Zahid Oruc: "Milli Məclis bundan sonra Azərbaycanda hərbi vəziyyəti 72 saata yox, 48 saata elan edəcək"
Azərbaycanda "Hərbi vəziyyət haqqında" yeni qanun layihəsi hazırlanıb. Bununla bağlı Milli Məclisdən mətbuata verilən məlumata görə, yeni qanun layihəsi Müdafiə, təhlükəsizlik və korrupsiya ilə mübarizə komitəsinin iclasında müzakirəyə çıxarılacaq. Yenidən hazırlanan layihədə Azərbaycanda hərbi vəziyyətin elan olunmasının qaydaları və şərtləri, hərbi vəziyyət və bundan irəli gələn məsələlər əksini tapıb.
Qeyd edək ki, hazırda qüvvədə olan "Hərbi vəziyyət haqqında" Qanun 1994-cü ildə qəbul olunub.
Məlumat üçün qeyd edək ki, "Hərbi vəziyyət haqqında" Qanuna 2014-cü ilin sonlarında bəzi dəyişikliklər edilmişdi. Belə ki, Azərbaycan Respublikası Silahlı Qüvvələrinin təcavüzkar dövlətin silahlı qüvvələri və ya qanunsuz silahlı birləşmələrlə təmas xəttinə bitişik ərazilər anlayışı ilk dəfə olaraq qanunvericiliyə əlavə edilib. Digər əlavələr "Hərbi vəziyyət rejiminin təmin edilməsinə yönəlmiş tədbirlər və müvəqqəti məhdudiyyətlər" maddəsində öz əksini tapıb.
Bütün bu deyilənlərin fonunda "Hərbi vəziyyət haqqında" yeni qanun layihəsi hazırlanmasına nə dərəcədə ehtiyac var? Bunu millət vəkilləri nə ilə əlaqələndirir?
Sözügedən məsələyə aydınlıq gətirən millət vəkili, Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Zahid Oruc bunu bir sıra amillərlə əlaqələndirdi. Onun sözlərinə görə, hərbi vəziyyətin parlament tərəfindən elan olunması vaxtı 3 sutkadan 2 sutkaya endirilir: "Milli Məclis bundan sonra Azərbaycanda hərbi vəziyyəti 72 saata yox, 48 saata elan edəcək. Yeni qanun layihəsinə əsasən, hərbi vəziyyətin elan olunması zərurətini hiss etdikdə mütləq bununla bağlı parlamentə müvafiq qanunvericilik təşəbbüsü ilə müraciət edilir.
Hərbi vəziyyətin elan olunması ilə bağlı yeni qanun layihəsinə görə, dövlətin bütün resursları, Silahlı Qüvvələr, iqtisadi qurumlar və digər strateji dövlət orqanlarının hamısı düşmənlə mübarizəyə səfərbər olunacaq. Yeni qanunla hərbi vəziyyətin əsas tələbləri budur.
Sənəddə əksini tapan 2-ci əsas məsələ isə dövlət sirləri ilə bağlıdır. Artıq bundan sonra cəbhə xəttində baş verən hərbi əməliyyatlar zamanı, xüsusi hərbi vəziyyət şəraitində tankın, topun, disklokasiya ərazilərinin şəklinin çəkilməsinə qanunvericilik çərçivəsində müəyyən məhdudiyyətlər qoyulacaq. Yəni 2014-cü ilin yay aylarında olduğu kimi, təmas xəttindən, cəbhə bölgəsindən kim necə gəldi məlumat, şəkil və video çəkib paylaşa bilməyəcək. Belə dövlət sirlərini yaymağa görə cinayət məsuliyyətinə cəlb olunacaqlar. Bu müddəalar yeni qanun layihəsinə daxil edilib. Artıq yeni qanunla dövlət sirləri, hərbi vəziyyət elan olunan gündən media və mətbuatın işi də müəyyən edilir".
Vidadi ORDAHALLI
