Azərbaycanda dini ekstremizim əleyhinə xüsusi əməliyyat aparıldıqda, həmin əməliyyatın aparılma zonasında dini ekstremizm əleyhinə xüsusi əməliyyat aparan orqanın göstərişi əsasında qazın, işığın, suyun verilməsi dayandırıla, rabitə xidmətləri məhdudlaşdırıla bilər.
Trend-in məlumatına görə, bununla bağlı Milli Məclisin Hüquq siyasəti və dövlət quruculuğu komitəsinin və İctimai birliklər və dini qurumlar komitəsinin bu gün keçirilən birgə iclasında “Qaz təchizatı haqqında”, “Elektronika haqqında”, “Su təchizatı haqqında”, Telekommunikasiya haqqında” qanunlarına dəyişiklik layihələri müzakirə çıxarılıb.
Dəyişiklik layihəsinə əsasən, dini ekstremizim əleyhinə xüsusi əməliyyat aparıldıqda, həmin əməliyyatın aparılma zonasında, dini ekstremizm əleyhinə xüsusi əməliyyat aparan orqanın göstərişi əsasında məhkəmə qərarı ilə qazın, işığın, suyun verilməsi dayandırıla, rabitə xidmətləri məhdudlaşdırıla bilər.
Layihə Milli Məclisin plenar iclasına tövsiyə olunub.
Azərbaycan Cinayət Məcəlləsində İslam dininə aid ayin və mərasimlərin icrası ilə bağlı tələblər də artırılır. Bu barədə məsələ Cinayət Məcəlləsinin 168.1 maddəsinə təklif olunan dəyişiklikdə öz əksini tapıb. Müzakirə edilən dəyişikliyə əsasən, İslam dininə aid ayin və mərasimlərin əcnəbi və ya vətəndaşlığı olmayan şəxslər tərəfindən aparılmasına görə də iki min manatdan beş min manatadək cərimə və ya bir ilədək müddətdə azadlıqdan məhrumetmə ilə cəzalandırılır.
Qeyd edək ki, hazırda Cinayət Məcəlləsinin həmin maddəsinə əsasən, yuxarıda qeyd olunan cərimə və azadlıqdan məhrumetmə cəzası yalnız xaricdə dini təhsil almış Azərbaycan Respublikasının vətəndaşları üçün nəzərdə tutulur. Dəyişikliyə əsasən isə, həmin maddəyə əcnəbi və ya vətəndaşlığı olmayan şəxslər də əlavə edilir.
Bundan başqa, Azərbaycanda dini düşmənçilik, radikalizm və ya fanatizm zəminində şəxsi hər hansı dinə (dini cərəyana) etiqad etməyə məcbur edən şəxslər 5 ilədək müddətə həbs edilə bilər. Bu barədə məsələ Cinayət Məcəlləsinə əlavə edilməsi təklif edilən maddədə əksini tapıb.
Yeni maddəyə əsasən, dini düşmənçilik, radikalizm və ya fanatizm zəminində şəxsi hər hansı dinə (dini cərəyana) etiqad etməyə, o cümlədən dini ayin və mərasimləri yerinə yetirməyə, dini ayin və mərasimlərdə iştirak etməyə, habelə dini təhsil almağa məcbur edən şəxslərin 7000 manatdan 9000 manata qədər cərimələnməsi və ya 2 ildən 5 ilədək müddətə azadlıqdan məhrum edilməsi nəzərdə tutulur.
Dəyişiklik layihəsi Milli Məclisin plenar iclasına tövsiyə olunub.
Azərbaycanda dini fanatizm və dini düşmənçilik zəminində hakimiyyətin zorla ələ keçirilməsi, konstitusiya quruluşunun zorla dəyişdirilməsi və ərazi bütövlüyünün parçalanmasına görə cəzalar da sərtləşdirilir. İclasında Cinayət Məcəlləsinə yeni 278.2 maddəsinin salınması təklifi müzakirəyə çıxarılıb.
Dəyişiklik layihəsinə əsasən, Azərbaycanın konstitusiya quruluşunun, o cümlədən onun dünyəvi xarakterinin zorla dəyişdirilməsinə və ya ərazi bütövlüyünün parçalanmasına, yaxud hakimiyyətin zorla ələ keçirilməsinə yönələn hərəkətlərin dini düşmənçilik, dini radikalizm və ya dini fanatizm zəminində törədilməsi 15 ildən 20 ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılması nəzərdə tutulur.
Cinayət Məcəlləsinə yeni maddənin əlavə olunması təklifi Milli Məclisin plenar iclasına tövsiyə olunub.
