İsrailin BMT-dəki daimi nümayəndəsi Gilad Erdan təşkilatın Baş katibi Antonio Quttereşi istefaya çağırıb. Gilad Erdan bununla bağlı sosial şəbəkə hesabında məlumat verib:
“Uşaqların, qadınların və qocaların kütləvi qətli kampaniyasına anlayış göstərən BMT-nin Baş katibi BMT-yə rəhbərlik etməyə yaraşmır. Onu dərhal istefaya çağırıram”.
Qeyd edək ki, İsrailin xarici işlər naziri Eli Koen də BMT-nin Baş katibi Antonio Quttereşlə görüşməkdən imtina etdiyini bildirmişdi.
BMT Baş katibi Antoniu Quttereş Fələstinin HƏMAS hərəkatının hərəkətlərinə haqq qazandırdığına dair ittihamları qətiyyətlə rədd edib.
Bu barədə o, jurnalistlərə açıqlamasında bildirib:
“Dünən Təhlükəsizlik Şurasında verdiyim bəzi bəyanatların yanlış şərh edilməsi məni şoka saldı. Guya ki, HƏMAS-ın İsraildəki terror aktlarına bəraət qazandırmışam. Bu belə deyil. Bu mənim mövqeyimin əksinədir”.
Göründüyü kimi, təzyiqlərdən sonra Quttereş Qərbin Qəzza siyasətinə əks mövqe qoydu. Dedi ki , HƏMAS-ın terroru yolverilməzdir, lakin nədənsə, HƏMAS-ın hücumundan qabaq Fələstinin işğal faktının olduğu unudulur. İsrail Quttereşlə razı deyilsə, deməli, bu ABŞ- ın da mövqeyi ilə ziddiyyət təşkil edir. ABŞ, İsrail və digər Qərb ölkələri Quttereşi istefaya məcbur edə bilərmi?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, gəlin hadisələrə bir qədər xronoloji olaraq nəzər yetirək: “BMT Baş katibi Antonio Quttereş BMT Təhlükəsizlik Şurasının iclasında səsləndirdiyi HƏMAS-ın İsrailə ölümcül hücumuna haqq qazandıran ifadələrini geri götürməyə çalışıb. O deyib ki, Fələstin xalqının şikayətləri HƏMAS-ın dəhşətli hücumlarına haqq qazandıra bilməz. Baş katib həmçinin bilfirib ki, bu dəhşətli hücumlar Fələstin xalqının kollektiv şəkildə cəzalandırılmasına da haqq qazandıra bilməz.
Xatırladaq ki, Antonio Quttereş BMT Təhlükəsizlik Şurasının İsrail və HƏMAS arasında müharibəyə həsr olunmuş iclasında HƏMAS-ın hücumunun əbəs yerə olmadığı ilə bağlı ifadə dilə gətirib və bu şəkildə fikir bildirib: “Eyni zamanda etiraf etmək lazımdır ki, HƏMAS-ın hücumu boş yerə olmayıb”.
Qeyd edək ki, İsrail rəsmiləri bu fikirlərinə görə Quttereş tənqid edib və bundan sonra BMT rəsmilərinə viza verilməsindən imtina ediblər. Bir çoxları isə Antonio Quttereşi istefaya çağırıb. Təbiidir ki, bu, ABŞ-ı da qane etməyən mövqedir. Çünki bu məsələdə ABŞ-la İsrail birgə hərəkət edir. BMT-nin proseslərə təsir mexanizmləri onsuz da yox kimidir. BMT TŞ-də təmsil olunan ölkələr veto hüququndan istifadə edərək, heç bir layihənin keçməsinə icazə vermirlər. Biz bunu bir neçə gün əvvəlki müzakirələrdə də gördük. BMT-nin qətnamələrinin icra olunmadığına isə öz praktikamızda şahidlik etdik. Bizim Prezident hamıdan əvvəl deyirdi ki, BMT-nin yeniləşməyə ehtiyacı var. Çünki qərarlarının icra mexanizmi yoxdur. Maraqlıdır ki, böyük ölkələr bu təklifə indiki kimi canfəşanlıq göstərmirdi. Bir daha ikili standart var. Böyük ölkələrin marağına zidd olan kimi etiraz səsləri ucalır. Hesab edirəm ki, Quttereş səlahiyyət müddətini başa vurana kimi yerində qalıb işləyəcək. Çünki onun istefaya göndərilməsi mexanizmi elə də asan deyil və bu yalnız ABŞ, İsrailin istəyi ilə həyata keçə bilməz”.
Məhəmmədəli QƏRİBLİ
