Son vaxtlar Azərbaycanda əhali, xüsusilə uşaqlar arasında yeni bir xəstəlik yayılıb. Həkimlər bədəndə səpki, ishal, qusma simptomları ilə müşayiət olunan bu xəstəliyin koksaki virusu olduğunu bildirirlər. Səhiyyə Nazirliyi açıqlamasında ölkədə bu virusun olduğunu təsdiqləyib. Nazirlikdən bildirilib ki, Azərbaycanda koksaki virusuna yoluxma halları var. Artıq bəzi şəxslərə koksaki diaqnozu qoyulub.
Qeyd edək ki, hüceyrədaxili parazit sayılan koksaki virusuna yoluxan insanlarda qızdırma, ishal əlamətləri, səpki özünü göstərir. Koksaki virusu qrip virusu kimi insanlara daha çox hava-damcı yolu ilə keçir. Buna görə də xəstəlik insanlar arasında sürətlə yayılır. Bu virusa məktəbəqədər və məktəbyaşlı uşaqlar daha çox yoluxurlar.
Onu da bildirək ki, adıçəkilən virusun ölkəyə Ukrayna vasitəsilə keçdiyi bildirilir. Hazırda Ukrayna vətəndaşları koksaki virusundan əziyyət çəkirlər. Həmin ölkədən ölkəmizə gələnlər müxtəlif yolla qeyd olunan virusu vətəndaşlara yoluxdurublar.
Səhiyyə Nazirliyinin baş infeksionisti Cəlal İsayev mediaya açıqlamasında qeyd edib ki, bu xəstəliyin diaqnozu reaktivlərlə qoyulur: “Qeyd olunan xəstəliyə yoluxanlar həkim nəzarəti altında müalicə olunmalıdırlar. Onlar gün ərzində çoxlu maye qəbul etməli, qidalanma zamanı meyvə-tərəvəzdən istifadəyə üstünlük verməlidirlər. Koksaki virusuna yoluxan bəzi şəxslərdə mədə-bağırsaq pozğunluğu da olur. Bunu da qidalanma zamanı nəzərə almaq lazımdır. Onu da qeyd edim ki, adətən koksaki xəstəliyinə yoluxanlar bunu yüngül keçirir, onun orqanizmdə elə bir fəsadı olmur. Amma xəstə özbaşına dərman qəbul etməməli, müalicəsini həkim nəzarəti altında aparmalıdır".
Respublika Gigiyena və Epidemiologiya Mərkəzi - Afaq Əliyeva: “Koksaki virusunun olması, ölkədə yayılması ancaq laborator yolla təsdiqini tapa bilər”
Respublika Gigiyena və Epidemiologiya Mərkəzinin baş direktorunun epidemiologiya məsələləri üzrə müavini Afaq Əliyeva bizimlə söhbətində bildirdi ki, koksaki virusu Azərbaycanda qeydiyyata alınmayıb: "Bizdə, ümumiyyətlə, indiyə qədər koksaki virusu qeydə alınmayıb. Bu virusun olması ancaq laborator yolla təsdiqini tapa bilər. Belə halda, virusun olduğu qeydiyyata alınır".
Nəsib Quliyev: “Bir-iki nəfərdə virusun aşkar olunması onun ciddi şəkildə yayılması demək deyil”
Pediatr Nəsib Quliyevin sözlərinə görə, bu virus epidemik halda yayılmayıb, tək-tək yoluxma var: "Koksaki virusuna ilk dəfə ABŞ-ın Koksaki şəhərində rast gəlinib. Bu virus uzun müddətdir ölkəmizdə müşahidə edilir. Əslində, bu virusun ölkəmizdə yayıldığını demək düzgün deyil. Çünki epidemik halda yox, tək-tək xəstələrdə tutulma olur. Payız, qış aylarında uşaqlar arasında xəstəlik törədən viruslara yoluxma halları daha çox baş verir. Bu elə də sensasion hal deyil. Bir-iki nəfərdə virusun aşkar olunması onun ciddi şəkildə yayılması demək deyil”.
Adil Qeybulla: “Koksaki virusu Azərbaycana Ukraynadan keçib”
Professor, həkim-ekspert Adil Qeybulla bildirdi ki, Azərbaycanda xüsusən uşaqlar arasında bədəndə səpki, ishal, qusma simptomları ilə müşayiət olunan koksaki virusu xəstəliyi son zamanlar geniş yayılıb: “Koksaki virusu Azərbaycana Ukraynadan keçib. Virus həyatın qeyri-hüceyrəvi formasıdır. İstər qrip, istərsə də virusun digər növləri olsun, bütün bunlar orqanizmə, genlərə dağıdıcı təsir göstərir. Virusların hər bir ştamının insan sağlamlığına müxtəlif cür təsirləri olur”.
Həmsöhbətimiz koksaki virusuna qarşı mübarizədə sərhəd nəzarətini gücləndirməyi tövsiyyə etdi: "Bu cür infeksiyalar yayılanda, ilk növbədə, sərhəd zonalarında nəzarəti gücləndirməliyik. Elə bir şərait yaratmalıyıq ki, belə şübhəli xəstəliklər mümkün qədər Azərbaycan sərhədini keçməsin. Bu xəstəliyə tutulanları karantində saxlamaq lazımdır. Çünki infeksiya həmişə olmur. Baş verən halda isə dediyim tədbirlər görülməlidir. Belə hallarda xəstələr izolyasiya olunmalıdırlar. Qeyd olunan virusun digərlərinə keçməsinin qarşısını almaq üçün dərhal izolyasiya olunmalıdırlar. İstənilən belə infeksiyalar zamanı yüksək hərarət, ümumi halsızlıq və s. nəzərə çarpır. Bunlar olduğu halda, həmin şəxslər digərlərini yoluxdurmamaq üçün mütləq izolyasiya olunmalıdırlar. Yəni karantin tədbirləri görülməlidir. Bu kimi tədbirlər görülməsə, həmin infeksiyanı lokallaşdırmaq mümkünsüzdür. Nəticədə də böyük insan qrupu belə virus xəstəliyinə tutulur. Hətta koksaki virusu zamanı bəzən müəyyən fəsadları, ağırlaşmalar qalır. Onun yaratdığı dərin təsirlərin fərqində olmadığımız halda ola bilər ki, həmin viruslar bir müddət sonra hansısa bir xəstəliyin əsasını qoysun. Ona görə də bu məsələdə diqqətli olmaq lazımdır. Qarşıdan qış fəsli gəlir və bu dövrdə həmin infeksiyanın yenidən artması təhlükəsi gözlənir. Gürcüstan, digər qonşu ölkələr, habelə Avropadan belə infeksiyalar daxil ola bilər. Bir ara quş qripi də məhz bu şəkildə yayılmışdı. Yalnız Ümumdünya Səhiyyə Təşkilatının köməyilə onu lokallaşdırmaq mümkün oldu. Təəssüflər olsun ki, koksaki virusuna ölkədə nə qədər insanın tutulduğu barədə bir söz deyə bilməyəcəyik. Rəsmi statistika da bəzən dəqiq demir”.
Günel CƏLİLOVA
