Səudiyyə Ərəbistanının "Majalla" nəşri Rusiya Prezidenti Vladimir Putin və o vaxtkı ABŞ Prezidenti Corc Buş arasında 2001-2003-cü illərdə aparılan telefon danışıqlarının transkriptlərini dərc edib.
Putin 11 sentyabr hücumlarından sonra Buşla ilk əlaqə saxlayanlardan biri olub və ABŞ-ın terrorizmə qarşı mübarizəsini dəstəkləyib. Sızdırılan məlumatlar göstərir ki, Putin Çeçenistan və Gürcüstandakı hərəkətlərini terrorizmə qarşı mübarizənin bir hissəsi kimi qələmə verməyə çalışıb.
Sızdırılan məlumata görə, Putinin ABŞ-dan aşağıdakıları istəyib:
- ABŞ-ı Avropada raketdən müdafiə sistemləri yerləşdirməkdən çəkindirmək
- Müdafiə və döyüş sistemləri ilə bağlı razılığa gəlmək
- Kəşfiyyat əməkdaşlığını inkişaf etdirmək
- Terrorizmlə mübarizədə tərəfdaşlıq
12 sentyabr 2001-ci ildə telefon danışığında Buş Putinə, bir gün əvvəl zəng edib dəstəyini bildirən ilk xarici lider olduğuna görə təşəkkür edib və "dünyaya sizin və mənim kimi azadlıqsevərlərin bu qorxaqlara qarşı birləşə biləcəyini göstərməyə can atdığını" deyir. Putin isə cavabında "tamamilə sizin yanınızdayam" deyir.
11 sentyabr hadisələrindən dərhal sonra baş tutan söhbətdə Putin Buşa tam dəstəyini bildirərək "xidmətinizdəyəm” deyib: “Yeri gəlmişkən, sizə deyə bilərəm ki, sabah günorta saatlarında Rusiya qurbanların xatirəsini bir dəqiqəlik sükutla yad edəcək və mən sizinlə həmrəylik göstərmək üçün fərman imzalamışam. Bütün bayraqlar yarıya endiriləcək və əyləncə tədbirləri dayandırılacaq".
Sonrakı görüşlərdə Putinin çeçenləri "Bin Ladenin rəhbərlik etdiyi ərəb terrorçuları" ilə eyniləşdirərək ABŞ-la ittifaq qurmağa çalışdığı qeyd edilir. Bundan başqa, Putin Buşa "Amerika əleyhinə isteriya"nı alovlandırmayacağına zəmanət verir.
İraqa hücumdan bir gün əvvəl, 18 mart 2003-cü ildə keçirilən görüşdə Putin ABŞ-ın İraqa hücumuna qarşı çıxır. Putin sərt bir tonda işğalın qanunsuz olduğunu bildirir: "Hədəfinizin rejim dəyişikliyi olduğunu dediniz, amma bu, BMT Nizamnaməsində və ya beynəlxalq hüquqa ziddir. Ən əsası, əvvəllər də dediyim kimi, beynəlxalq qanunları güc qanunu ilə dəyişdirməməliyik".
Buna baxmayaraq, Rusiyanın işğaldan sonra o vaxtkı İraq prezidenti Səddam Hüseyn rejiminə heç bir dəstək vermədiyi qeyd edilir.
Putinin Buşa İraqda müharibə başlayacağı halda, münasibətlərinin, Rusiya parlamentində qalmaqal yaratmamaq üçün ertələnəcəyini söylədiyi bildirilir. Qeyd edilir ki, bu, Rusiya-Amerika Strateji Silahların Azaldılması Müqaviləsinin (START) parlament tərəfindən təsdiqlənməsini təmin etmək üçün görülən bir tədbir idi.
11 sentyabr hadisələrindən sonra iki ölkənin sürətlə yaxınlaşdığı və görüşlərin "qeyri-rəsmi ailə atmosferinə" çevrildiyi bildirilir. Putinin dəstəkləyici ritorikasına baxmayaraq, Buşun Rusiyanın tələbləri ilə bağlı heç bir əhəmiyyətli addım atmadığı və buna görə də aralarında etibarın azaldığı qeyd edilir.
Buşun Putin haqqında dediklərindən də sitat gətirilib: "Prezident terrorizmə qarşı mübarizədə son dərəcə yaxın əməkdaşlıq etdi və onun Əfqanıstan, Tacikistan və Özbəkistanla bağlı gördüyü işlər əvəzsizdir. Bundan əlavə, Rusiya ilə qısa və uzunmüddətli perspektivdə ittifaq qurmaq Amerika xalqının və millətimin maraqlarına uyğundur".
TAHİR
