Yadigar Məmmədli: "Bir belə jurnalistin ora getməsi, orada qalması, yerindəcə görülən işlərlə tanış olması..."
Ölkənin 20-dək aparıcı kütləvi informasiya vasitəsinin rəhbəri Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşkilatçılığı ilə oktyabrın 14-15-də Naxçıvan Muxtar Respublikasına səfər edib.
Səfər çərçivəsində Fondun təşkilatçılığı ilə "Mərkəzi və yerli icra hakimiyyəti orqanları ilə kütləvi informasiya vasitələri arasında əməkdaşlığın genişləndirilməsi" mövzusunda regional konfrans keçirilib.
2 günlük səfər çərçivəsində Bakıdan gedən 20 nəfərlik nümayəndə heyətinin Naxçıvan Mətbuat Şurası və digər media orqanları ilə görüşü, birgə tədbiri keçirilib. Naxçıvandakı mədəni-tarixi abidələr ziyarət olunub. Nümayəndə heyəti Naxçıvanda medianın vəziyyəti ilə maraqlanıb, iş prinsipi ilə tanış olub.
Nümayəndə heyətinin tərkibində KİVDF-nin icraçı direktoru Vüqar Səfəli, Mətbuat Şurasının üzvü, millət vəkili Aqil Abbas, "APA Holdinq"in prezidenti Vüsalə Mahirqızı, "Trend" İnformasiya Agentliyinin baş redaktoru Arzu Nağıyev, "Xalq qəzeti"nin baş redaktoru Həsən Həsənov, "Yeni Müsavat" qəzetinin baş redaktoru Rauf Arifoğlu, "Bakı-Xəbər" qəzetinin baş redaktoru Aydın Quliyev, "525-ci qəzet"in baş redaktoru Rəşad Məcid, "Şərq" qəzetinin baş redaktoru Akif Aşırlı, "İki sahil" qəzetinin baş redaktoru Vüqar Rəhimzadə, "Olaylar" İnformasiya Agentliyinin baş redaktoru Yunus Oğuz, "Xalq Cəbhəsi" qəzetinin baş redaktoru Elçin Mirzəbəyli və digər mətbuat təmsilçiləri olub.
Bütövlükdə media kapitanlarının sözügedən səfəri Naxçıvanın tanıdılması, orada görülən işlər və digər məsələlərlə bağlı daha da obyektiv məlumatların yayılması baxımından nə kimi əhəmiyyət kəsb edir?
Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, KİV rəhbərlərinin məlum Naxçıvan səfəri mühüm əhəmiyyət kəsb edir: "Bu, media və dövlət qurumları arasında münasibətlərin tənzimlənməsinə və inkişaf etdirilməsinə xidmət edən bir tədbirdir. Bu səpkili bir sıra tədbirlər keçirilib. Ancaq media təmsilçilərinin Naxçıvan səfəri isə xüsusi əhəmiyyət kəsb edir. İlk dəfə idi ki, Naxçıvanda bu cür mötəbər tədbir keçirilirdi. Təbii ki, bir belə KİV rəhbərinin Naxçıvana səfər etməsi, orada konfrans keçirməsi, yerli jurnalistlərlə müzakirələr aparması təqdirəlayiq haldır. Həm də nəzərə almaq lazımdır ki, Naxçıvan bədnam ermənilərin işğalçılıq siyasəti üzündən blokada şəraitindədir və ora gedib-gəlmək o qədər də rahat deyil. Adətən belə səfərlər əsasən təyyarə ilə mümkün olur. Bu baxımdan bir belə jurnalistin ora getməsi, orada qalması, yerindəcə görülən işlərlə tanış olması Naxçıvanın tanıdılması baxımından mühüm əhəmiyyət kəsb edəcək".
Vidadi ORDAHALLI
