İsrail ordusu raket zərbəsi ilə Qəzzadakı Əhli-Ərəb Xəstəxanasını vurub. Hücum nəticəsində ölənlərin sayının 600-ü keçdiyi bildirilir. Dünya mediası ölü sayının 1000-i keçə biləcəyini yazıb.
Fələstin Prezidenti Mahmud Abbas hadisə ilə bağlı üç günlük matəm elan edib.
Fələstində matəm əlaməti olaraq bayraqlar endirilib.
Təbii ki, belə bir hədəfin seçilməsi təsadüf ola bilməz. Bu hal müharibəni hansı məcraya yönəldə bilər və İsrailin imicinə necə təsir edəcək?
Müstəqil siyasətçi Əli Mustafa “Bakı-Xəbər”ə açıqlamasında bildirdi ki, çox təəssüf, müharibənin başlaması və miqyasın getdikcə artması, öldürülənlərin sayının çoxalması Ərəb-İsrail münaqişəsini alovlandırır: “Miqyas böyüdükcə, bu münaqişə Fələstin, İsrail məcrasından çıxa bilər. Bütövlükdə Ərəb dünyasını, İslam aləmini çox ciddi narahat edə bilər. Yəqin ki, belə də olacaq. Əlbəttə, bu gözlənilməyən, arzu olunmayan bir məsələ idi. İsrail də hədəfləri seçəndə nəzərə almalıdır. Həmasın etdikləri cinayətdir, qadınlara, uşaqlara qarşı hərəkətləri yolverilməzdir. Mən hesab edirəm ki, heç bir halda mülki insanlar hərbi hədəf ola bilməz. Həm də İsrail Həmasdan fərqli olaraq, rəsmi bir dövlətdir. Bütün dünyada mövqeyi və nüfuzu var. Düzdür, İsraillə Azərbaycanın müttəfiqlik münasibətləri, yaxın dostluq əlaqələri var. Amma yenə də, beynəlxalq hüquq da, haqq - ədalət də belə şeyləri qəbul etmir. Bir daha təəssüflə qeyd edirəm ki, İsrail bu addımlarından çəkinməlidir. Heç bir halda, mülki insanlar, qocalar, qadınlar, uşaqlar, hətta xəstələr hədəf olmamalıdır. Bu artıq müharibə şərtlərini də pozur. Beynəlxalq humanitar hüququn tələblərinə ziddir. Hər halda, beynəlxalq təşkilatlar bu məsələlərə qarışmalıdır. Amerika, Böyük Britaniya, Qərb ölkələri indiki İsrailin yanında durmalı deyil, münaqişənin qarşısını almalıdır. Fələstin-İsrail münaqişəsinin ortasında olmalıdır. Hər hansı bir formada gərginliyin aradan qaldırılmasına, münaqişənin dayandırılmasına çalışmalıdır. Mən dünya birliyini, BMT - ni də buna səsləyirəm. Bildiyim qədər, BMT sədri Pekindədir. Amma bu gün İsraildə, Qəzzada, Fələstində olmalıdır. Çalışmalıdır ki, yenə bu iki millət bir - birini qırmasın, xəstələr, uşaqlar, qadınlar müharibə qurbanı olmasın”.
İsrail ordusunun ixtiyarında olan əməliyyat məlumatlarının yenidən yoxlanılması Qəzzada xəstəxanaya hücumda “İslami Cihad” qruplaşmasının günahkar olması ilə bağlı versiyanı təsdiqləyib.
Bu barədə İsrail Müdafiə Nazirliyi məlumat yayıb.
Qeyd olunub ki, əməliyyat və kəşfiyyat sistemlərinin əlavə yoxlanılması və dərin müayinəsindən sonra aydın olub ki, İsrail ordusu Qəzzada xəstəxanaya zərbə endirməyib: “Xəstəxana “İslami Cihad” terror təşkilatının uğursuz raket atışı ilə vurulub”.
İsrailin Qəzzadakı Əl-Əhli Baptist Xəstəxanasına həyata keçirdiyi və yüzlərlə insanın həyatını itirdiyi hücum bir çox ölkə və beynəlxalq təşkilatlar tərəfindən pislənilib.
Birləşmiş Millətlər Təşkilatı (BMT) Əl-Əhli Baptist Xəstəxanasına edilən hücumu qətiyyətlə pisləyib və mülki şəxslərə və səhiyyə müəssisələrinə qarşı hücumları dayandırmağa çağırıb.
Ümumdünya Səhiyyə Təşkilatının (ÜST) Baş direktoru Tedros Adhanom Qebreyesus da hücumu şiddətlə qınayıb və "Mülki vətəndaşların və səhiyyə xidmətlərinin dərhal qorunmasına çağırırıq" deyib.
Qebreyesus qeyd edib ki, Qəzzanın şimalındakı xəstəxanaların (İsrail tərəfindən edilmiş) təxliyə tələbinin geri götürülməsini istəyirlər.
Avropa İttifaqı (Aİ) Şurasının sədri Çarlz Mişel İsrailin Qəzzada xəstəxananı bombalaması ilə bağlı "Həddindən artıq çox ölü var. Bu, orada yaşayan insanlar üçün sahədəki faciəli vəziyyəti göstərir" deyib.
Məhəmmədəli QƏRİBLİ
