Oktyabrın 14-də Dağıstan Respublikasının Milli Siyasət Nazirliyinin təşkilatçılığı ilə Mahaçqala şəhərində Dostluq Evində tarix üzrə fəlsəfə doktoru, professor Vidadi Muradovun və REA-nın Dağıstan Elmi Mərkəzinin əməkdaşı, tarix elmləri doktoru, professor Məhəmmədxan Məhəmmədxanovun müəllifi olduqları “Dərbənd xalçaçılığı” monoqrafiyasının təqdimatı keçirilib.
Baki-xeber.com-a “Azərilmə” dən verilən xəbərə görə, tədbirdən öncə iştirakçılar görkəmli siyasi-ictimai xadim Əziz Əliyevin Mahaçqala şəhərində ucaldılmış abidəsinin önünə gül dəstələri qoyub.
Tədbirdə Dağıstan Respublikasının Baş nazirinin birinci müavini Anatoliy Karibov, Milli Siyasət naziri Tatyana Qamaley, Mədəniyyət naziri Zarema Butayeva, müxtəlif nazirliklərin və idarələrin, ictimai təşkilatların nümayəndələri, bələdiyyələrin rəhbərləri, mədəniyyət və incəsənət, elm xadimləri, KİV, həmçinin Azərbaycan Milli Elmlər Akademiyasının müxtəlif sahə institutlarının alimlərindən ibarət nümayəndə heyəti iştirak edib.
Giriş sözü ilə çıxış edən xanım Tatyana Qamaley qeyd edib ki, bu qəbildən olan, yüksək elmi və poliqrafik səviyyədə həyata keçirilən böyük miqyaslı müştərək layihələr, şübhəsiz ki, xalqlarımız üçün mühüm əhəmiyyət kəsb edən hadisədir. Anatoliy Karibov monoqrafiyanın müəlliflərini təbrik edərək əmin olduğunu bildirib ki, “Dərbənd xalçaçılığı” layihəsi Azərbaycan və Dağıstan xalçaçılarının, tədqiqatçılarının, tarixçi və etnoqraflarının gələcək əməkdaşlığına təkan olacaq, Dağıstanda xalq sənətkarlıq sahələrinin və etnoturizmin inkişafına kömək edəcək. Xanım Zarema Butayeva monoqrafiya müəlliflərinə Dağıstan Respublikasının Mədəniyyət Nazirliyi adından təşəkkür məktubları təqdim edərək qeyd edib ki, “Xalça - xalqların tarixini və mədəniyyətini özündə əks etdirən xüsusi işarələr və simvollar dünyasıdır. “Mənim üçün bu kitabda Rusiya və Azərbaycan muzeylərində qorunan xalçaçılıq sənətinin ən gözəl nümunələrinin təqdim olunması xüsusilə maraqlıdır”- o deyib.
Dağıstan Milli siyasət nazirinin müavini, Dostluq Evinin direktoru Təkrar Əhmədov, Rusiya Elmlər Akademiyası Dağıstan Elmi Mərkəzinin sədr əvəzi, tarix elmləri doktoru Murtuzəli Hacıyev, DEM-in Tarix, Arxeologiya və Etnoqrafiya İnstitutunun direktoru, tarix elmləri namizədi Maxaç Musayev, AMEA Tarix İnstitutunun “Ümumi tarix” şöbəsinin müdiri, tarix elmləri doktoru Tofiq Mustafazadə, Arxeologiya və Etnoqrafiya İnstitutunun əməkdaşı, tarix üzrə fəlsəfə doktoru Qoşqar Qoşqarlı, Nizami adına Ədəbiyyat İnstitutunun “İctimaiyyətlə əlaqələr və beynəlxalq əlaqələr” şöbəsinin müdiri, sosiologiya üzrə ictimai elmlər doktoru Samir Səttarov və digərləri öz çıxışlarında “Dərbənd xalçaçılığı” monoqrafiyasının ictimai, elmi və mədəni əhəmiyyətindən danışıb. Professor Vidadi Muradov bu elmi fundamental elmi layihənin həyata keçirilməsində Dağıstan Respublikasının hökumətinə elmi və mədəni ictimaiyyətinin nümayəndələrinə, ziyalılarına minnətdarlığını bildirərək qeyd edib ki, “Xalça toxunduğu evə, ailəyə xoşbəxtlik gətirir. Bu xalça - Rusiya və Azərbaycan alimlərinin birgə əməyinin nəticəsi olan “Dərbənd xalçaçılığı” monoqrafiyası ölkələrimizə və xalqlarımıza sülh və əminamanlıq gətirsin”.
Qeyd edək ki, “Dərbənd xalçaçılığı” əsəri Azərbaycan Milli Elmlər Akademiyası, “Azər-İlmə” Xalçaçılıq Mərkəzi və Rusiya Elmlər Akademiyasının Dağıstan Elmi Mərkəzinin Tarix, Arxeologiya və Etnoqrafiya İnstitutunun birgə həyata keçirdiyi fundamental elmi layihə əsasında işıq üzü görüb.
