Gürcüstanın keçmiş prezidenti və Ukraynanın Odessa vilayətinin eks-qubernatoru Mixail Saakaşvili qatarla Polşadan Ukraynaya daxil olmaq istəyir.
Baki-xeber.com BBC-yə istinadən xəbər verir ki, Saakaşvilinin minlərlə tərəfdarı Ukrayna ilə Polşa arasındakı Krakovets sərhəd keçid məntəqəsində toplaşıb. Sərhədçilərin məntəqədə avtomobillərin hərəkətini dayandırdıqları deyilir.
Saakaşvili daha əvvəl sentyabrın 10-da Ukraynaya qayıdacağını bildirmişdi.
Ukrayna prezidenti Petro Poroşenko Mixail Saakaşvilini ölkə vətəndaşlığından məhrum edib.
XXX
APA-nın “RİA Novosti” agentliyinə istinadən verdiyi məlumata görə, Gürcüstanın sabiq prezidenti və Ukraynanın Odessa vilayətinin sabiq qubernatoru Mixail Saakaşvili ilə əlaqədar Polşa-Ukrayna sərhədində avtomobillərin hərəkəti dayandırılıb. Ukrayna hakimiyyətinin vətəndaşlığını ləğv etdiyi M. Saakaşvili şənbə günü bəyan edib ki, bu gün “Krakoveç” sərhəd-keçid məntəqəsi vasitəsi ilə Polşadan Ukraynaya gələcək.
Hazırda sərhəd-keçid məntəqəsində Ukraynadan Polşaya və əks istiqamətə avtomobillərin hərəkətinə icazə verilmir.
Gürcüstanın sabiq prezidenti və Ukraynanın Odessa vilayətinin sabiq qubernatoru Mixail Saakaşvilinin Polşa-Ukrayna sərhədini qatarla keçmək cəhdi baş tutmayıb. APA-nın “RİA Novosti” agentliyinə istinadən verdiyi məlumata görə, M. Saakaşvili Polşanın Pşemıslye yaşayış məntəqəsində qatardan düşürülüb.
BBC isə xəbər verir ki, qatar əvvəlcə geciksə də, daha sonra ümumiyyətlə təxirə salınıb. "Qatar hərəkət etməyəcək, sərnişinləri Ukraynaya avtobuslarla gedə bilərlər", vağzalda elan edilib.
Marşrutun dəyişdirilməsinə razılıq verən sərnişinlərin biletin qiyməti məbləğində kompensasiya ediləcəyi deyilir.
Ukrayna vətəndaşlığından məhrum edilmiş M. Saakaşvili yenidən öncəki planına qayıdıb və sərhədi avtomobil sərhəd-keçid məntəqəsindən keçməyə qərar verib. M. Saakaşvilinin tərəfdarları onu “Krakoveç” sərhəd-keçid məntəqəsində qarşılamaq üçün Mostiska yaşayış məntəqəsinə toplaşıblar. M. Saakaşvili keçirdiyi mətbuat konfransında deyib ki, qanuni yolla Ukrayna ərazisinə daxil olmağa çalışacaq: “Bunun üçün mənə ukraynalı sərhədçilərlə əlaqə yaratmaq lazımdır. Dəmir yol vağzalında bunu etmək mümkün olmadı”.
“Batkivşina” partiyasının lideri Yuliya Timoşenko da M. Saakaşvili ilə birlikdədir. Y. Timoşenko deyib ki, M. Saakaşvilini qanunsuz Ukrayna vətəndaşlığından məhrum edildiyi üçün onunla birlikdədir: “Biz burada həm də Ukraynamnı kriminal diktaturadan qoruyuruq”.
Saakaşvili əvvəlcə Ukraynaya avtobusla daxil olmaq istəsə də, daha sonra Krakovets keçid məntəqəsində provokasiya ehtimalından plana dəyişiklik etdiyini və qatarla getmək istədiyini bildirib,
Qeyd edək ki, M. Saakaşvili ABŞ-da olarkən Ukrayna prezidenti Petr Poroşenko M. Saakaşvilini Ukrayna vətəndaşlığından məhrum edib. Bu qərar M. Saakaşvilinin Ukrayna vətəndaşlığı alarkən qeyri-dəqiq məlumatlar təqdim edilməsi ilə əsaslandırılmağa çalışılıb. Daha sonra ABŞ-dan Polşaya qayıdan M. Saakaşvili sentyabrın 10-da Ukraynaya dönmək niyyətində olduğunu açıqlayıb.
Gürcüstanın keçmiş prezidenti və Ukraynanın Odessa vilayətinin eks-qubernatoru Mixail Saakaşvili yüzlərlə dəstəkçisinin yardımı ilə Ukraynaya daxil ola bilib.
Saakaşvili bildirib ki, keçidin bağlı olmasına acıqlı kütlə qəfildən onu sərhəddən keçirib. "Bizi süpürərək Ukraynaya apardılar", o əlavə edib.
Ukrayna rəsmiləri onun sərhədi qanunsuz keçdiyini və 16 sərhədçi və milli mühafizə xidməti əməkdaşının yaralandığını bildiriblər. Ukrayna bildirib ki, sərhəd rəsmiləri və Saakaşvilinin dəstəkçiləri arasında əlbəyaxa qarşıdurma baş verib.
Gürcüstan və sonra Ukrayna vətəndaşlığı olan cənab Saakaşvili hazırda vətəndaşlığı olmayan şəxsdir.
