Fransanın Azərbaycana qarşı yürütdüyü qərəzli siyasət və ölkəmizin bu təzyiqlərə verdiyi layiqli cavablar hətta dünyanın aparıcı media resurslarının da diqqətini cəlb edib.
BBC kimi tanınmış media resursu bu mövzuya aid "Makron Buratino rolunda və ya Azərbaycan Fransada insan haqlarından niyə narahatdır?" başlıqlı geniş məqalə dərc edib. Məqalədə qeyd edilir ki, Fransada islamafobiya, irqçilik, imperializmin olduğunu Azərbaycan ifşa edir: "Bakıdan olan jurnalistlər iğtişaşları işıqlandırmaq üçün Parisə gedirlər. Prezident Əliyev Fransanın keçmiş müstəmləkələrindən olan insanları başına toplayır və onlar zülmdən danışırlar. Bir çox sadə azərbaycanlı isə Fransanı sevmir. Niyə belə oldu? Gəlin bunu anlamağa çalışaq.
Ötən həftəsonu Azərbaycanda Fransa müstəmləkəçiliyinə və "onun xarici ərazilərində insan hüquqlarının pozulmasına" həsr olunmuş konfrans keçirilib. Orada Fransanın dənizaşırı regionlarından - Yeni Kaledoniyadan, Fransız Polineziyasından, Fransız Qvianasından və başqalarından milli hərəkatların nümayəndələri iştirak edib. Qviana nümayəndəsi Fransanın məktəblərdə fransız dilində tədris vasitəsilə öz sakinlərini necə assimilyasiya etməyə çalışdığını təsvir edib. Hökumətyönlü mətbuat bu mövzuda yazır ki, Fransa təkcə müstəmləkə ölkəsi deyil, həm də Cənubi Qafqaza "yelkənlərini açmağa" çalışır.
Fakt budur ki, Fransa Qarabağ münaqişəsində Ermənistanı dəstəkləyir. Ankara 2020-ci il müharibəsində Azərbaycanın müdafiəsinə qalxdı və onu silahla təmin etdi. Eyni zamanda Fransada ermənilərin müdafiəsi üçün məktublar və qətnamələr imzalanırdı".
Məqalədə Parisin meri Ann Hidalqonun Qarabağ ermənilərinə humanitar yardım çatdırmaq üçün şəxsən Ermənistana gəldiyi qeyd edilir:
"Fransa prezidenti Emmanuel Makron 2020-ci il müharibəsinin qızğın vaxtında "Azərbaycan əleyhinə ən sərt bəyanatlar verməklə" regiondakı vəziyyəti daha da pisləşdirdi.
Bundan əlavə, ekspertin fikrincə, Fransa Senatının həmin müharibə zamanı qəbul etdiyi qətnamə Qarabağ ermənilərinin vəziyyətinin yaxşılaşmasına kömək etmədi, çünki Fransanın özü də daxil olmaqla, özünü müstəqil elan etmiş "respublika"nın müstəqilliyini heç bir ölkə tanımayıb.
2022-ci ildə Fransa Senatı Azərbaycan qoşunlarının Ermənistan ərazisindən (sərhəd toqquşmaları nəticəsində daxil olduqları) çıxarılmasını və Azərbaycana qarşı sanksiyaların tətbiqini tələb edən qətnamənin lehinə, demək olar ki, yekdilliklə səs verib.
Və bu yaxınlarda Fransa Ermənistana silah tədarük edəcəyini açıqladı. Bakıda olan mətbuat bunu açıq-aşkar düşmənçilik hərəkətləri kimi qəbul edir".
Məqalədə həmçinin qeyd edilir ki, bu yay Fransada Əlcəzair əsilli yeniyetmənin fransız polisi tərəfindən öldürülməsi ilə bağlı etirazlar olub:
"Aksiya iştirakçıları gözlənilmədən Azərbaycan prezidenti İlham Əliyev tərəfindən dəstəklənib və tezliklə Azərbaycan dövlət televiziyasının jurnalistləri Fransaya getdilər və orada yerli quldurlar tərəfindən qarət olundular".
Bakıda keçirilən "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfransda ən çox haqqında tənqid səslənən ölkənin Fransa olması heç də təsadüfi deyil. Bu təkcə ona görə baş vermir ki, həmin Fransa Azərbaycana qarşı düşmənçilik siyasəti yeridənlərin önündə gedir. Məsələ burasındadır ki, neokolonializmin ən mənfur formalarını reallaşdıran, milli azlıqların hüquqlarını kobudcasına tapdalayan, irqçiliklə islamofobiyanın ən çox tüğyan etdiyi ölkələrin başında da elə Fransa gəlir.
Məhz bu məqamlara görə də mövzu artıq dünyanın aparıcı media resurslarının da diqqətini cəlb edir.
Məhəmmədəli QƏRİBLİ
