ABŞ Səhiyyə və İnsan Xidmətləri Departamenti (HHS), Prezident Donald Trampın qərarından bir il sonra, Ümumdünya Səhiyyə Təşkilatındakı (ÜST) 78 illik üzvlüyünün rəsmi olaraq başa çatdığını elan edib.
Açıqlamada bildirilib ki, ÜST-ə bütün Amerika maliyyəsi kəsilib və təşkilatda çalışan bütün işçilər geri çağırılıb. Beləliklə, Trampın ikinci müddətinin ilk günündə imzaladığı sərəncamla başlayan ÜST-dən çıxma prosesi rəsmi olaraq başa çatıb.
ÜST-ə görə, ABŞ-ın təşkilata borcu 130 milyon dolları keçib.
Digər tərəfdən, ekspertlər ABŞ-ın epidemiyalar barədə erkən xəbərdarlıqlar verən digər ölkələrin vacib səhiyyə məlumatlarına çıxışında boşluqlarla qarşılaşa biləcəyini deyir.
Corctaun Universitetinin ictimai səhiyyə hüququ üzrə eksperti Lorens Qostin bildirib ki, ABŞ-ın təşkilatdan çıxması qlobal pandemiyalara qarşı mübarizəni zəiflədəcək və ABŞ alimlərinin və əczaçılıq şirkətlərinin yeni təhlükələrə qarşı peyvənd və müalicə vasitələri hazırlamaq qabiliyyətinə mənfi təsir göstərəcək: "Bu, indiyə qədər gördüyüm ən dağıdıcı prezident qərarlarından biridir".
ÜST-ün yaradılmasında aparıcı rol oynayan və illərdir onun ən böyük maliyyə dəstəkçilərindən biri olan ABŞ rəsmi olaraq təşkilata illik təxminən 111 milyon dollar üzvlük və 570 milyon dollar könüllü ianə verib.
ÜST poliomielit, Ebola və digər xəstəliklər kimi qlobal səhiyyə təhdidlərinə qarşı cavabları əlaqələndirir, yoxsul ölkələrə texniki dəstək verir, peyvənd və müalicə vasitələrinin paylanmasına töhfə verir və yüzlərlə xəstəlik üçün təlimatlar dərc edir. Dünyanın demək olar ki, bütün ölkələri təşkilatın üzvüdür.
Ekspertlər xəbərdarlıq edirlər ki, ABŞ-ın təşkilatdan çıxması poliomielit xəstəliyinin aradan qaldırılması, ana və uşaq sağlamlığı proqramları və yeni virusların aşkarlanması kimi qlobal səhiyyə təşəbbüslərini ciddi şəkildə zəiflədəcək. Amerika Yoluxucu Xəstəliklər Assosiasiyasının prezidenti Dr. Ronald Nahass bu qərarı "elmi cəhətdən məsuliyyətsiz" adlandırıb.
TAHİR
