Yadigar Məmmədli: "Təəssüflər olsun ki, bəzi hallarda dünyanın aparıcı xəbər agentlikləri buna alət olur və..."
Xəbər verildiyi kimi, Azərbaycan noyabrın 16-18-də nüfuzlu beynəlxalq media qurumlarının toplantılarına - Dünya Xəbər Agentliklərinin V Konqresinə, Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyasına və MDB Dövlət İnformasiya Agentlikləri Rəhbərləri Şurasının (İnformşura) XXII iclasına ev sahibliyi edəcək.
Heydər Əliyev Fondunun və AZƏRTAC-ın birgə təşkilatçılığı ilə keçiriləcək tədbirlərə dünyanın informasiya siyasətinin əsas istiqamətlərini müəyyənləşdirən 100-dən çox xəbər agentliyinin rəhbərləri və təmsilçiləri, media üzrə beynəlxalq ekspertlər, BMT və UNESCO-nun vəzifəli şəxsləri, həmçinin regional media qurumlarının nümayəndələri dəvət olunub.
Sessiyalarda beynəlxalq media qurumlarının - Dünya Konqresinin, OANA-nın, EANA-nın, FANA-nın prezidentləri, "Associated Press", "Reuters", "Xinhua", "Anadolu", TASS, "France Press" və digər aparıcı media şirkətlərinin mütəxəssisləri məruzələrlə çıxış edəcək. Həmçinin bir sıra mövzularda müzakirələr aparılacaq.
Qeyd edək ki, Dünya Xəbər Agentlikləri Konqresi Rusiyanın TASS agentliyinin təşəbbüsü ilə ilk dəfə 2004-cü il sentyabrın 24-25-də Moskva şəhərində keçirilib.
O da məlumdur ki, zaman-zaman dünyanın bir sıra tanınmış media orqanları hansısa mühüm tədbirlərin keçirilməsi vaxtı və yaxud da buna bənzər hallarda Azərbaycana münasibətdə qərəzli mövqedən çıxış edib. Bu da ictimaiyyətdə haqlı narazılığa səbəb olub. Sözügedən mövzuda tədbirdə müzakirələrin aparılmasına ekspertlər necə baxır?
Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, prinsipcə, bu mümkündür: "Çünki beynəlxalq tədbirlərin keçirildiyi ərəfələrdə Azərbaycanı istəməyən qruplar, təşkilatlar fəallaşır. Nəticədə ölkəyə qarşı qarayaxma kampaniyasına başlayırlar. Təəssüflər olsun ki, bəzi hallarda dünyanın aparıcı xəbər agentlikləri buna alət olur və obyektivlikdən uzaq olan məlumatları tirajlayır. Bu minvalla Azərbaycan barəsində yanlış rəy formalaşdırmağa çalışırlar. Guya ölkədə demokratiya, insan hüquqları pozulur və s. Təəssüflər olsun ki, bu xoşəgəlməz tendensiya, bir növ, adi hal alıb. Çünki dəfələrlə müxtəlif formada təkrarlanır. Baxmayaraq ki, Azərbaycan həm beynəlxalq tədbirlərə yüksək səviyyədə ev sahibliyi edir, həm də beynəlxalq öhdəlikləri yerinə yetirir. O baxımdan hesab edirəm ki, sözügedən məsələ ilə bağlı müzakirələrin aparılmasına ehtiyac var. Bu yöndə müzakirə müsbət səmərə verə bilər".
Vidadi ORDAHALLI
