Paytaxtın ən gözəgəlimli, insanların gəliş-gedişinin gur olduğu ərazilərində, eləcə də ticarət üçün əlverişli olan yerlərdə müxtəlif obyektlərin tikilməsi artıq adətə çevrilib. Bu azmış kimi, yaşayış binalarına bitişik də müxtəlif ticarət obyektləri, restoran və dönərxanalar, alış-veriş mərkəzləri inşa olunur.
Ərazidə yaşayan sakinlərin ciddi narazılığına baxmayaraq, yenə sahibkarlar yaşayış binalarına bitişik obyektlər inşa etdirməkdə davam edirlər. Hətta sakinlər dəfələrlə bununla bağlı əlaqədar qurumlara da müraciət ediblər, lakin əksər halda tikintini dayandırmaq mümkün olmayıb. Yeri gəlmişkən, bu günlərdə analoji problemlə əlaqədar Yasamal rayonu ərazisində yerləşən binalardan birinin sakinləri əlaqədar qurumlara müraciət ediblər. Onlar yaşadıqları binaya bitişik obyektin insaşının dayandırılmasını tələb edirlər.
Son dövrlər yaşayış binalarında yanğın hadisələrinin artmasının, qaz sızmaları yaranmasının əsas səbəblərindən biri kimi həmin binalara bitişik obyektlərin olması göstərilir. Yəni bu obyektlərdə təhlükəsizlik tədbirləri lazımi səviyyədə həyata keçirilmədiyi üçün, orada baş verən yanğın, qaz sızması və digər hallar yaşayış binalarına da keçir.
Məlumdur ki, yerli qurumlar özləri də bir sıra hallarda problemin qarşısını almaq üçün çalışdıqlarını bəyan etsələr də, nəticədə yenə də obyektlər inşa olunur.
Yaşayış binalarına bitişik obyektlərin inşasının qarşısının tam olaraq alınmamasının səbəbi nə ilə bağlıdır?
“Çox təəssüf ki, bəzi məmurlar, əlaqədar təşkilatların təmsilçiləri qohumluğu, korrupsiya və rüşvəti öz vəzifə borclarından üstün tuturlar”
Sosial-iqtisadi sahə üzrə tanınmış ekspert İlqar Hüseynli “Bakı-Xəbər”ə bildirdi ki, bu problemin tam olaraq öz həllini tapa bilməməsinin əsas səbəbi həmin əraziləri sahibkarlara satan məmurlardır. O qeyd etdi ki, bəzi icra hakimiyyəti orqanlarının, eləcə də digər aidiyyəti qurumların məsul şəxsləri pul müqabilində yaşayış binalarının ətrafını sahibkarlara satır, sahibkarlar da binalara bitişik obyektlər tikib pul qazanırlar. “Bu olduqca ciddi və aktual bir problemdir. Bilirsiniz, hansısa yaşayış binalarının yanı, yaxınlığı boşdursa, mütləq ora hansısa bir sahibkar göz qoyur. Sahibkarın pul qazanmaq üçün bu əraziləri əldə etmək istəyi, orada obyekt inşa etmək arzusu təbiidir, amma gərək yerli qurumlar buna şərait yaratmasınlar. Sahibkarlar binalara bitişik obyektləri özbaşına, icazəsiz tikmirlər ki, onlara burada tikinti aparmaq üçün icazəni icra hakimiyyətləri, eləcə də şəhərsalma və arxitektura təşkilatı, həmçinin də bələdiyyələr və s. verirlər. Bəzi dövlət qurumları ərazinin obyekt tikintisi üçün yararlı olub-olmadığını araşdırmadan, yaxud yaşayış binalarına bitişik tikilərsə, onun yaradacağı fəsadları nəzərə almadan tikinti ilə bağlı sərəncam verirlər. Çox təəssüf ki, bəzi məmurlar, əlaqədar təşkilatların təmsilçiləri qohumluğu, korrupsiya və rüşvəti öz vəzifə borclarından üstün tuturlar. Əslində, bunun qarşısı çox ciddi cəhdlə alınmalıdır. Hesab edirəm ki, bu məsələdə məsuliyyəti ən çox yaşayış binalarına bitişik obyektlərin tikintisini sənədləşdirən, onun inşasına icazə verən məmurlar, dövlət orqanlarının əməkdaşları daşıyırlar. Sahibkar istəyir daha çox obyektə sahib olsun, daha çox ərazi əldə etsin. Bu da sözsüz ki, sakinlərin narahatlığına gətirib çıxarır. Vətəndaş görəndə ki, sahibkarın inşa etdirdiyi bina onun təhlükəsizliyini zərbə altında qoyur, sahibkara qarşı tələblər irəli sürür, amma nəticədə heç nəyə nail ola bilmir. Çünki sahibkar ona “daşdan keçən” sənəd təqdim edir”.
İ.Hüseynli hesab edir ki, yaşayış binaları üçün böyük təhlükə yaradan obyektlərin inşasının qarşısının alınması üçün əlaqədar qurumların məsuliyyəti artırılmalıdır. Onun sözlərinə görə, dövlət qurumları kor-koranə şəkildə tikintilərə icazə verməməlidirlər. Yaşayış binalarına bitişik inşa edilən obyektlərin binalar üçün təhlükə mənbəyi olduğunu istisna etməyən İ.Hüseynlinin fikrincə, aidiyyəti qurumların məsul şəxsləri özləri bu cür tikililərin qarşısının alınması istiqamətində işlər görməlidirlər.
İradə SARIYEVA
