Vahan Martirosyan: “Ermənistanda hakimiyyətin dəyişməsi Dağlıq Qarabağ münaqişəsinin tənzimlənməsini sürətləndirə bilər”
"Mən dünən Sumqayıtda yaşayan erməni ailə görüşdüm. Mən soruşdum ki, hər hansı problemlə üzləşiblərmi. Ailə üzvlərindən biri dedi ki, məktəbdə işləyir, hər hansı problemlə üzləşməyib".
APA-nın məlumatına görə, bunu bu gün Bakıda keçirilən mətbuat konfransında "Ermənistan, Azərbaycan, Dağlıq Qarabağ münaqişəsi: əsas maneələr və nizamlama perspektivləri: Ermənistan və Azərbaycandan baxış" beynəlxalq konfransın iştirakçısı, Ermənistanın “Milli Azadlıq Hərəkatı” təşkilatının rəhbəri Vahan Martirosyan bildirib.
V. Martirosyan Serj Sarkisyan rejiminin azərbaycanlılarla ermənilərin birgə yaşaya bilməyəcəyi barədə apardığı faşist təbliğatının əsassız olduğunu vurğulayıb: "Dağlıq Qarabağ münaqişəsi həll olunan anda Serj Sarkisyan rejiminin ömrü başa çatacaq".
“Ermənistanda hakimiyyətin dəyişməsi Dağlıq Qarabağ münaqişəsinin tənzimlənməsini sürətləndirə bilər”
V.Martirosyan deyib ki, Ermənistanda hakimiyyətin dəyişməsi Ermənistan-Azərbaycan, Dağlıq Qarabağ münaqişəsinin tənzimlənməsini sürətləndirə bilər (Trend). Lakin o qeyd edib ki, xalq caxnaşmaları, çevriliş olmadan Ermənistanın indiki hakimiyyəti heç vaxt postu tərk etməyəcək.
Erməni hüquq müdafiəçisi deyib: "Onların başında duran sahibləri var. Məlum deyil, sahibləri hakimiyyətin dəyişməsinə imkan verəcəklər, ya yox. Mən şübhə edirəm".
Onun sözlərinə görə, Dağlıq Qarabağa muxtariyyət verilməsi məsələnin ən müdrik həll yoludur.
V.Martirosyan deyib: "Heç kəs erməniləri oradan çıxarmağa hazırlaşmır. Vaxt keçdikcə iki xalq orada birlikdə sülh şəraitində yaşayacaq. İndi o torpaqlar boşdu, yuzlərlə insan ölür. Dağlıq Qarabağ ətrafında 7 rayon dərhal Azərbaycana qaytarılmalıdır".
O qeyd edib ki, nə vaxtsa Ermənistanın eks-prezidenti Robert Köçəryan deyib ki, azərbaycanlılar və ermənilər genetik cəhətdən bir-birlərinə uyğun deyillər: "Dünən biz jurnalistlərin iştirakı olmadan burada yaşayan bir erməni ailəsində qonaq olduq. Soruşduq, onların burada ümumiyyətlə heç bir problemi yoxdur. Sənədlərində də erməni ad və soyadları yazılıb. Təəssüf ki, Ermənistanda belə bir hala rast gəlmək mümkün deyil".
Erməni hüquq müdafiəçisi deyib ki, xaricdə yaşayan hər iki xalqın diaspor nümayəndələri bütün düyaya sübut ediblər ki, bir yerdə sülh şəraitində yaşaya bilirlər.
"Sarkisyan erməni xalqına qarşı soyqırımı həyata keçirib"
"Artıq münaqişənin sülh yolu ilə həllinin zamanı çatıb". Bunu isə Bakıda keçirilən mətbuat konfransında "Ermənistan, Azərbaycan, Dağlıq Qarabağ münaqişəsi: əsas maneələr və nizamlama perspektivləri: Ermənistan və Azərbaycandan baxış" adlı beynəlxalq konfransın iştirakçısı, "Meridian" Qeyri-Hökumət Təşkilatının sədr müavini, hüquq müdafiəçisi Suzanna Çaqinyan bildirib.
