Azərbaycan orta məktəblərində tədris edilən resursların heç də hamısı ölkəmizdə istehsal edilmir. Xarici ölkələrdən də idxal olunan kifayət qədər tədris resursu, materialı, nəşri var. Məsələn, belə iddialar var ki, Azərbaycana ən çox bu cür vasitələr Çindən idxal olunur. Buna da səbəb kimi Çin məhsullarının ucuzluğu göstərilir. Ümumiyyətlə, təkcə Çindən deyil, digər ölkələrdən də məhsullar alırıq və onu yerli bazarda satırıq.
Yeri gəlmişkən, Azərbaycana qarşı həmişə qərəzli mövqeyi və apardığı qarayaxma kampaniyası ilə aktiv olan erməni mediası yazıb ki, guya Azərbaycan orta məktəblərində Çin istehsalı olan qlobuslardan istifadə edilir və həmin qlobuslarda Dağlıq Qarabağ və Naxçıvan Ermənistan əraziləri kimi göstərilib. Qlobus məsələsi erməni mediasının əsassız iddiası da ola bilər. Əlbəttə, Naxçıvan və Dağlıq Qarabağ ermənilərin ən böyük xülyasıdır. Naxçıvan və Dağlıq Qarabağ Azərbaycanın tarixi torpağıdır və ayrılmaz hissəsidir.
Ölkəmizə başqa ölkələrdən idxal olunan dərs vəsaitlərinin, tədris resurslarının, xəritələrin, qlobusların, müxtəlif cihazların yoxlanması, ekspertizadan keçirilməsi, bir sıra resursların Azərbaycanın milli ideologiyası, milli-mənəvi dəyərləri, dövlətçilik prinsipləri ilə uyğunluq təşkil etməsi əsas götürülməlidir. Ölkəmizə idxal olunan tədris resurslarının ekspertizası keçirilirmi?
“...dövlətçiliyimiz, milli-mənəvi dəyərlərimiz üçün təhlükəli olan informasiyalarla dolu vəsaitlər də gətirirlər”
Tarix üzrə fəlsəfə doktoru, tanınmış təhsil mütəxəssisi Kamran Əsədov “Bakı-Xəbər”ə bildirdi ki, xarici ölkələrdən Azərbaycana idxal edilən tədris resurslarının hər biri incələnməli, yoxlanmalıdır.
“Çox təəssüf ki, Azərbaycanda xaricdən ölkəmizə idxal edilən tədris vəsaitlərini, resursları, xəritələri, qlobusları, eləcə də başqa nümunələri ekspertizadan keçirəcək bir qurum yoxdur. Hesab edirəm ki, Təhsil Nazirliyi yanında xaricdən idxal edilən tədris vəsaitlərinin ekspertizasını həyata keçirən bir qurum yaradılmalıdır. Ölkəmizə idxal olunan tədris resursları yalnız gömrükdə yoxlanır və təbii ki, o məhsulları gətirən işbazlar, gömrük əməkdaşları bu vəsaitlərin məzmunundan xəbərdar olmurlar. Baxırlar ki, xəritədir, qlobusdur, kimya laboratoriyasında istifadə edilən cihazdır, yaxud kitabdır, buraxırlar. Onların bu vəsaitlərin məzmunundan xəbərləri olmaya bilər. Dünya təcrübəsində belədir ki, ölkəyə gətirilən, idxal olunan istənilən tədris vəsaiti bütöv şəkildə yoxlanır, ekspertizadan keçirilir və sonra onun satışına icazə verilir. Xaricdə ekspertizadan keçməyən heç bir məhsulu bazara çıxarmırlar. Bizdə isə təəssüf ki, belə deyil. Təəssüflər olsun ki, bəzi işbaz şirkətlər ölkəmizə dövlətçiliyimiz, milli-mənəvi dəyərlərimiz üçün təhlükəli olan informasiyalarla dolu vəsaitlər də gətirirlər. Burada Azərbaycana qarşı ərazi iddialarının yer aldığı xəritələrə, qlobuslara, eləcə də üzərində Azərbaycanın milli-mənəvi dəyərlərinə, şagirdlərin yaş psixologiyasına zidd olan şəkillər olan albomlara, vəsaitlərə də rast gəlinir. Bir də görürsən ki, xarici ölkələrdən biologiya dərsinə aid hansısa bir vəsait gətirilib, amma onun içindəki şəkillər Azərbaycanın milli-mənəvi dəyərlərinə ziddir.
Ona görə də ölkəyə gətirilən dərs vəsaitlərinin, tədris resurslarının yoxlanılması üçün ekspertiza qurumu olmalıdır ki, bütün vəsaitlərə onlar nəzarət etsin”.
K.Əsədov hesab edir ki, bu işə nəzarət olmasa, işbazlar pul qazanmaq naminə hər cür vəsaitlər gətirə bilərlər. Bizdə təəssüf ki, bu sahədə nəzarət mexanizminin olmadığını deyən K.Əsədov, həmçinin, hesab edir ki, artıq Azərbaycan özü xəritə, qlobus, digər tədris üçün gərəkli olan resurslar istehsal etməyə çalışmalıdır. Ölkəmizin buna potensialının və imkanlarının yetdiyini deyən K.Əsədov bildirir ki, Azərbaycan bu vəsaitlərlə ölkə məktəblərini təmin etdikdən sonra xaricə də ixrac edə bilər. “Bir çox hallarda Çindən və digər ölkələrdən nəzarət olmadan gətirilən bu əlavə vəsaitlər orta məktəblərə ayaq açırlar. Ölkənin 4472 orta ümumtəhsil məktəbində 1,6 milyon şagird təhsil alır, bu kifayət qədər böyük bir kontingentdir. Hesab edirəm ki, Azərbaycan özü artıq tədris resursları istehsal etməli və bu resurslarla həm ölkə məktəblərini təmin etməli, həm də ixracçı ölkəyə çevrilməlidir” - deyə K.Əsədov vurğuladı.
İradə SARIYEVA
