Suriya ordusu Fərat çayının qərbində PKK/SDF terror təşkilatının nəzarətində olan ərazilərə doğru irəliləməyə davam edir. Son məlumatlara görə, Tabqanı ələ keçirən ordu Rakkanın mərkəzinə yaxınlaşır.
Suriya ordusu SDF-yə 10 mart Sazişinə əməl etmək üçün ilin sonuna qədər vaxt vermişdi. Lakin təşkilat bütün ərazilərdə inteqrasiyaya müqavimət göstərdi. Bundan sonra Dəməşq hökuməti Hələbdəki SDF hədəflərinə qarşı əməliyyata başladı. Şeyx Məqsud və Əşrəfiyyə məhəllələri ilk olaraq terrorçulardan təmizləndi və SDF-nin Hələbdəki mövcudluğuna son qoyuldu. Hazırda Fərat çayının qərbində irəliləməyə davam edən Suriya ordusu əvvəlcə Deyr Hafiri, sonra Meskene və Tabqanı ələ keçirərək Rakkanın mərkəzinə yaxınlaşır.
Terrorçular Suriya ordusunun Rakkanın mərkəzinə girməsinin qarşısını almaq üçün Fərat çayı üzərindəki körpüləri partlatmağa başlayıb. Suriyanın rəsmi xəbər agentliyi SANA çay üzərindəki iki körpünün YPG/SDG terrorçuları tərəfindən dağıdıldığını bildirib. Bundan başqa ordu qarşısında tab gətirə bilməyən PKK/YPG/SDG terror təşkilatı səfərbərlik elan edib.
Fərat çayının şərqində yerləşən Deyr əz-Zor əyalətindəkı tayfalar Fərat çayının qərbindən gələn tayfa qüvvələri ilə birlikdə Ömər neft yatağını və Kuniko qaz yatağının olduğu ərazini YPG/SDG terrorçularından azad edib. Qeyd edək ki, Ömər neft yatağı Suriyanın ən böyük neft yatağıdır.
Fərat çayının şərqindəki irəliləyən tayfalar Deyr əz-Zor əyalətindəki Şehil, Havay, Ziban, Tayyana, Əbu Hammam, Hatla, Garanic, Bağuz, Susah və Şəfa kənd və qəsəbələrinin nəzarətini də ələ keçiriblər.
TAHİR
