Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, "Kimsəsiz Uşaqların Sosial Müdafiəsi" İctimai Birliyinin təşkilatçılığı ilə Gəncə Uşaq Evində "Valideynlərini itirmiş və valideyn himayəsindən məhrum olmuş uşaqların psixoloji reabilitasiyası" adlı layihə həyata keçirilir. Üç aylıq layihə çərçivəsində valideyn himayəsindən məhrum olan uşaqlara, ixtisaslı psixoloq tərəfindən psixloji reabilitasiya xidməti göstərilir. Reabilitasiya xidməti on iki mövzu ətrafında aparılır. Uşaqlarla keçirilən hər seans ayrı-ayrı mövzulara həsr olunub. Bu gün Gəncə uşaq sığınacağında uşaqlarla reabilitasiyanın ikinci seansı keçirildi. İkinci seans "uşaqlarda nitq problemlərini yaradan səbəblərin aşkar edilməsi və aradan qaldırılması" mövzusunu əhatə edirdi. Təəssüf ki, dövrümüzün ən aktual məsələlərindən biri, uşaqların nitqindəki problem, nitq ləngimələridir.Təbii ki, bunlar uşağın gələcəkdəki inkişafına, həyatına, təlim fəaliyyətinə, eləcə də psixi inkişafına birmənalı şəkildə mənfi təsir göstərir. Nitqdə yaranmış problem və ya gecikmə, təfəkkürün inkişafına da mane olur. Nitqin inkişafına anadangəlmə zehni və nevroloji xəstəliklərin olması ciddi təsir edən amillərdən biridir. Diaqnoz adətən 5 yaşdan yuxarı uşaqlarda daha çox qoyulur. Lakin 5 yaşlı uşağın nitq ləngiməsinin müalicəsinə başlamaq üçün gecdir.Valideynlər nə qədər tez əlamətlərin fərqinə varıb, aşkar etsələr, ideal olaraq 2 yaşa qədər tam sağalma ümidi var. Bəzi hallarda bu problemlər 5 yaşına kimi biruzə vermədiyi halda, məktəb dövründə daha qabarıq şəkildə özünü bildirir. Nitq problemlərinin yaranma səbəbləri müxtəlifdir, lakin əgər vaxtında aşkar edilərsə və aradan qaldırılarsa, o qədər də ciddi problemə çevrilməz. Nitq inkişafının ləngiməsi sağlam uşaqlarda da müşahidə oluna bilər. Çox vaxt valideynlər özləri də uşağın nitqindəki çətinliklərə səbəb olurlar. Düzgün danışıq və zehni inkişaf üçün fizioloji normalar mövcuddur. Qeyri-düzgün tərbiyə, uşağın ifrat dərəcədə valideyn qayğısında olması yaxud əksinə, qayğıdan məhrum olması, uşaqların assosial ailələrdə böyüməsi, psixoloji travmalar, sağlam ailə mühitində olmaması da nitq inkişafını ləngidir.Uşağın davamlı şəkildə televizora baxması, kompyuter qarşısında zaman keçirməsi, telefon, planşet istifadə etməsi də nitq problemlərinə yol açır. Nəticə etibarilə uşaqlarda özünəqapanma müşahidə olunur. Uşaqların nitqindəki problem, nitq ləngimələrinə həsr olunan, layihə çərçivəsində təşkil olunan bu seans, uşaqların nitqində və psixikasında geriləmənin qarşısını almaq, yaşıdları ilə ünsiyyət qurmalarını asanlaşdırmaq və digər müsbət nəticələr üçün həyata keçirildi. Daha yaxşı nəticələr əldə etmək üçün seansların davamlılığı təmin olunacaqdır.
