Abşeron rayonu Mehdiabad qəsəbəsində dözülməz vəziyyət yaranıb. Gölməçələr ətrafa üfunət və xəstəlik yayır. Belə ki, yaşayış evlərinin bir neçə metrliyində yerləşən iki gölməçə çirkab və qurunt suları, həmçinin məişət tullantıları ucbatından ətrafa üfünət və xəstəlik yayır.
Xüsusən də qəsəbənin Sülh küçəsində vəziyyət daha dözülməzdir. Sakinlər qeyd edir ki, ərazidə qurunt sularının daşması nəticəsində evləri çirkab sulrı basır. Bundan əlavə, ərazidə məişət tullantıları o qədər çoxdur ki, hətta yoldan belə keçmək olmur. Ərazidən toplanan tullantıların çoxu məhz bu gölməçələrə daşınır. Beş ildir qəsəbə sakinləri belə zülm içindədilər, amma baxan yoxdur. Şikayətlərə əhəmiyyət verilmir. Ərazidə kanalizasiya yoxdur. Bəzi evlərdə iydən-qoxudan qalmaq belə olmur.
Abşeron Rayon İcra Hakimiyyətinin Mehdiabad qəsəbəsi üzrə İcra Nümayəndəliyindən bildiriblər ki, ərazidə yaranan vəziyyətdən xəbərdardılar. O da qeyd edilib ki, o cür vəziyyətin yaranmasına səbəb oradakı sakinlərdir. Yəni bilərəkdən məişət tullantılarını gölməçə ətraflarına atırlar. Daha sonra söz veriblər ki, gələcəkdə oranı abadlaşdırmaq üçün tədbirlər görüləcək.
“Çıxış yolu sözügedən işlərin bələdiyyələrə həvalə olunmasından keçir”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, qəsəbələrin idarəçiliyi dəyişməlidir: “Problem ondadır ki, icra nümayəndəlikləri onlara həvalə olunan işlərin öhdəsindən gələ bilmir. Bakıətrafı hansı qəsəbəyə baxırsan, ya zibillər vaxtında aparılmır, ya da yaşayış məntəqələrinin yaxınlığında natəmizlik hökm sürür. Elə yerlər var ki, orada zibil qabları olmadığı üçün sakinlər tullantıları ətrafa atır. Bir növ sözügedən məsələdə bir uyğunsuzluq var. Hansı ki, hər il dövlət büdcəsindən məişət tullantılarının daşınması ilə əlaqədar milyonlarla vəsait ayrılır. Problem ondadır ki, bu məqsədlə ayrılan vəsaitlərin müəyyən hissəsi mənimsənilir. Belə olmasaydı, o zaman Mehdiabad qəsəbəsində belə acınacaqlı vəziyyət yaranmazdı. Halbuki, Mehdibad Bakının ən böyük qəsəbələrindən biridir. Son illər orada yaşayanların sayı xeyli artıb. Çıxış yolu sözügedən işlərin bələdiyyələrə həvalə olunmasından keçir. Əfsuslar olsun ki, icra hakimiyyətləri bələdiyyələrin səlahiyyətlərini mənimsəyərək işin effektivliyini aşağı salırlar. Bax, əsas problem bundadır. Hesab edirəm ki, bu işlərlə sırf bələdiyyələr məşğul olsa, o zaman vəziyyət düzələcək”.
Bu baxımdan ekspert hesab edir ki, məişət tullantılarının daşınması ilə bələdiyyələr məşğul olmalıdır.
Vidadi ORDAHALLI
