Xəbər verildiyi kimi, Azərbaycanda həkim səhlənkarlığı və ehtiyatsızlığı nəticəsində xəstəyə dəymiş zərər ödəniləcək. Bu, Nazirlər Kabinetinin sərəncamı ilə təsdiqlənmiş “Sığorta sektorunun inkişafına dair 2019-2021-ci illər üçün Tədbirlər Planı”nda əksini tapıb.
Bununla əlaqədar Maliyyə Bazarlarına Nəzarət Palatası, Səhiyyə Nazirliyi, İcbari Tibbi Sığorta üzrə Dövlət Agentliyi və Maliyyə Nazirliyinə 2019-2020-ci illər ərzində həkimlərin peşə məsuliyyətinin icbari sığortası növünün yaradılmasına dair qanun layihəsi hazırlamaq və təqdim etmək tapşırılıb. Maliyyə Bazarlarına Nəzarət Palatası, Səhiyyə Nazirliyi, İcbari Tibbi Sığorta üzrə Dövlət Agentliyi və Maliyyə Nazirliyi qanun qəbul edildikdən sonra, 2020-2021-ci illərdə həkim səhlənkarlığı və ehtiyatsızlığı nəticəsində xəstəyə dəymiş zərərin ödənilməsi mexanizminin tətbiq olunmasını təmin etməlidirlər.
Məlumdur ki, dəfələrlə həkim səhlənkarlığı və ya ehtiyatsızlığı nəticəsində xəstəyə zərər dəyib. Bu kimi halların qarşısını almaq üçün xəstəyə həkim tərəfindən dəymiş ziyan geri ödəniləcək. Ekspertlər bu qərarı müsbət qarşılayırlar.
Adil Qeybulla: “Qərb təcrübəsini tətbiq etmək lazımdır”
Məsələ ilə bağlı fikir bildirən professor, tibbi ekspert Adil Qeybulla bildirdi ki, həkimin səhv diaqnozu nəticəsində xəstənin sağlamlığına ziyan dəyibsə və xəstə vəfat edibsə, həkim ehtiyatsızlıq ucbatından baş verən cinayətə görə hüquqi məsuliyyət daşımalıdır: “Ölüm halı qeydə alınmayıbsa, qeyri-düzgün diaqnoz nəticəsində xəstənin sağlamlığına ciddi zərər dəyibsə, Qərb təcrübəsini tətbiq etmək lazımdır. Qərb praktikasına görə, xalqa xidmət edən bütün sahə işçiləri öz peşə fəaliyyətlərini sığortalayırlar. Daha sonra vətəndaşa hər hansı zərər dəysə, sığorta şirkətləri həmin zərəri qarşılayırlar. Bizdə də bu cür tətbiqlər var, ancaq həkimlər hələ ki, bu üsuldan istifadə etmirlər”.
Həmsöhbətimiz onu da vurğuladı ki, Amerika kimi inkişaf etmiş ölkələrdə də səhv diaqnoz, yanlış dərman qəbulu nəticəsində ölən yüzlərlə insan var. Bu ciddi məsələdir. Ölkəmizdə belə halların baş verməməsi üçün tədbirlər görülür. "Xəstəyə dəyən zərər həkimin səhvi ucbatından baş veribsə və təsdiqlənibsə, o, hüquq- mühafizə orqanları tərəfindən cəzalandırılır".
Ekspertin sözlərinə görə, həkim ehtiyatsızlığı ucbatından xəstəyə dəymiş zərərin ödənilməsi icbari tibbi sığorta vasitəsilə təmin olunur. Bu, islahatların çox mühüm tərkib hissəsidir. Həmçinin, sosial müdafiənin də mühüm hissəsidir. İcbari tibbi sığortasız, ümumiyyətlə, səhiyyənin beynəlxalq standartlara uyğunluğunu təsəvvür etmək mümkün deyil: “Səhiyyədə beynəlxalq, Qərb standartı deyiriksə, ilk növbədə, icbari tibbi sığorta və onun səviyyəsindən söhbət gedir. Baxmayaraq ki, 20 il öncə bu qanun Prezident tərəfindən imzalanıb, amma indiyədək həyata keçirilməyib. Azərbaycanda icbari tibbi sığortanın müəyyən edilməsi problemdir. Əvvəla müəyyən kateqoriyadan olanlar, gəlirləri minimal olan və olmayan, tələbələr, təkuşaqlı analar, aztəminatlı ailələr və s. bunlar birbaşa dövlət büdcəsindən maliyyələşməlidirlər. İşləməyən və əmək pensiyasında olan işsizlər, əslində, əmək pensiyasından maliyyələşməlidir. Bizdə əmək pensiyası praktikası olmadığına görə işsizlər də dövlətin çiyninə düşür. Qalır dövlət və özəl sektorda işləyənlər, məmurlar və yüksək gəlirli biznesmenlər. Bunların da maliyyələşməsi işləyənlər öz maaşından, yüksək gəlirli biznesmen və məmurlar da xüsusi sığortalarına görə olur. Əhalinin bütün kateqoriyaları sığorta paketinə sahib olur və sığorta vəsiqəsi əldə edir. Bununla da proses başlayır”.
Günel CƏLİLOVA
