Məlumatlara görə,VTB Bank xarici valyutada olan krediti manata çevirmək üçün vətəndaşlardan əlavə pul istəyir.
Şikayətçi bildirir ki, o, 2014-cü ildə VTB Bankdan xarici valyuta ilə (rublla) kredit götürüb: “Kreditin məbləği 350 min rubl idi. Birinci və ikinci devalvasiyadan sonra kredit faizləri daha da artdı və ödənişi dayandırdım. Götürdüyüm kredit 8 min manata yaxınlaşırdı. Prezidentin 10 min manata qədər xarici valyuta ilə götürülən kreditlərlə bağlı sərəncamından sonra ötən ilin sonlarında VTB Banka yaxınlaşdım. Kreditin məlum sərəncama uyğun olaraq 2020-ci ilin yanvar ayından manata çevriləcəyini və güzəşt tətbiq olunacağı qeyd edildi. Amma bank bunun üçün məndən 200 manat əlavə ödəniş tələb etdi. Belə çıxır ki, Prezidentin sərəncamına düşmək üçün banka əlavə pul ödəməliyəm və bundan sonra kreditim manata çevriləcək”. Məsələ ilə bağlı VTB Bankla əlaqə saxlamağa çalışdıq. Lakin bankın səlahiyyətli nümayəndəsi ilə danışmaq mümkün olmadı.
“Vətəndaş xarici valyutada olan kreditini yeni məzənnə ilə ödəyibsə, ona kompensasiya verilməlidir”
İqtisadçı-ekspert Əli Əlirzayev qeyd etdi ki, Prezidentin fevralın 28-də imzaladığı məlum fərmanı iki hissədən ibarətdir: “Birinci hissəyə əsasən, əgər vətəndaş xarici valyutada olan kreditini yeni məzənnə ilə ödəyibsə, ona kompensasiya verilməlidir. Şikayətdən belə başa düşürəm ki, vətəndaş ödəniş etməyib və buna görə də kompensasiya tələb etmir. Bu halda fərmanın ikinci hissəsi dövriyyəyə keçir. Fərmana görə, vaxtı keçmiş kreditin məbləği 10 min dollar, manatla isə 17 min manata qədərdirsə, restrukturizasiya olunur. Fərmanda vaxtı keçmiş kreditlər üzrə 1 faizlə 5 illik müqavilə bağlanması banklara tövsiyə edilir. Yəni Prezidentin məlum fərmanında kreditin milli valyutaya çevrilməsi nəzərdə tutulmur. Fərmanın birinci və ikinci hissəsi arasındakı fərq ondan ibarətdir ki, kompensasiya məsələsi banklar üçün məcburidir. Fərmanın ikinci hissəsi isə banklara tövsiyə olunur. Yəni bank fərmanın ikinci hissəsindən irəli gələn məsələni icra edə də, etməyə də bilər. Prinsipcə, borc məbləğindən öncədən müəyyən ödəniş də tələb edə bilər. Söhbət bundan gedirsə, hesab etmirəm ki, bank fərmanı pozub. Bəzən vətəndaşlar fərmanda görmək istədiklərini görürlər. Amma fərmanda kreditin milli valyutaya keçirilməsi barədə heç nə yoxdur”.
Həmsöhbətimiz onu da əlavə etdi ki, banklar bəzən vətəndaşlardan əlavə gəlir əldə etmək istəyirlər. Bu kimi problemlərin həll olunması üçün bank sektorunun qısa müddətdə sağlamlaşdırılmasına ehtiyac var.
Günel CƏLİLOVA
