə dərhal göstəriş verdim və bu sahədə köklü dəyişikliklər baş verdi. Bu gün Müdafiə Nazirliyinin rəhbərləri bütün bu işləri yüksək səviyyədə təmin edirlər. Yəni bu gün həm təminat, həm xidmət baxımından Azərbaycan Ordusu dünyada nümunəvi ordular sırasındadır".
Prezidentin ordunun vəziyyətilə bağlı zaman baxımından apardığı paralellərdən hansı nəticəni hasil etmək olar?
Hərbi ekspert Üzeyir Cəfərov qəzetimizə açıqlamasında bildirdi ki, ölkə başçısının fikri ətrafında müəyyən qeyri-dəqiq mülahizələrin irəli sürülməsinin tərəfdarı deyil: "Bəzi jurnalistlər bundan belə nəticə çıxarıblar ki, bütün ittihamlar həmin dövr orduya rəhbərlik edənlərin şəxsinə yönəlib. Hətta bəziləri Səfər Əbiyevin həbs ediləcəyilə bağlı qənaətlərini dilə gətirib. Mənim qənaətim fərqlidir. Çünki belə olsaydı, Prezident konkret olaraq ad çəkərdi. Hesab edirəm ki, İlham Əliyev fərqli zaman kəsiklərində ordunun vəziyyəti ilə bağlı fikir bildirib. Doğrudan da bizim ordunun indiki təminatı ilə 10 il əvvəlki arasında fərq var. Prezident bu təzadı düz vurğulayıb. Bu da sırf iqtisadi amilə bağlı olan məsələdir. Orduya rəhbərlik edən keçmiş komandadan indiki nazirlə də işləyən yüksək vəzifəli hərbçilər var. Ona görə də ölkə başçısının fikirlərini hansısa şəxslərə deyil, ordunun fərqli zamanlardakı vəziyyətinə verilən qiymət kimi səciyyələndirmək lazımdır".
Məhəmmədəli QƏRİBLİ
