Yay mövsümünün gəlişi ilə əlaqədar əqrəb və ilan sancmaları artmağa başlayıb. Hər il yay mövsümündə ilan və əqrəblərin aktivləşməsi müşahidə olunur.
Açıqlanan statistik rəqəmlərə əsasən, keçən il Azərbaycanda, ümumilikdə, 106 nəfəri ilan sancıb. 2018-ci ildə qara qurd sancmasına görə 16, əqrəb sancması səbəbindən 24 nəfər həkimə müraciət edib. Bu ilin aprel-may-iyun aylarında, ümumilikdə, 44 nəfər ilan sancma ilə əlaqəli 1 saylı Kliniki Tibbi Mərkəzin Toksikologiya şöbəsinə müraciət edib. Müraciət edənlər Şirvan, Hacıqabul, Şamaxı, Qəbələ, Şəmkir, Tovuz, Yevlax və Gəncə sakinləridir. İlan sancmasından ölüm faktı qeydə alınmayıb.
Bu ilin may ayında 1 nəfəri qara qurd sancıb, 2 şəxsi isə əqrəb sancıb. İyun ayında isə daha 7 nəfər eyni diaqnoz ilə 1 saylı Kliniki Tibbi Mərkəzin Toksikologiya şöbəsinə yerləşdirilib.
İlan və əqrəb sancma paytaxt Bakı ilə müqayisədə daha çox bölgələrdə qeydə alınır. İlan və ya əqrəb sancan şəxs dərhal rayon xəstəxanasına aparılır ki, bu sahə ilə məşğul olan toksikoloq ona zərdab vursun və ya lazımi müalicə etsin. Ancaq bu gün bölgələrdə toksikoloq çatışmazlığı yaşanır. Qeyd olunan problemlə üzləşən şəxslər çarəsizlikdən Bakıya üz tuturlar. Bölgələrdə toksikoloq çatışmazlığının səbəbini öyrənmək üçün mütəxəssislərə müraciət etdik.
Azər Maqsudov: “Regionlarda yerləşən xəstəxanalarda mütəxəssis toksikoloqun olmaması problem yaratmır, çünki orada olan reanimotoloqlar xəstənin ilkin vəziyyətini qiymətləndirə bilirlər”
1 saylı Kliniki Tibbi Mərkəzin Toksikologiya şöbəsinin müdiri, Azərbaycanın baş toksikoloqu Azər Maqsudov bildirdi ki, həşərat və ilan sancmaları əsasən aprel-may aylarından başlayır və noyabr ayına kimi davam edir. Bu problemlə bağlı əsasən Bərdə, Yevlax, İsmayıllı, Hacıqabul, Şamaxı, Qax, Şəki və Tovuzdan da tez-tez müraciət edilir: “İlan sancması ilə xəstəxanaya daha çox cavanlar gətirilir. Hazırda rayon mərkəzi xəstəxanalarının çoxunda həkim-toksikoloq yoxdur. Ancaq Gəncə, Mingəçevir və Lənkəranda bu sahə üzrə mütəxəssis var. Son iki ildir qeyri-ixtisas həkimləri öz iş yerlərini saxlamaqla toksikologiya ixtisası üzrə bir aylıq kurslar keçərək yenidən qayıdıb işlərini davam etdirirlər. Regionlarda yerləşən xəstəxanalarda mütəxəssis toksikoloqun olmaması problem yaratmır. Çünki orada olan reanimotoloqlar xəstənin ilkin vəziyyətini qiymətləndirə bilirlər. Bundan başqa, Səhiyyə Nazirliyinin sanaviasiya xidməti də var ki, ehtiyac olduqda bir neçə saata mütəxəssislərimiz lazımi yerə çatır. İlan sancması, zəhərlənmə və digər hallarda rayonlarda olan başqa sahə üzrə mütəxəssislər bizdən məsləhət ala bilirlər. Xəstənin vəziyyəti ağır olanda isə mütəxəssislər yerindəcə baxış keçirir və ehtiyac yarandığı təqdirdə Bakıya gətirilməsi barədə qərar verilir”.
Adil Qeybulla: “Bölgələrdə toksikoloq azlığı narahatedici məqamdır”
Professor, həkim-ekspert Adil Qeybulla qeyd etdi ki, bölgələrdə toksikoloq azlığı narahatedici məqamdır: “Məlumat üçün bildirim ki, hazırda Azərbaycan Tibb Universitetində (ATU) kliniki toksikologiya ixtisası ləğv olunub. İnternatura səviyyəsində həmin ixtisas tədris olunur. Başqa ölkələrdə isə həmin adda ayrıca kafedralar fəaliyyət göstərir. Onlar da işini layiqincə yetinə yetirirlər”.
Həmsöhbətimiz onu da vurğuladı ki, ilan və ya digər həşərat sancması daha çox bölgələrdə müşahidə olunur. Ancaq bu gün bölgələrdə toksikoloq çatışmazlığı yaşanır: “Vəziyyəti ağır olan şəxs xüsusi maşınla Bakıya gətirilir. Bölgə xəstəxanasında peşəkar toksikoloq və ya zərdab yetərincə olarsa, xəstənin paytaxta gətirilməsinə ehtiyac yaranmaz”.
Günel CƏLİLOVA
