Məlum olduğu kimi, Bakının “Google Maps” xəritəsindən ictimai nəqliyyat marşrutları yığışdırılıb. “Google Maps”də ünvana gediş üsulları seçilərkən artıq yalnız piyada, taksi və metro seçimləri görünür və avtobus seçimi olmur.
Qeyd edək ki, avtobus marşrutlarının xəritədə görünməyəcəyi ilə bağlı 1 ay öncə xəbərdarlıq edilib. Belə ki, “Transit for Baku” layihəsinin iştirakçıları indiyə qədər “Google” tətbiqini könüllü olaraq bu məlumatlarla təmin etdiklərini, lakin artıq Bakı Nəqliyyat Agentliyinin (BNA) məlumatları operativ şəkildə göndərmək istəmədiyi üçün martın 19-dan etibarən avtobus məlumatlarının “Google” xəritələrinə inteqrasiyasının dayandırıldığını, daha sonra isə məlumatın tamamilə yığışdırılacağını demişdi. Nəticə olaraq sözügedən məlumatlar proqramda yer almamağa başladı.
Qeyd edək ki, BNA-nın yarıtmaz fəaliyyəti bununla bitmir. Belə ki, Hesablama Palatasının məlumatında qeyd olunurdu ki, dövlət vəsaitləri hesabına alınan avtobusların son 5 ildə orta hesabla 25,4 %-i depoda istifadəsiz saxlanılıb. Əlavə olaraq 320 ədəd sərnişin avtobusunun hazırkı məlum alış prosesi də nəzərə alınmaqla cari vəziyyətdə qeyd olunan faiz nisbətinin daha da artacağı gözlənilir. Yəni alınan yeni avtobuslardan istifadə edilmədiyi müəyyən olunub. Bildirək ki, adıçəkilən qurumla bağlı narazılıqlar bitmək bilmir. Növbəti belə hal isə marşrutlarla bağlı məlumatların “Google Maps”dan silinməsidir.
“Google Maps” resursunda Azərbaycanın ictimai nəqliyyat sistemi ilə bağlı məlumatların silinəcəyi haqda məlumatlar verilirdi, lakin…”
Azərbaycan İnternet Forumunun prezidenti, ekspert Osman Gündüz bildirdi ki, xeyli müddətdir “Google Maps” resursunda Azərbaycanın ictimai nəqliyyat sistemi ilə bağlı məlumatların silinəcəyi haqda məlumatlar verilirdi: “Bununla bağlı uzun illər bu işlə könüllü məşğul olan “Transit For Baku” (TFB) qrupu məlumat açıqlayıb. Ötən ayın əvvəli bu problemlə bağlı yazdım. Artıq bu məlumatlar “Google Maps”dən yığışdırılıb. Bu tip məlumatlar hazırda yalnız Bakı Nəqliyyat Agentliyinin (BNA) alo141.az saytında və mobil versiyada mövcuddur. Düşünmək olar ki, TFB könüllü qurumu zəruri məlumatları emal oluna biləcək səviyyədə BNA-dan əldə etməkdə çətinlik çəkir. Digər üsullarla bu məlumatları əldə edib yenidən emal edərək “Google” resursuna inteqrasiya etmək isə, təbii ki, əlavə resurslar tələb edir. Görünür ki, qurumun BNA ilə partnyorluğunda problemlər yaranıb. Əlbəttə, qlobal xəritələrdən bu tip məlumatların yığışdırılması ölkəmiz üçün arzuolunan deyil. Gərək BNA zamanında bu məsələyə reaksiya verəydi ki, məlumatlar silinəcək səviyyəyə çatmayaydı”.
Ekspert hesab edir ki, Azərbaycanın ictimai nəqliyyat məlumatlarının “Google Maps” üzərindən verilməsinin davam etdirilməsi üçün BNA tez bir zamanda bu variantlardan seçim etməlidir:
1. BNA bir çox ölkələrdə olduğu kimi ictimai əhəmiyyət kəsb edən məlumatları özü “Google Maps”a təqdim etməlidir. Bunun üçün qurum “Google” şirkəti ilə əməkdaşlıq etməli və xidməti təqdim edən strukturlarla partnyorluq müqaviləsi imzalamalıdır.
2. BNA “Transit For Baku” könüllü komandası ilə müqavilə imzalamalı, adı çəkilən məlumatların emal oluna biləcək səviyyədə TFB qurumuna verilməsi təmin edilməlidir.
O.Gündüzün sözlərinə görə, BNA hansısa marşrut dəyişikliyini, hansısa xəbərin və ya press-relizin içərisində deyil, emal oluna biləcək səviyyədə açıqlamalıdır: “Təəssüf ki, bizdə hələlik “Açıq Məlumatlar haqqında” Qanun da qəbul edilməyib. Hansı ki, bu qanun, o cümlədən, Açıq məlumatlar portalı (opendata.az) Açıq Hökumətin əsas tərkib hissəsidir. Bu portalda isə hələlik çox “kasıbcalıqdır”.
Günel CəLİLOVA
