Son zamanlar sosial şəbəkələrdə yayılan məlumatlara görə, toylarda pullar bundan sonra terminal vasitəsilə yığılacaq. İddiaya görə, toy mərasimləri, şənliklərin keçiriləcəyi restoran və şadlıq evlərində "TOYPAY" adlı terminal quraşdırılacaq, toya dəvət edilənlər nəməri məhz bu aparat vasitəsilə ödəyəcəklər.
“TOYPAY” şirkətinin direktoru Elşən Quliyev mediaya açıqlamasında bildirib ki, artıq 50 restoran bu təklifə müsbət cavab verib: “Terminallar restoranın foyesində qoyulacaq. Toy etmək istəyən şəxslərə nəmərin elektron qaydada yığılması xidməti restoran sahibi tərəfindən təklif ediləcək. Restoranlar belə bir aparatı bir toy üçün 200 manata kirayələyə bilərlər. Əgər toy sahibi istəsə, “TOYPAY” terminalından istifadə üçün 200 manat icarə haqqı ödəməlidir. Bu aparatdan istifadə toy sahibinin öz istəyindən asılıdır".
Mətbuatda yayılan məlumata görə, toylarda pullar terminal vasitəsilə yığıldığı halda əldə edilən məbləğdən vergi tutulacaq.
Elçin Bayramlı: “Toy və digər məclislərə də biznes kimi baxılması düzgün deyil”
“Altay” Sosial İqtisadi Araşdırmalar Mərkəzinin rəhbəri Elçin Bayramlı bildirdi ki, toya yazılan pullar yeni ailə quran şəxslərə verilən hədiyyədir. Bunun biznes fəaliyyəti ilə əlaqəsi yoxdur: “İnsanlar təbrik üçün toyu olan şəxsə müxtəlif formada yardım edir. Toya yazılan nəmərdən vergi tutula bilməz. Məlumdur ki, kommersiya, biznes fəaliyyəti, davamlı gəlir əldə olunan sahələrdən vergi ödənilir. Toy və digər məclislərə də biznes kimi baxılması düzgün deyil”.
Həmsöhbətimiz onu da əlavə etdi ki, şadlıq evlərində keçirilən toy mərasimləri ilə bağlı restoran sahibi vergi ödəyir. Restoranda göstərilən xidmətlərə görə də vergi məbləği verilir.
Mahir Əhmədzadə: “Azərbaycanda toy bazarı sərfəli olduğundan, müəyyən adamlar istəyir ki, toylarda nəmərlər də terminal vasitəsilə yığılsın”
Restorator-konsultant Mahir Əhmədzadənin sözlərinə görə, təqdimat düzgün, şəffaf aparılsa, nəmərin terminal vasitəsilə yığılması ideyası da insanların marağına səbəb ola bilər: “Artıq iki ildən çoxdur ki, belə bir məsələ müzakirə edilir. Azərbaycanda toy bazarı sərfəli olduğundan, müəyyən adamlar istəyir ki, toylarda yığılan nəmərlər də terminal vasitəsilə yığılsın. Görünür, hansısa şirkət artıq bu ideyanı reallaşdırmaq istəyir. Ona görə də məsələ müzakirəyə gəlib. Toy məclisi şəxsi məsələdir. Bu mənada, həmin məsələdə hər şey toy sahibinin hansı qərara gəlməsindən asılıdır. Proses də ancaq şirkətlə toy sahibi arasında bağlanan müqavilə əsasında mümkün olacaq. Burada əsas məsələ insanların inamına nail olmaq üçün sistemin şəffaf olmasıdır. Hər halda, gələcək bu yeniliyin insanlara nə dərəcədə rahatlıq gətirib-gətirməyəcəyini göstərəcək. Hər dövrün öz tələbi var. Bir vaxtlar toylarda nəməri ancaq dəftərə yazırdılar. Sonradan pulu konvertə qoyaraq qutuya atmağa başladılar. Prosesin məcburi olacağını düşünmürəm”.
Günel CƏLİLOVA
