Dəniz sularının və dənizkənarı zonaların çirklənməsi, bununla əlaqədar ekoloji şəraitin korlanması Xəzər dənizinin əsas problemlərindən biridir. Məlumdur ki, Xəzər dənizinin əsas çirklənmə səbəbləri onun sahillərində yerləşən şəhərlərin və sənaye obyektlərinin çirkab sularının dənizə axıdılmasıdır. Xəzər dənizini çirkləndirən obyekt və qurumlara qarşı müəyyən tədbirlər görülüb.
Ekologiya və Təbii Sərvətlər Nazirliyi (ETSN) Xəzər dənizini çirkləndirən əsas mənbələrin adını ictimaiyyətə açıqlayıb. Adları açıqlanan müəssisələrə Ekologiya və Təbii Sərvətlər Nazirliyi tərəfindən xəbərdarlıq edilib, daha sonra qanun çərçivəsində müəyyən məbləğdə cərimə də tətbiq olunub.
“Bakı-Xəbər” qəzeti olaraq, Xəzər dənizini çirkləndirən obyektlərin adları açıqlananda bu məsələnin aktuallığını nəzərə alıb, həmin müəssisələrlə əlaqə saxladıq. Müəssisə rəhbərlərinin hər biri Xəzər dənizini çirkləndirmədiklərini bəyan etdilər. Ancaq nazirlik isə bildirir ki, artıq Xəzər dənizini çirkləndirən müəssisələrə xəbərdarlıq olunmayacaq və həmin obyektlərin fəaliyyəti tam şəkildə dayandırılacaq.
Ekologiya və Təbii Sərvətlər Nazirliyinin mütəxəssisi Mirsalam Qənbərov media nümayəndələrinə açıqlamasında qeyd edib ki, Xəzər dənizinin şirkət, müəssisə, təşkilat və obyektlər tərəfindən çirkləndirilməsi davam edərsə, onların fəaliyyətinin dayandırılması ilə bağlı aidiyyəti üzrə vəsatət qaldırılacaq: “Çünki bunun digər alternativi yoxdur. Tərəfimizdən dəfələrlə edilmiş xəbərdarlıqlara, bildirişlərə və ünvanlanmış məktublara əhəmiyyət verməyənlərə qarşı artıq bu addımı atmaq məcburiyyətində qalacağıq”
Ekspertlər də Xəzər dənizini çirkləndirən obyektlərin, istirahət mərkəzlərinin bağlanmasına tərəfdardırlar.
Eyyub Hüseynov: “… dövlət qurumları ilə yanaşı, ictimaiyyətin də təzyiqi olmalıdır”
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, ekologiyaya ziyan vuran istənilən müəssisənin fəaliyyəti dayandırılmalıdır: “Xəzər dənizini çirkləndirən istirahət mərkəzlərinin öncə adları ictimaiyyətə açıqlandı. Həmin müəssisələr Xəzər dənizini çirkləndirməmək üçün hər hansı bir tədbir görmədilər. Bu mövzu ilə bağlı həmin obyektlərə dəfələrlə xəbərdarlıq olunub. Xəbərdarlığa əməl etməyən müəssisələrin bağlanması onlar üçün ən böyük cəza olar. Bu cəza obyekt və müəssisə rəhbərləri ilə yanaşı, digərlərinə də dərs olar”.
Həmsöhbətimiz onu da vurğuladı ki, Xəzər dənizinə, ümumiyyətlə, ekologiyaya zərər yetirən müəssisələrə dövlət qurumları ilə yanaşı, ictimaiyyətin də təzyiqi olmalıdır: “Məlumdur ki, Xəzər dənizini çirkləndirən istirahət mərkəzlərinin adları tam şəkildə açıqlanıb. Siyahı ilə tanış olanlar həmin məkanlara getməməlidirlər. Əhali bu cür etiraz vasitəsilə həmin müəssisələrə təzyiq göstərə bilər. Xəzər dənizini qorumaq hər bir azərbaycanlının vətəndaşlıq borcudur”.
Günel CƏLİLOVA
