Famil Bağırov: “6 ildir ki, Astara rayonunda bizim ailəmizə qarşı bu haqsızlıq davam edir...”
Astara rayon sakini Bağırova Tahirə Dadaş qızı və oğlu Bağırov Famil Zahidağa oğlu Prezident İlham Əliyevə videomüraciət edib. Ana və oğul Prezidentə müraciət edirlər ki, Astara rayonunda onlarla bağlı baş verənlərin, üzləşdikləri haqsızlıqların, ədalətsiz qərarların araşdırılması üçün Astara rayonuna komissiya göndərilməsi barədə aidiyyəti qurumlara göstəriş versin.
Astara rayonundan Bağırova Tahirə müraciətində bildirir ki, həyat yoldaşının qardaşı, yəni qaynı Bağırov Elman Hüseynağa oğlu onlara aid olan mülkləri qanunsuz olaraq ələ keçirib, lakin məhkəmələr məsələyə obyektiv yanaşmayıb, onların öz əleyhinə qərar çıxarıb. “2016-cı ilin may ayının 4-də mənim yoldaşım öz qardaşı ilə mübahisə etdiyi üçün o bizim üç mülkümüzü əlimizdən alıb. Yoldaşım Astara rayon İcra Hakimiyyətinə şikayətə gedib və orada da onunla mübahisə ediblər. Oradan əsəbi halda gələrkən yolda maşın qəzasına düşüb. Liman rəisi Nadirov Samir Aydın oğlu sürətlə idarə etdiyi maşınla yoldaşımı vurub, yoldaşım həyatını itirib. Sonra isə yerli orqanların köməkliyi və rüşvət yolu ilə canını məsuliyyətdən qurtarıb. Bu yolla iş bağlanıb. Ailəmiz küçələrdə qalıb. Uşaqlarımın heç birinin iş yeri yoxdur, heç yerdə işləmirlər. Astara rayonundan rüşvətxorluq təmizlənmir. Cənab Prezident, xahiş edirəm ki, bu məsələlərin araşdırılması üçün rayona komissiya göndərililsin. Heç yerdə şikayətimizə baxılmır, boğaza yığılmışıq. Biz şikayət edirik, amma o biri tərəfdən rüşvət alıb şikayətlərimizi ləğv edirlər. Cənab Prezident, biz məcburiyyət qarşısında qalıb Sizə müraciət edirik”.
T.Bağırovanın sözlərinə görə, yalnız ölkə başçısı onun və ailəsinin üzləşdiyi problemi həll edə bilər.
Bağırov Famil Zahidağa oğlu da qeyd edir ki, 2010-cu ildən bəri əmisi Bağırov Elmanla münaqişə yaşayırlar və bundan ciddi əziyyət çəkirlər. “Şikayətimlə bağlı birbaşa üzümü cənab Prezedentə tutub müraciət etməkdə məqsədim odur ki, 2010-cu ildən münaqişəli vəziyyətdə yaşayırıq. Astara rayonunda qonşuluqda yaşayan doğma əmim Elman Bağırov tərəfindən dəfələrlə təzyiqlərə, təhdidlərə məruz qalmışıq. Hazırda da bu proses davam edir. Sonuncu dəfə oğlu Rəşad Bağırov 12 il azadlıqdan məhrumetmə cəzasından üç il sonra azadlığa buraxılıb. Buraxılandan bir neçə gün sonra atamın istifadəsində olan 6 sot torpaq sahəsinə və 20-25 kvadratmetrlik evə daxil olub və atam Bağırov Zahidağa Hüseynağa oğlunun adına mülkiyyət hüququnun tanınmasına görə hər hansı bir sənəd olubsa da, Rəşad Bağırov həmin sənədi evdən oğurlayıb. O həmin sənədin üzərində saxtakarlıq edib. Məlum məsələdir ki, bu iş rüşvət əsasında görülüb. Astaranın bir neçə məmuruna rüsvət verərək atam Bağırov Zahidağanın mülkiyyətində olan torpaq sahəsi ilə bağlı satış məqsədilə saxta sənəd hazırlayıb. 2016-cı ildən bugünə qədər də bu proses davam edir. Astara rayonunda rüşvətxorluq, haqsızlıq, yerlibazlıq, qohumbazlıq davam edir. Dəfələrlə ərizə ilə məhkəmələrə, Astara rayon İcra Hakimiyyətinin başçısına, polis idarəsinə, prokurorluğa müraciət etmişik. Amma şikayətlərimizə baxan yoxdur. Demək istəyirəm ki, sonuncu dəfə 04.05.2016-cı il tarixdə atam Bağırov Zahidağa Hüseynağa oğlu Astara rayon İcra Hakimiyyəti başçısının qəbuluna girərkən Elman Bağırov həyat yoldaşı Gülbənizlə birgə icra başçısının qəbul otağında atama təzyiq göstəriblər və ona imkan verməyiblər ki, qəbula gedib sözünü desin...”
F.Bağırov deyir ki, atası əsəbi halda evə qayıdarkən Astaranın Bayraq meydanında yol nəqliyyat hadisəsi zamanı həyatını itirib. Bundan sonra hüquqi varis kimi o, atasının pozulmuş hüquqlarını bərpa etmək məqsədilə dəfələrlə yerli qurumlara ərizə ilə müraciət edib. F.Bağırov deyir ki, vətəndaş kimi yerli qurumlar və öz doğma əmisi tərəfindən hüquqları pozulub. O qeyd edir ki, aidiyyəti qurumlara şikayət etdikdə o qurumlar şikayəti dəxli olmayan təşkilatlara yönəldirlər: “6 ildir ki, Astara rayonunda bizim ailəmizə qarşı bu haqsızlıq davam edir, bizim vətəndaş hüquqlarımız pozulur. Bizim şikayətlərimizi müxtəlif qurumlara yönəldirlər və nəticədə də sənədlər yenidən məhkəməyə gəlir, məhkəmə isə işi həll etmir. Məhkəmədə olmuşuq. Məhkəmə mülkiyyət hüququnun təsdiqlənməsi ilə bağlı qərarı bizim deyil, haqsız olaraq Elman Bağırovun xeyrinə çıxarıb. Buna etirazımızı bildirmişik. Bu işdə bir neçə şəxsin əli var. Elman Bağırov varlıdır və dənizdən balıq ovlayan şəxsdir. İmkanlarına görə Astara rayonunda bir neçə dövlət məmurunu ələ keçirib...”
F.Bağırov ümid edir ki, anasının və özünün müraciəti ictimailəşdikdən sonra Prezident İlham Əliyev bu müraciətə reaksiya verəcək və məsələnin obyektiv araşdırılması üçün müvafiq qurumlara göstəriş verəcək.
Yazını çapa hazırlayarkən yazıda adı çəkilən qarşı tərəfin mövqeyini öyrənə bilmədik. Əlaqə saxlayarlarsa, onların da mövqeyini dərc edəcəyik.
Leyla QARAXANLI
