Bakının 164 nömrəli orta məktəbində 9 May Qələbə günü ilə bağlı keçirilən tədbir ciddi müzakirələrə səbəb olub. Paylaşılan fotolardan görünür ki, uşaqların arxa fonu SSRİ bayraqları ilə bəzədilib. Şagirdlərin yaxasına isə faşizm üzərində Qələbəyə heç bir aidiyyəti olmayan Geogi Lenti taxılıb.
Qeyd edək ki, bundan əvvəl də hansısa məktəbdə dini klip çəkilmişdi. Həmin klipdə aşağı sinif şagirdlərinin simaları əks olunurdu. Təbiidir ki, keçirilən bu tədbirlər həm də ölkəmizin Konstitusiyası ilə ziddiyyət təşkil edir. Çünki ölkəmizdəki təhsil dünyəvi əsaslarla keçirilməlidir.
Hazırda Rusiya ordusu Ukraynaya bu məhz uşaqların yaxasına vurulan "Qələbə bantları" ilə daxil olur. Bəs Təhsil Nazirliyi niyə araşdırmır ki, 164 saylı məktəb rus beretkalarını, bantları necə hazırlatdırıb, yaxud SSRİ simvollarını haradan alıb?
Tarix elmləri doktoru, professor Məhərrəm Zülfüqarlı “Bakı -Xəbər”ə açıqlamasında bildirdi ki, Rusiya Ukraynaya hücum edir, Moldovanı işğalla hədələyir: “Açıq şəkildə deyir ki, SSRİ-ni bərpa etmək istəyir. Bununla bağlı bütün postsovet respublikalarını hədə altına salmış olur. Belə bir şəraitdə bu cür tədbiri keçirib, bizim balalarımızı da ora cəlb etmək təxribatdan başqa nəsə deyil. Bu, ideoloji səhv olmaqla yanaşı, həm də müstəqil Azərbaycana qarşı olan bir təxribatdır. Mən düşünmürəm ki, bu işi məktəb direktoru özfəaliyyəti nəticəsində edib. Şübhəsiz ki, ona dəstək verənlər də olub. Hazırda Rusiyanın ciddi dəstəyə ehtiyacı var. Rusiya belə işlərə həm də külli miqdarda pul sərf edir. Ukrayna ilə bağlı da belə planı vardı ki, qoşun həmin ölkəyə girən kimi, rusiyayönümlü insanlar əllərində gül çıxıb onları qarşılamalıydı. Bu, baş vermədi. Azərbaycanda Rusiyanın xeyrinə işləyən təxribatçı qruplar var. Bunun qarşısını bizim əlaqədar qurumlar mütləq almalıdır. İndiki ağır beynəlxalq şəraitdə belə addımın atılması birbaşa dövlətimizə qarşı təxribatdır. Təhsil Nazirliyi bu hadisəyə görə həmin məktəbin direktorunu cəzalandırmalıdır”.
Məhəmmədəli QƏRİBLİ