S. Çaqinyan deyib ki, Qarabağda erməni və azərbaycanlı gənclərin ölməsi faciədir: "Mən Azərbaycan Prezidentinə təşəkkür edirəm. Nəhayət, bu münaqişəyə son qoyulsun. Mən bilirəm ki, Ermənistan hakimiyyəti bu münaqişənin həllini istəmir. Serj Sarkisyan istefa verməlidir. Mənim bu gün burada olmağım Serj Sarkisyanın siyasəti ilə əlaqədardır. Serj Sarkisyan erməni xalqını talan edir. O, prezident yox, işğalçıdır. Serj Sarkisyan erməni xalqına qarşı soyqırımı həyata keçirib".
S. Çaqinyan qeyd edib ki, Sarkisyan onun öldürülməsinə qərar verib: "Mən Ermənistanda hüquqların tapdanmasına qarşı mübarizə aparmışam. Mən izlənirdim. Onlar məni terrorçuluqda belə günahlandırırdılar. Mən bu gün ölüyəm, Ermənistanı tərk etmişəm. Əgər onlar məni həbs edib, məni terrorçu kimi mühakimə etsəydilər, mən ölü olardım. Mən mütəxəssis kimi illərdir ki, ölkəmdə iş tapmamışam. Ermənistanda bütün xalq mənim kimi yaşayır. Hakimiyyət zəbt edilib. Mənim vətəndaşlıqdan imtina barədə Azərbaycan mətbuatında məktubum dərc olunandan sonra Serj Sarkisyan ölümüm barədə qərar vermişdi”.
"Qarabağ münaqişəsi erməni xalqına, Qarabağ ermənilərinə faciə gətirib”
O deyib ki, Ermənistanda hakimiyyəti zəbt etmiş Serj Sarkisyan rejiminə qarşı mübarizə aparan hər kəs təzyiqlərlə üz-üzə qalıb.
O deyib ki, Sarkisyan rejimi münaqişənin həllində maraqlı deyil: "Serj Sarkisyana belə vəziyyət sərf edir. Dağlıq Qarabağ münaqişəsi erməni xalqına, Dağlıq Qarabağda yaşayan ermənilərə faciə və göz yaşları gətirib, bundan başqa heç nə bəxş etməyib. Yalnız Serj Sarkisyan kimilər bundan istifadə edərək hakimiyyəti ələ keçiriblər".
"Sarkisyanla Köçəryan kimilər mühakimə olunmasa, 20 ildən sonra erməni xalqı qalmayacaq"
Çaqinyan bildirib ki, Ermənistanda Qarabağ münaqişəsinin sülh yolu ilə həllini arzulayan insanlar çoxdur. S. Çaqinyan deyib ki, əgər Serj Sarkisyan və Robert Köçəryan kimilər mühakimə olunmasa, 20 ildən sonra erməni xalqı qalmayacaq: "Haaqa tribunalı da onlar üçün azdır".
Hüquq müdafiəçisi Ermənistana qayıdacağını da vurğulayıb: "Ermənistan mənim vətənimdir, işğalçılarla mübarizə aparmaq üçün mütləq Ermənistana qayıdacağam".
Erməni hüquq müdafiəçisi Xocalı abidəsini ziyarət edəcək
Daha sonra erməni fəal deyib ki, sabah Xocalı soyqırımı qurbanlarının xatirəsinə ehtiram əlaməti olaraq Memorial Kompleksi ziyarət edəcək: “Mənim bu cür faciələrə münasibətim birmənalıdır - mən bu əməli edənləri qınayıram. Öz xalqım adından Azərbaycan xalqından üzr istəyirəm”.
Erməni yazıçı Bakıda kitabının təqdimatını keçirmək istəyir
"Mən ermənilərlə azərbaycanlıların münasibətlərinə dair kitab yazıram, tamamlamaq üzrəyəm. Kitab yaxın vaxtlarda dərc olunacaq". Bunu isə erməni publisist, yazıçı və ictimai xadim Vahe Avetyan bildirib.
V. Avetyan deyib ki, bu kitabın təqdimatının Bakıda keçirilməsini nəzərdə tutub: "Bu kitabın satışından əldə ediləcək vəsait azərbaycanlı və erməni qaçqınlara yardıma sərf olunacaq".
Erməni yazıçı hər bir ölkə kimi beynəlxalq hüquqa əsasən Azərbaycanın da ərazi bütövlüyünə hörmətlə yanaşılmalı olduğunu vurğulayıb: "Mən normal şərait yaranan zaman Ermənistana qayıdaraq prezidentliyə namizədliyimi irəli sürmək niyyətindəyəm. Əgər növbəti prezident seçkilərində iştirak etməsəm, deməli, Serj Sarkisyan rejimi yaşayır".
