Göygöl rayonunda ağır yol qəzası nəticəsində ölən və yaralananların adları məlum olub. Bunlar Daşkəsən rayon sakinləri - 1995-ci il təvəllüdlü Eldəniz Gəray oğlu Həsənov, 2018-ci il təvəllüdlü Rübab Eldəniz qızı Həsənova, 1934-cü il təvəllüdlü Firəngiz Dəmir qızı Orucova və 1958-ci il təvəllüdlü Nahidə Qəzənfər qızı Orucova (hamısı "VAZ-2107" markalı avtomobildə olublar), həmçinin, 1986-cı il təvəllüdlü Aslan Əbülfət oğlu Camalov, 1949-cu il təvəllüdlü Həmid Səməd oğlu Bayramov, 1995-ci il təvəllüdlü Sevinc Mehman qızı Camalova və 2016-cı il təvəllüdlü Hüseyn Aslan oğlu Camalovdur. Bundan əlavə, Gəncə şəhər sakini, 1991-ci il təvəllüdlü Ruhiyyə Ramiz qızı Həsənova xəsarət alıb.
Səhiyyə Nazirliyinin mətbuat xidmətinin əməkdaşı Səfayə Əhmədova məlumat verib ki, ölənlərdən 3-ü kişi, 3-ü qadın, 2-si isə uşaqdır. Hadisə Gəncə-Daşkəsən yolunda qeydə alınıb. “VAZ” markalı iki avtomobilin toqquşması nəticəsində baş verib.
Qeyd edək ki, hadisə ilə bağlı Daxili İşlər Nazirliyi də rəsmi məlumat yayıb və həmin xəbərdə hadisədə 8 nəfərin öldüyü rəsmi təsdiqini tapmış olur: “Aprelin 29-da, saat 12 radələrində Göygöl rayonunun Yeni Qızılca kəndi ərazisində Daşkəsən rayon sakinləri Eldəniz Həsənovun idarə etdiyi “VAZ-2107” və Aslan Camalovun idarə etdiyi “VAZ-2106” markalı avtomobillər toqquşub. Nəticədə E.Həsənov və həmyerliləri olan sərnişinləri Nahidə Orucova, habelə A.Camalov və həmyerliləri olan sərnişinləri Həmid Bayramov hadisə yerində, eləcə də E.Həsənovun qızı Rübab və digər sərnişini Firəngiz Orucova, A.Camalovun oğlu Hüseyn və arvadı Sevinc Camalova isə xəstəxanada ölüblər. E.Həsənovun digər sərnişini – arvadı Ruhiyyə Həsənova xəstəxanaya yerləşdirilib.
Baş İstintaq və Təhqiqat İdarəsi tərəfindən araşdırma aparılır”.
Göründüyü kimi, çoxlu sayda insan tələfatı ilə nəticələnən hadisə iki köhnə sovet istehsalı olan “VAZ” markalı avtomobilin toqquşması nəticəsində qeydə alınıb. Yayılmış fotolardan da görünür ki, avtomobillər köhnədir, ən azı, 30 ildən yuxarı istismar müddəti var. Müşahidələr göstərir ki, bu avtomobillərdən adətən rayon yerlərində daha çox istifadə edilir. Ancaq gəlin razılaşaq ki, köhnə avtomobillərin təhlükəsizlik parametrləri, demək olar ki, yoxdur. Bu qəza bəlkə də yeni növ avtomobillərin toqquşması nəticəsində baş versəydi, insan ölümü bu qədər olmazdı. Təəssüf ki, bu problem həllini tapmayıb. Bundan sonra da biz analoji hadisələrin şahidi ola bilərik. Bunun üçün köhnə avtomobillərin utilizasiyasının aparılması zərurəti meydana çıxır. Qeyd edək ki, alternativ kimi, həmin şəxslər yerli istehsal olan, nisbətən ucuz qiymətə satılan avtomobillərlə öz parklarını yeniləyə bilərlər.
Ərşad Hüseynov: “Statistikaya görə, ölkəmizdəki avtomobillərin təxminən yarısı müasir təhlükəsizlik tələblərinə cavab vermir”
Nəqliyyat məsələləri üzrə ekspert Ərşad Hüseynov “Bakı-Xəbər”ə açıqlamasında bildirdi ki, belə bir addımın atılmasına doğrudan da ehtiyac var: “Biz aprelin 29-da baş vermiş qəzadakı avtomobilləri gördük. Hər ikisi sovet istehsalı olan, ötən əsrin 70-ci illərinə aid modellərdir. Buna zərurət olsa da, ağır bir prosesdir. Yəni spontan olaraq, düşüb köhnə avtomobilləri yığmaq olmaz. 2018-ci ilin dekabr ayında “Yol hərəkəti təhlükəsizliyinə dair” Dövlət Proqramı qəbul edildi. Həmin proqramda utilizasiya nəzərdə tutulur. Ancaq bu elə bir prosesdir ki, gərək bütün parametrlər nəzərə alınsın. Bu dəqiqə Azərbaycan qanunvericilik aktlarına nəzər salsanız, orada utilizasiyadan heç söhbət belə getmir. Yalnız ötən il qəbul edilən proqramdan başqa. Proqramda nəzərdə tutulur ki, utilizasiya ilə bağlı ayrıca bir tədbirlər planı hazırlanmalıdır. Orada konkret göstərilməlidir ki, bu, hansı avtomobillərə şamil olunacaq, hansı qurum bu tədbirləri həyata keçirəcək, proqram kim tərəfindən maliyyələşdiriləcək və s. Bu sualların cavabı tapılmadığı üçün, proses həyata keçirilə bilmir. Bu səbəbdən də qanunvericilikdə olan boşluqdan yararlanan vətəndaşlarımız sovet dövründən qalan avtomobilləri istifadə edirlər. Formal olaraq belə avtomobil yararlı sayılır. Hansısa qurum onun idarə olunmasına etiraz edə bilmir. Qanunvericilik imkan versə, bu amillə ciddi mübarizəyə start verilər və olduqca zəruridir. Çünki ölkəmizin avtomobil parkının yenilənməsi həm də vətəndaşlarımızın ölüm risqlərini azaltmış olar. Yəqin ki, bu cür hadisələrin baş verməsi prosesi sürətləndirə bilər. Statistikaya görə, ölkəmizdəki avtomobillərin təxminən yarısı müasir təhlükəsizlik tələblərinə cavab vermir”.
Məhəmmədəli QƏRİBLİ
