İsmayıl Ağayev: "Belə imkanlı adamların ölkəmizə bağlılığı artdıqca, onlar diaspor fəaliyyətinə də böyük dəstək verəcək"
Oktyabrın 28-də Bakıda Dünya Azərbaycanlı İş Adamlarının Forumu keçiriləcək. Diasporla İş üzrə Dövlət Komitəsinin mətbuat xidmətindən verilən məlumata görə, forum Prezident İlham Əliyevin Dünya Azərbaycanlılarının IV Qurultayındakı nitqində əksini tapmış tövsiyələrə əsasən keçirilir.
Xatırladaq ki, Prezident İlham Əliyev qurultaydakı nitqində xaricdə yaşayan azərbaycanlı iş adamlarına müraciət edərək onları ölkə iqtisadiyyatının real sektoruna, kənd təsərrüfatı, sənaye, turizm, yüksək texnologiyalar sektorlarına sərmayə qoymağa çağırmışdı. Forumda xaricdə yaşayan azərbaycanlı iş adamlarının Azərbaycan Respublikasında iqtisadiyyatın müxtəlif sahələrinə sərmayə qoymasına stimul verən amillər, dövlət səviyyəsində həyata keçirilən ardıcıl tədbirlər nəticəsində yaranmış əlverişli investisiya mühitinin yaratdığı əlavə imkanlar, ölkənin ümumi iqtisadi inkişafında xaricdə yaşayan azərbaycanlı iş adamlarının rolu ilə bağlı bir sıra məsələlər müzakirə olunacaq. Bununla yanaşı, forumda xarici iş adamlarının və böyük şirkətlərin Azərbaycana investisiya qoymağa təşviq edilməsi ilə bağlı məsələlər ətrafında da fikri mübadiləsi aparılacaq.
Forumun gündəliyinə daxil edilmiş əsas mövzulardan biri də xarici ölkələrdə yaşayan və fəaliyyət göstərən azərbaycanlı iş adamlarının ölkəmizin milli maraqlarının qorunması, Azərbaycan həqiqətlərinin təbliği və diaspor quruculuğu işinə daha fəal şəkildə cəlb olunmasıdır. Foruma xarici ölkələrdə yaşayan 300 nəfərə yaxın azərbaycanlı iş adamı və diaspor rəhbərinin, eləcə də ölkə daxilində fəaliyyət göstərən sahibkarların dəvət olunması nəzərdə tutulub.
Toplantıda Dünya Azərbaycanlı İş Adamları Birliyinin yaradılması təşəbbüsü də müzakirə ediləcək. Bununla yanaşı, tədbirə dəvət olunmuş azərbaycanlı iş adamlarının iştirakı ilə biznes-forumun, habelə dövlət və hökumət nümayəndələri ilə görüşün təşkili də planlaşdırılır.
Azərbaycanda belə bir forumun keçirilməsinin ölkəmiz üçün nə kimi əhəmiyyəti olacaq?
Beynəlxalq Diaspor Mərkəzinin rəhbəri İsmayıl Ağayev qəzetimizə açıqlamasında bildirdi ki, bu olduqca gözəl təşəbbüsdür: "Biz cənab Prezidentə minnətdar olmalıyıq ki, belə bir ideyanı reallaşdırır. Dünyada yaşayan 50 milyondan artıq azərbaycanlının bir müstəqil dövləti var. Ölkə rəhbərliyinin yürütdüyü siyasətdən də görünür ki, dünyada yaşayan heç bir azərbaycanlıya fərq qoyulmur. Onların hər biri buranı özləri üçün vətən saya bilər. Bununla bağlı dünya azərbaycanlılarının konqresi Bakıda keçirilir. Çox mühüm əlaqələr qurulur. Belə toplantıların diaspor quruculuğuna da böyük dəstəyi olur. Biz dünyanın müxtəlif yerlərində tədbirlərdə olan zaman çox imkanlı soydaşlarımızla rastlaşırıq. Onların da bir araya gətirilməsinə ehtiyac var. Belə olacağı təqdirdə dünyanın müxtəlif ölkələrində yaşayan imkanlı azərbaycanlılar arasında koordinasiyalar qurular, onların ölkəmizə sərmayə yatırması təşviq edilər. Belə imkanlı adamların ölkəmizə bağlılığı artdıqca, olar diaspor fəaliyyətinə də böyük dəstək verəcək. Keçiriləcək forumu yüksək dəyərləndirirəm".
Məhəmmədəli QƏRİBLİ
