Ölkənin 20-dək aparıcı Kütləvi İnformasiya Vasitəsinin rəhbəri Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşkilatçılığı ilə Naxçıvan Muxtar Respublikasına səfər edib.
Movqe.az-ın məlumatına görə, səfər çərçivəsində, Naxçıvan Texniki Kollecində Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşkilatçılığı ilə“Mərkəzi və yerli icra hakimiyyəti orqanları ilə kütləvi informasiya vasitələri arasında əməkdaşlığın genişləndirilməsi” mövzusunda regional konfrans keçirilir. Tədbirdə Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin Rəhman Məmmədov, KİVDF-nin icraçı direktoru Vüqar Səfərli, deputat Aqil Abbas, ölkənin aparıcı Kütləvi İnformasiya Vasitələrinin rəhbərləri, yerli icra hakimiyyəti orqanlarının rəhbərləri,şəhər ictimaiyyətinin nümayəndələri, yerli nəşrlərin baş redaktorları, iştirak edir. Qonaqları salamlayan Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin Rəhman Məmmədov Naxçıvanda bu konfransın keçirilməsinin əhəmiyyətini vurğulayaraq, dövlət KİV münasibətlərindən söz açıb. R. Məmmədov bildirib ki, Ulu öndər hakimiyyətə gəldikdən sonra dövlətin mediaya münasibəti müsbət mənada dəyişərək, KİV-lərə dövlət qayğısı artıb: "Ulu öndər ilk müsahibəsini Naxçıvana qayıtdıqdan sonra "Şərq qapısı " qəzetinə verib. R. Məmmədov Naxçıvanda fəaliyyət göstərən yerli KİV-lər haqqında da məlumat verib: "Muxtar Respublikamızda 1 muxtar respublika qəzeti, 8 şəhər və rayon qəzeti, 4 jurnal, universitet televiziya və radiosu da daxil olmaqla 3 televiziya, 3 radio və 6 nəşriyyat var.Muxtar respublikanın bütün rayonlarında fəlaiyyət göstərən mətbuat orqanlarına normal iş şərait yaradılıb, onların maddi-texniki bazası gücləndirilib. "Şərq qapısı" qəzet redaksiyası, "Əcəmi" Nəşriyyat-Poliqrafiya Birliyi yeni bina və avadanlıqlarla təmin edilib. "Əcəmi" Nəşriyyat-Poliqrafiya Birliyində quraşdırılan müasir çap avadanlıqları hesabına artıq muxtar respublikada işıq üzü görən bütün qəzet və jurnallar tam rəngli, yüksək poliqrafik keyfiyyətlə nəşr olunur. Naxçıvan Dövlət Universitetində "Jurnalistika" kafedrası fəaliyyət göstərir. Həmçinin buradakı "Universitet televiziyası" və "Nuhçıxan" radiosunda gənc jurnalistlər nəzəri biliklərə yiyələnirlər. Muxtar respublikanın nazirlik, komitə və agentliklərində mətbuat xidmətləri fəaliyyət göstərir. Onlar mətbuatla sıx əməkdaşlıq edirlər".
Daha sonra çıxış üçün söz KİVDF-nin icraçı direktoru Vüqar Səfərliyə verilib. V. Səfərli Naxçıvanın inkişafının göz qabağında olduğunu, ilk dəfə 20 nəfərlik media heyyətinin Naxçıvanda belə böyük konfrans keçirdiyini, media rəhbərlərinin bu tədbirə qatıldıqlarını söyləyib. V. Səfərli ümummilli lider Heydər Əliyevin hakimiyyətinin ilk illərindən başlayaraq ölkədə kütləvi informasiya vasitələrinin inkişafı və mətbuat azadlığının təmin olunması istiqamətində gördüyü mühüm işlərdən danışıb, bu siyasətin hazırda Azərbaycan Respublikasının Prezidenti İlham Əliyev tərəfindən uğurla davam etdirildiyini vurğulayıb. V. Səfərli ulu öndərin mətbuatın inkişafında əvəzsiz xidmətləri olduğunu da konfrans iştirakçılarının diqqətinə çatdırıb: "1998-ci ilə qədər mətbuat üzərində senzura var idi. Çox vaxt qəzetlərin səhifələri ağ çıxırdı. Mətbuat mətbəə çətinlikləri ilə üzləşirdi. Mətbəələrin azlığı, kağız qıtlığı qəzetlərin inkişafına öz mənfi təsirini göstərirdi. Demək olar ki, qəzetlərin əksəriyyəti "Azərbaycan" Nəşriyyatında çapdan çıxırdı. Artıq müstəqil qəzetlərin maliyyə problemləri yaşanmaqda idi. Yığılıb qalan borclar qəzetlərin bağlanması təhlükəsini yaratmışdı. Həmin dövrdə qəzetlərin "Azərbaycan" Nəşriyyatına 450 min dollar məbləğində borcu var idi. Belə bir zamanda qəzet redaktorları Ulu öndər Heydər Əliyevə müraciət etdilər və Ulu öndər onları qəbul edərək problemlərini dinlədi və qəzetlərin borcunun 3 il müddətinə dondurulması haqqında göstəriş verdi. Verilən müddət bitsə də borclar ödənilmədi və demək olar ki, bir az da artdı. 3 ildən sonra isə Ulu öndərin layiqli davamçısı Prezident İlham Əliyev tərəfindən həmin borclar silindi. Bundan sonra da mətbuatın inkişafı daim dövlətin diqqət mərkəzində oldu. Mətbuatın bayramının keçirilməsi də məhz dövlət dəstəyi ilə gerçəkləşdi".
Hazırda KİVDF-nin vasitəsilə mətbuata dövlət qayğısının davam etdirildiyini söyləyən V. Səfərli 2008-ci ildən qəzetləri böhrandan çıxartmaq üçün dövlət proqramının qəbul olunduğunu, bu konsepsiyadan irəli gələn məsələlərin həlli üçün Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradıldığını deyib: "Bu Fond vasitəsilə jurnalistlərin peşəkarlığının artırılması üçün bir sıra layihələr gerçəkləşib. Fond 8 ilə yaxındır ki, fəaliyyət göstərir. Ümumilikdə bu günə qədər Fondun hesabına 26 milyon 795 min manat vəsait köçürülüb ki, o vəsait də əsasən çap mediası olmaqla yerli KİV-lərə göndərilib".
Tədbirdə daha sonra millət vəkili Aqil Abbas, media rəhbərləri çıxış ediblər. Konfrans işini davam etdirib.
