Dünyanın elə bir nöqtəsini tapmaq çətin olar ki, orada Azərbaycan əsilli alimlər olmasın, həmin alimlər o ölkələrin elm-təhsil sistemində təmsil olunmasınlar.
Xaricdə yaşayan və fəaliyyət göstərən azərbaycanlı alimlərin xeyli qismi keçən əsrin 90-cı illərinin əvvəllərində buradan gedib, bir qismi isə İrandan, eləcə də digər ölkələrdən mühacirət edib, müəyyən bir hissəsi isə valideynləri mühacir olanlardır.
Bu gün xarici ölkələrdəki Azərbaycan əsilli alimlərin sayının müəyyən edilməsi istiqamətində işlər görülür. Hətta bir müddət əvvəl Avropada yaşayan Azərbaycan əsilli alimlərin bir təsisatı da qurulub. İndi isə Azərbaycanda xaricdə yaşayan Azərbaycan alimləri ilə bağlı assosiasiya yaradılır.
Qeyd edək ki, Azərbaycan Milli Elmlər Akademiyasının (AMEA) Rəyasət Heyətinin fevralın 5-də keçirilən iclasında akademiyada Azərbaycan Əsilli Alimlər Assosiasiyası yaradılması haqqında qərar qəbul edilib.
AMEA-nın akademik-katibi, akademiyanın müxbir üzvü Əminağa Sadıqov bildirib ki, ölkələrarası əlaqələrin sürətli inkişafı, dünyada qlobal problemlərin mövcudluğu və elmi inteqrasiyanın getdikcə daha da genişlənməsi alimlərin ortaq fəaliyyətini şərtləndirir.
Ə.Sadıqov hazırda dünyanın bir sıra nüfuzlu elm və təhsil mərkəzlərində çoxsaylı Azərbaycan əsilli görkəmli alimin fəaliyyət göstərdiyini bildirib. Həmin alimlərlə elmi əlaqələrin qurulması, onların elmi potensialından və zəngin təcrübəsindən məqsədyönlü istifadə olunması üçün kompleks tədbirlərin həyata keçirilməsinin zəruri olduğunu vurğulayıb.
Qeyd olunanları nəzərə alaraq Rəyasət Heyəti AMEA-da xaricdə fəaliyyət göstərən Azərbaycan Əsilli Alimlər Assosiasiyasının yaradılması haqqında qərar qəbul edib.
“Belə bir assosiasiyanın yaradılması müsbət haldır və təqdir edirəm”
Tanınmış alim, professor Məhərrəm Zülfüqarlı hesab edir ki, Azərbaycan Əsilli Alimlər Assosiasiyasının yaradılması haqqında qərar qəbul edilməsi müsbət haldır. “Bu barədə qərar qəbul edilməsi təqdirəlayiqdir. Bilirsiniz ki, cənab Prezident elmə və alimə böyük dəyər verir, bu sahəyə böyük qayğı, diqqət göstərir. Ölkə başçısı dünyanın müxtəlif ölkələrində yaşayan Azərbaycan əsilli alimlərlə də maraqlanır. Əlbəttə, o alimlərin çoxu vaxtilə ölkəmizdən maddi çətinlik, bəzi məmurların onların elmi fəaliyyəti üçün şərait yaratmaması üzündən gediblər. Xaricdəki Azərbaycan əsilli alimlər həmin ölkələrdə özlərinə yer tutublar, elm, təhsil sahəsində böyük işlər görüblər. Bu alimlərin xaricdə Azərbaycanın təbliğatçısına çevrilməsi zəruridir. Düşünürəm ki, AMEA-da Azərbaycan Əsilli Alimlər Assosiasiyasının yaradılması Azərbaycan Prezidentinin yalnız ölkəmizdə deyil, həm də xarici ölkələrdəki alimlərə də göstərdiyi diqqətin nəticəsidir. Bu sahədə Prezidentin təşəbbüsü, dəstəyi olmasaydı, inanmıram ki, AMEA-nın artıq məmurlaşmış Rəyasət Heyəti üzvləri bu barədə düşünə bilərdilər. Hər halda, belə bir assosiasiyanın yaradılması müsbət bir haldır və təqdir edirəm”.
M.Zülfüqarlı hesab edir ki, yeni təsisat həm də xaricdəki Azərbaycan əsilli alimlərin AMEA ilə sıx əlaqə saxlamasına, həmçinin, onların timsalında Azərbaycan həqiqətlərinin dünyada daha geniş səviyyədə təbliğ edilməsinə şərait yaradacaq.
İradə SARIYEVA
