Xalid Ağəliyev: "Bu dəyişikliklə də hər hansı bir məhdudiyyət qoyulacaqsa, sadalanan məqsədləri qorumaq üçün olunmalıdır"
Azərbaycanda "Kütləvi informasiya vasitələri haqqında" Qanuna dəyişiklik edilir. Dəyişiklik layihələri parlamentin İnsan hüquqları komitəsinin oktyabrın 12-də keçirilmiş toplantısında müzakirə edilib. Deputatlar layihələri məqbul hesab edib.
Dəyişiklik dini ekstremizm əleyhinə əməliyyatlar barədə informasiyaların yayılması ilə əlaqədardır. Təkliflərə görə, kütləvi informasiya vasitələri təmsilçiləri dini ekstremizm əleyhinə xüsusi əməliyyatlar aparılan ərazilərdə sərbəst fəaliyyət göstərə bilməyəcək. "Kütləvi informasiya vasitələri haqqında" Qanuna dəyişikliklərin edilməsi üçün hazırlanan yeni layihəyə əsasən, dini ekstremizm əleyhinə xüsusi əməliyyatın aparılması zonasında kütləvi informasiya vasitələri işçilərinin fəaliyyəti əməliyyat aparan orqan tərəfindən müəyyən edilir.
Layihəyə əsasən, dini ekstremizm əleyhinə aparılan əməliyyat barədə məlumatlar əməliyyat aparan orqanın müəyyən etdiyi formada və həcmdə verilir.
Ümumilikdə KİV-lə bağlı qanuna edilən dəyişikliklərə media ekspertləri necə yanaşır? Məsələyə münasibət bildirən media eksperti Xalid Ağəliyev buna bir neçə prizmadan yanaşır: "Onsuz da xüsusi xidmət orqanları və hüquq-mühafizə orqanları hər hansı bir əməliyyat apararkən informasiyanın əldə olunması adi vəziyyətdən xeyli fərqli olur. Ancaq bu dəyişikliyin necə işləyəcəyini indidən demək çətindir. Ümumiyyətlə, burada aydın görünmür ki, məhdudiyyət nədə olacaq və necə tətbiq olunacaq. Bir xatırlatma etmək istəyirəm ki, "Kütləvi informasiya vasitələri haqqında" Qanunun müxtəlif maddələrində də kütləvi informasiya azadlığından sui-istifadə ilə bağlı məqamlar öz əksini tapıb. KİV-lər haradan informasiyanı ala bilməz, hansı informasiyanı alıb yaya bilməz, hansı informasiyanı alarkən daha ehtiyatlı olmalıdır, hansı informasiyanı qismən yaya bilər və s. Bu kimi məsələlər həm KİV haqqında qanunda, həm də ümumilikdə media ilə əlaqədar qanunvericilikdə və "Dövlət sirri haqqında" Qanunda öz əksini tapır. Həm Avropa Konvensiyasında, həm də bizim qanunvericilikdə dolayısı ilə göstərilir ki, müəyyən hallarda informasiya əldə edilməsinə məhdudiyyət qoyula, informasiya azadlığı milli təhlükəsizlik, ərazi bütövlüyü, ictimai asayişin qorunması, iğtişaş və cinayətlərin qarşısının alınması, sağlamlığın, mənəviyyatın, ədalət mühakiməsinin qorunması, digər şəxslərin nüfuz və hüquqlarının müdafiəsi üçün məhdudlaşdırıla bilər. Bu dəyişikliklə də hər hansı bir məhdudiyyət qoyulacaqsa, sadalanan məqsədləri qorumaq üçün olunmalıdır".
Vidadi ORDAHALLI
