İsrailin müdafiə naziri Yoav Qalant qoşunların tezliklə Qəzza sektoruna daxil olacağını açıqlayıb. Nazir Qəzza sektoru ilə sərhəddəki İsrail hərbi mövqelərinə səfəri zamanı deyib ki, hələlik Qəzzanı uzaqdan görürsünüz, amma tezliklə onu içəridən görəcəksiniz. Bu əmr gələcək.
Öz növbəsində, İsrail Müdafiə Ordusunun Cənub Hərbi Dairəsinin komandanı general-mayor Yaron Finkelman Qəzza zolağına qurudan hücumun çətin, uzun və gərgin olacağını bildirib.
İsrail dünyanın şok intizarda olduğu “quru əməliyyata” başlayacaqmı?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, İsrailə qəfil hücum Fələstin üçün böyük itkilərlə izləndi: “İsrail hərbi avtoritetini itirmiş oldu. Eyni zamanda bu qəfil hücum çox sayda insan tələfatı ilə nəticələndi. Bütün bu baş verənlər çox böyük olduğu üçün, cavabı da böyük olmalı idi. Təsir əks təsirə bərabərdir. Bu adi həyat qanunudur. Bu dəqiqə Türkiyə başda olmaqla bir sıra ölkələr ekskalasiyanın genişlənməsinin qarşısını almaq üçün çalışır. Mən düşünürəm ki, İsrail ona vurulan zərbənin on qat artığını çıxmayınca, sakitləşən deyil. İsrail hazırda özünün hərbi potensialını göstərmək, itirilmiş hərbi imicini bərpa etmək məqsədi ilə çox şeylər edəcək. Amma təbii ki, bu əməliyyatlar davam edərsə, qarşılıqlı şəkildə bir - birini hədəfə alma prosesi gedərsə, bunun çox ciddi fəsadları olacaq. İran da daxil olmaqla, bir sıra ərəb ölkələri də bu münaqişəyə cəlb oluna bilər. Bu növbəti dünya müharibəsi ilə nəticələnə bilər. Bilirsiz ki, Amerika da özünün çox yüksək gücə malik iki hərbi gəmisini yaxın sahillərdə yerləşdirib. Ancaq eyni zamanda, ABŞ bu məsələdə çox ehtiyatla davranır. ABŞ rəsmiləri bildirdilər ki, hərbi gəmilərinin sahəyə çıxarılması onların bu münaqişəyə müdaxilə etmək niyyəti ilə bağlı deyil. Sadəcə, burada öz varlığını göstərmək məqsədi daşıyır. Eyni zamanda Amerikanın dövlət naziri məlumat verdi ki, İranın bu əməliyyatlarla əlaqəsi yoxdur. ABŞ - da İranın bu məsələdə iştirakı sübut olunmur. Yəni konkret faktlarımız yoxdur. Bu da çox ehtiyatlı münasibət idi. Səbəb İranı sakitləşdirmək, kənarda aut vəziyyətində saxlamaq idi. Hər halda bu rəsmi məlumat idi. Bilirsiz ki, gündəmdə daha çox İranın bu məsələdə iştirakı idi. Amma Amerika öz rəsmi məlumatı ilə bu informasiyaları bir növ bloklamış oldu. Əlbəttə, əməliyyatlar genişlənərsə, ekskalasiya hərbi faciələrlə nəticələnə bilər. İsrailin də ciddi hərbi potensialı və hərbi müttəfiqləri var. İsrail cəbhəsi ərəb ölkələri ilə müqayisədə daha güclüdür. İsrailin arxasında birbaşa Amerika dayanır. Amerika da, Türkiyə də bu qəfil hücumu pisləyib. Başlanğıcı Fələstindən gələn bu münaqişənin sakitləşməsi üçün ilk olaraq Fələstin özü barışıq mövqeyi tutmalıdır. Əks təqdirdə, mən belə düşünürəm ki, İsrail Fələstini üzr istəməyə vadar etməyə çalışacaq. Bu üzrdən sonra bəlkə sakitləşmə baş verə bilər. Əks halda heç bir nəticə olmayacaq, ekskalasiya genişlənəcək. Bu ekskalasiyanın genişlənməsi indiki məqamda, Rusiya və Ukrayna müharibəsi dövründə Amerikaya da sərf eləmir. Amerika da milyardlarla dollar vəsait göndərir Ukraynaya. Bəzi Avropa ölkələrinə də sərf eləmir. Ümumiyyətlə, hazırda Amerikanın əsas hədəfi Rusiyadır. İsrailin də ən böyük müttəfiqlərindən biri Amerikadır və İsrail də bunu bilir ki, Amerikanın marağı Rusiya ilə Ukrayna müharibəsindədir. Amerika daha çox Rusiyanı çökdürmək üçün çalışır. Əlbəttə, tərəflərdən mütləq biri güzəştə getməlidir. Güzəşt məqsədi ilə Türkiyə kimi vasitəçi ölkələrə ehtiyac var. Əgər bu digər ölkələrin müdaxiləsi ilə sakitləşməzsə, o zaman Fələstin özü açıq şəkildə bəyan etməli, üzr istəməlidir və ya hansısa şəkildə barışığa getməlidir. İlk barışıq mesajı Fələstindən gəlməlidir. İsrail bunu etməyəcək. Gəlməsə, ekskalasiya genişlənəcək”.
Məhəmmədəli QƏRİBLİ
