“Hizbullah” ikinci cəbhəni açmaq qərarına gəlsə, İsrail İrana zərbələr endirəcək. Bunu İsrailin iqtisadiyyat naziri Nir Barkat İngiltərənin “Daily Mail” nəşri tərəfindən yayımlanan bir reportajda deyib.
Barkat İsrailin bu vəziyyətdə "ilanın başına" zərbə vuracağını və "İran ayətullahlarını yer üzündən siləcəyini" söyləyib: “İran bütün cəbhələrdə İsrailə hücum etməyi planlaşdırır. Əgər onlar bunu həyata keçirsələr, biz təkcə bu cəbhələrdə deyil, ilanın, yəni İranın başına da cavab verəcəyik. İrandakı ayətullahlar rahat yatmayacaqlar-Allah qorusun, şimal cəbhəsini açsalar, bunun üçün ağır bir bədəl ödəyəcəyik. “Hizbullah” və HƏMAS böyük bir bədəl ödəyəcək, amma bu kifayət deyil. Bu nə vaxt baş verəcək? Qərar verdiyimiz zaman”.
Görünən odur ki, tərəflər arasında gərginlik artır. Hazırda İsrail hərbçiləri Qəzza zolağında HƏMAS qruplaşmasına qarşı genişmiqyaslı əməliyyatlar aparır. Eyni zamanda, İsrailin Livanla sərhədində İsrail Müdafiə Qüvvələri ilə “Hizbullah” döyüşçüləri arasında vaxtaşırı atışma olur.
“Hizbullah” hücum edərsə, o zaman nəinki İsrail, ABŞ da İrana raket zərbələri endirə bilər”
Məsələ ilə bağlı “Bakı-Xəbər”ə açıqlama verən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, bütün bunlar vəziyyətin olduqca gərgin olmasından xəbər verir: “Gör vəziyyət nə dərəcədə kritikdir ki, İsrailin iqtisadiyyat naziri belə, İrana yönəlik hədələyici mövqedən çıxış edir. Adətən indiyə qədər Yaxın Şərqdə gərginlik artanda İsrailin baş naziri, xarici və müdafiə nazirləri bəyanatlarla çıxış edirdilər. İndi gör vəziyyət necə kritikdir ki, iqtisadiyyat naziri belə, İranın vurulacağı ilə bağlı hədələyici mövqe ortaya qoyur. Bu o deməkdir ki, vəziyyət həqiqətən də çox mürəkkəbdir. İsrailin bu dəfə məqsədi odur ki, Qəzzada HƏMAS-ın varlığına birdəfəlik son qoysun. Əvvəlki dövrlərdə belə idi ki, Qəzzadan raket hücumları olurdu. Buna cavab olaraq İsrail əsasən HƏMAS-ın düşərgələrinə hava zərbələri vururdu. Bu dəfə məqsəd odur ki, quru qoşunları Qəzzaya daxil olub HƏMAS-ın yeraltı tunel şəbəkəsini darmadağın etsin. Bu məqsədlə bütün quru qoşunları döyüş hazırlığına gətirilib. Ancaq qarşıda İsrail ordusunu nə gözlədiyi məlum olmadığı üçün onlar tələsmir. Çünki belə əməliyyat vaxt çox aparır. İsraili bundan çəkindirmək üçün Livandakı “Hizbullah” təşkilatı terror fəaliyyətini gücləndirir. “Hizbullah” da sırf İran tərəfindən maliyyələşdirildiyi və idarə olunduğu üçün İsrail daha çox Tehran rejimini təhdid edir. Çünki İran rəsmiləri dəfələrlə bəyan ediblər ki, müharibə genişlənsə, onlar müdaxilə edəcəklər. İsrail yaxşı bilir ki, “Hizbullah” ikinci cəbhə açsa, deməli bu qərarın arxasında Tehran dayanır. Ancaq ikinci cəbhə açılsa, bu, İrana baha başa gələcək. Çünki ABŞ və digər Qərb ölkələri davamlı olaraq İsrailə dəstək verirlər. Üstəlik, Birləşmiş Ştatlar iki böyük aviadaşıyıcı tankerini Aralıq dənizi sahillərinə yönəldib. İran iqtisadiyyatı indiki şəraitdə başlayacaq müharibəni qaldıra bilməz. “Hizbullah” hücum edərsə, o zaman nəinki İsrail, ABŞ da İrana raket zərbələri endirə bilər”.
Vidadi ORDAHALLI
