Azərbaycan Yazıçılar Birliyinin sədri, Xalq yazıçısı Anar Rzayev bir neçə gün əvvəl intihar edərək dünyasını dəyişən Elinanın ölümündə təqsiri olduğu iddia edilən və azyaşlı qızın son görüntülərini telefona çəkən Səbail rayon icra başçısının müavini Xalidə Bayramovanı müdafiə edən məqalə ilə çıxış edib.
Yazıçı bu məsələdə X.Bayramovanın günahının olmadığını bildirib. Anar Rzayevin bu hərəkəti birmənalı qarşılanmayıb və sosial şəbəkələrdə ciddi müzakirələrə səbəb olub. Ən maraqlısı budur ki, bu hərəkətə etiraz edənlər Anarın müəllifi olduğu kitabları yandırmaq, onlardan imtina etmək kimi çağırışlar ediblər. Bizim üçün bu məsələdə maraqlı olan kitaba bəslənən münasibətdir. Hansısa müəllifin mövqeyi kiminsə xoşuna gəlməyə bilər və bu təbiidir. Buna etiraz etməyin müxtəlif sivil yolları var. Bu baxımdan, fikri ilə razılaşılmayan müəlliflərin kitablarının məhv edilməsi, onlardan imtina ilə bağlı səslənən çağırışları necə qarşılamaq olar?
Əkbər Qoşalı: “Kitab yandırma kimi aksiya gətirib sonda kitabsızlığa çıxarır”
Atatürk Mərkəzinin şöbə müdiri, şair-publisist Əkbər Qoşalı “Bakı-Xəbər”ə açıqlamasında bildirdi ki, belə addımların atılmasını təqdir etmir: “Azərbaycan ədəbiyyatı tarixində özünəməxsus yeri və rolu həm xalq, həm də dövlət tərəfindən etiraf edilən bir yazıçının kitablarını məhv etməyə olan çağırış qəbuledilməz hərəkətdir. Kitab yandırma kimi aksiya gətirib sonda kitabsızlığa çıxarır. Zaman-zaman bizim aid olduğumuz coğrafiyada kitabsızlıq bir qarğış növü kimi səslənib. Mən yazıçıların arasında fərq qoymaq istəmirəm. Ümumiyyətlə, hesab edirəm ki, belə bir hərəkət heç bir müəllifə qarşı olunmamalıdır. Yaradıcı adamın yazdığı kitablara qiyməti həm zaman verir, həm də oxucu. Ola bilər ki, müəllif gözəl əsərlər yazsın, sonra hansısa pis bir hərəkət etsin. Heç bunun özü də onun əvvəl yazdığı kitablardan imtinaya əsas vermir. Məhz Anar müəllim kimi ziyalıların səyi nəticəsində Azərbaycanda kitaba maraq çoxalıb, bu yöndə çox mühüm işlər görülüb. Yazıçıya əsərlərinə görə qiymət verilməlidir. Anar müəllimin yazdığını bəyənməyənlər ondan daha yaxşı əsər yazmağa cəhd etməlidirlər. Hansısa hadisəyə münasibət yazıçının tərcümeyi-halını müəyyənləşdirə bilməz. Yazıçıya qiyməti onun əsərlərinə görə verirlər. Anar müəllim yalnız ölkə səviyyəsində tanınmır. Ona bizim bəslədiyimiz münasibətə görə bizə qiymət verəcəklər. Bunu mütləq nəzərə almalıyıq. Narazılıq sivil formada olmalıdır, hadisəyə adekvat şəkildə özünü göstərməlidir. Şəxsən mənim özümün də hər hansı bir məsələdə Anar müəllimlə razılaşmadığım vaxtlar olub. Bu, sabah da ola bilər. Amma bu heç də əsas vermir ki, mən onun yaradıcılığından qisas alım”.
Məhəmmədəli QƏRİBLİ
