Təhsil Nazirliyinin təşkil etdiyi MİQ imtahanlarından keçib müəllimlik fəaliyyətinə başlayan şəxslərin müəyyən bir hissəsinin bu gün bürokrarik əngəllərlə üzləşdikləri faktdır. Son günlərdə isə sosial şəbəkələrdə müəllimlərin narazılığını əks etdirən videolar yayılır.
Müəllimlərin işə qəbul edilməsində, MİQ imtahanlarında nələr baş verir? MİQ imtahanından keçən və müəllimlik hüququ qazanan müəllimlər sonradan müsahibə prosesində niyə qanunsuzluqlarla üzləşir?
Ekspertlərin sözlərinə görə, MİQ imtahanının təşkilində də, müsahibə prosesində də kifayət qədər neqativlər var ki, bundan ən çox müəllimlər əziyyət çəkir. Ekspertlərin fikrincə, bu imtahanları təşkil edənlərin sanki məqsədi müəllim ordusunun içərisində dövlətə, hökumətə qarşı narazılıq yaratmaqdır. Müsahibə mərhələsində müəllimlər kəsilir, kəsilmə səbəbləri isə izah edilmir. Müəllimin nə üçün kəsildiyinə əsas göstərilmir.
“Bu qədər hüquq pozuntularına yol versələr də, heç kəs buna görə ürək edib onlara söz deyə bilmir”
Müəllimlər üçün keçirilən müsahibə prosesində baş verənləri şərh edən təhsil eksperti Elşən Qafarov “Bakı-Xəbər”ə bildirdi ki, baş verənlər qanuna ziddir və qəbuledilməzdir. “Hazırkı vəziyyətdə müsahibə mərhələsi qeyri-qanunidir. Çünki müsahibə mərhələsinə gələn həmin müəllimlər artıq 7 aydır ki, işləyirlər. Çox gülünc bəhanələr gətirməklə, qadın müəllimənin hamilə olması səbəbi ilə onlar müsahibə prosesində kəsilir. Halbiki, onlar MİQ imtahanı verəndə hamilə olmayıblar. Bəzi qadın müəllimləri heç bir əsas olmadan hamilə olması səbəbilə müsahibədən kəsirlər. Bəzən dolu bədənli qadınları səhvən hamilə qadınlarla da qarışdırırlar və onları müsahibədən kəsirlər. Ortada heç bir səbəb yoxdur ki, bunu nəyə görə edirlər”.
Müsahibə mərhələsinin mürəkkəb olub-olmamasına gəlincə, E.Qafarov qeyd etdi ki, hazırda keçirilən müsahibə prosesi qanunsuzdur. “Müəllim 7 aydır işləyir və 7 aydan sonra qanunsuz olaraq onlar müsahibəyə cəlb olunur. Bu müəllim 7 aydır işləyir. İşlədikləri məktəbdə müəllimlər, şagirdlər, valdeynlər arasında kifayət qədər nüfuz qazanan adamlar niyə gülünc səbəblərə görə müsahibədən kəsilir? Müsahibə prosesində haqsızlığa məruz qalan müəllimlər məhkəməyə müraciət etməlidirlər. Çünki bu həm dövlət qanunlarının, həm də insanların əmək hüquqlarının ciddi şəkildə pozulmasıdır. Bununla bağlı Baş Prokurorluq cinayət işi qaldırmalıdır. Təhsil Nazirliyinin “imtahan-müsahibə oyunlarını” təşkil edən şəxsləri məsuliyyətə cəlb olunmalıdır”.
“Müsahibə prosesini bu şəkildə aparmalarında, hamilə müəllimələri kəsməkdə məqsədləri nədir? Səbəb nə ola bilər ki, bu cür edirlər” sualına E.Qafarov “bunun səbəbi birdir. Çünki bu insanların təhsillə əlaqələri yoxdur. İllərdir təhsil sahəsində işləsələr də, nə təhsildən, nə də əmək qanunvericiliyindən xəbərləri var. Baxmayaraq ki, ciblərində diplomları var. Sadəcə “papanın gül balaları”dır, Təhsil Nazirliyində işə düzəldiblər. Nə istəyirlər onu da edirlər, çünki bilirlər ki, çevrələrində çox ciddi qohumlar var və o qohumlar onları müdafiə edəcək. Məsələ budur. Bu qədər hüquq pozuntularına yol versələr də heç kəs buna görə ürək edib onlara söz deyə bilmir.
Bu adamların məqsədi ölkədə sosial narazılığı daha artırmaqdır və bu şəkildə nələrsə hazırlamaqdır. Müəllim ordusunu dövlətdən, hökumətdən, Prezidentdən narazı salmaq istəyirlər. O insanların əksəriyyəti xaricdə təhsil alıb. Onların xaricdə necə, nə cür təhsil aldıqları da ortadadır. Düşünürəm ki, bu hakimiyyətə qarşı sosial narazılığı gücləndirmək məqsədi güdürlər. Bu qədər haqsızlığa, qanunsuzluğa yol verməkdə, açıq şəkildə Azərbaycan qanunlarını tapdamaqda, Azərbaycan gəncinin, Azərbaycan müəlliminin hüquqlarını ayaq altına almaqda bir məqsədi var - xalqı hakimiyyətdən narazı salmaq, sosial gərginliyi artırmaq. Başqa bir şey yoxdur. Heç bir məntiqi əsası yoxdur ki, müəllim 7 ay işlədikdən sonra canlı müsahibə edirsən və kəsirlər”.
E.Qafarov deyir ki, tanış-biliş tapanlara toxunulmur, amma qalan müəllimlər müxtəlif bəhanələrlə kəsilir. O qeyd etdi ki, bunlar MİQ imtahanından müvafiq bal toplayıb hazırda işləyən müəllimlərdir: “Əslində, müsahibə mərhələsi yayda olmalı idi, amma aprel ayında etdilər və müəllimləri kəsiblər. Eləsi var hərbiçi ailəsidir, amma hamilə olması səbəbilə götürüb kəsiblər”- deyə bildirdi.
İradə SARIYEVA
