Məhərrəm Zülfüqarlı: "Hesab edirəm ki, belə bir addımın atılması tamamilə məntiqə əsaslanır"
Xəbər verildiyi kimi, Prezident İlham Əliyev Azərbaycan Respublikasının dövlət müstəqilliyinin bərpasının iyirmi beşinci ildönümünün təntənəli qeyd edilməsi haqqında Sərəncam imzalayıb. Sərəncama əsasən, Azərbaycan Respublikasının dövlət müstəqilliyinin bərpasının iyirmi beşinci ildönümü ölkədə dövlət səviyyəsində təntənəli surətdə qeyd olunacaq.
Bununla yanaşı, sərəncamda deyilir ki, Azərbaycan Respublikasının 1991-ci il oktyabrın 18-də Azərbaycan Xalq Cumhuriyyətinin varisi olaraq öz dövlət müstəqilliyini bərpa etdiyi tarixi gündən 25 il keçir. Müsəlman Şərqində ilk demokratik respublika olmuş Cumhuriyyətin bayrağını, himni və gerbini öz dövlət atributları kimi qəbul etməsi və 28 May gününün dövlət bayramı səviyyəsində qeyd edilməsi Azərbaycan Respublikasının 1918-ci ildə imzalanmış İstiqlal bəyannaməsinə və Azərbaycan Xalq Cumhuriyyətinin dövlət quruculuğu sahəsindəki xidmətlərinə dərin hörmət və ehtiramının təzahürüdür.
Sərəncamda bildirilir ki, ötən 25 il ərzində Azərbaycan xalqı dövlət quruculuğu prosesində ən ümdə amal, arzu və niyyətlərini gerçəkləşdirərək bütün sahələrdə əldə etdiyi nailiyyətlərlə haqlı olaraq fəxr edə bilər. Uğurlu daxili və xarici siyasətimiz sayəsində dövlətçilik ənənələrimiz möhkəmlənmiş, iqtisadiyyatımız inkişaf etmiş, mədəniyyətimiz zənginləşib. Müstəqil Azərbaycan Respublikası bu gün hər bir vətəndaşımız və xaricdə yaşayan soydaşımız üçün əsl qürur mənbəyidir.
Müstəqilliyin 25 illik yubileyinin dövlət səviyyəsində qeyd olunmasına münasibət necədir?
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlı Prezidentin məlum sərəncamını alqışladığını vurğuladı: "Azərbaycanın şərəfli tarixinin ən şanlı səhifələrindən biri dövlət müstəqilliyimizin bərpa olunmasıdır. Azərbaycanın 3 min ildən artıq dövlətçilik tarixi var ki, bunun min ili fasilələrlə müstəqillik dövrü olub, iki min ili isə işğallar dövrü olub. Ən böyük şərəfli hadisə ondan ibarətdir ki, Azərbaycan 19-cu əsrin əvvəllərində və 1920-ci ildə Rusiyanın işğalına məruz qalmasına rəğmən, millət özündə güc tapdı və 1991-ci ildə müstəqilliyini bərpa etdi. Hesab edirəm ki, belə bir addımın atılması tamamilə məntiqə əsaslanır. Azərbaycanda gedən milli azadlıq hərəkatı nəticəsində digər müttəfiq respublikalar da azadlığa çıxdılar. Ona görə də bu bizim şərəfli tariximiz olduğu üçün, Prezidentin bununla bağlı xüsusi sərəncam imzalamasını alqışlayırıq. Bütün kollektivlərdə, o cümlədən işlədiyim ali məktəbdə bu təntənəli surətdə qeyd olunacaq". Vidadi ORDAHALLI
